بسم الله الرحمن الرحيم
السلام عليكم ورحمة الله وبركاتهـ
كل عام وانتم بخير ,, وجعلنا الله وياكم من المعتوقين
العيد كان عندي عيدين الحمد لله ,, عيد الفطر , وقبولي بالبعثه ولله الحمد
>وهذا الموضوع عيدية مبتعث <
لكل دارس على حسابه الخاص : هذا الموضوع من الـ ألف الى الـ ياء
طبعا في مواضيع مكرره الاف المررات فانا مجرد اني رتبت الموضوع بشكل متناسق مع وضع روابط وتوضيح اكثر .
-----------------------
اولا : الفيزا
كلكم تتلخبطون < قبول معهد ؟!! قبول جامعه ؟!! فيزا ؟!!
^ ما تدري وش قبل وش !!
بعد ما تستخير الله وتبي تبدأ بالجرائات
1- تجيب قبول معهد من اي مكتب مضمون ومعروف في مدينتك
^ قوقل مايرد سائل ^
2- بعد ما تجيب القبول وهو تقريبا ياخذ 3ايام - اسبوع > تبدأ تسوي اجرائات الفيزا بكل دقه
علما انه في بشرى ساره " تم الغاء الفحص الطبي الخاص بسفاره الكنديه رسميا "
وهذي لتسهيل الامور الحمد لله
لازم قبول المعهد في الفيزا < لانك راح تحتاج فيزا دارسيه >> ولازم يكون قبول المعهد اكثر من 6 شهور لأن اقل من هذي المده ما راح يعطوك فيزا دراسيه
واي واحد يبي يلتحق بالبعثه او يبي يدرس جامعه > لا يفكر انه ياخذ فيزة زائر او سائح
في شي بقوله لكم : القبول الجامعي
تقدر تجيبه من السعوديه , وتقدر تجيبه من كندا
اللي تتسهل معاه ويقدر يجيب قبول وهو في السعوديه بسعر معقول او له قريب يساعده هو افضل
واللي ما يقدر انصحه اذا وصل كندا يبحث عن قبول
^ والفرق هو اختصار الوقت في فتح ملف وطلب الحاق بوقت اسرع ^
>^ هذا كل ما يختص بالفيزا ^<
--------------------
ثانيا : الملابس والاغراض
خذ نص الملابس صيفيه والنص الثاني شتوي <
طبعا الملابس هنا سااااامجه وغاليه < تدخل السوق ما تعرف وش تشتري > في السعوديه احلى بمليوون مرره
لكن عندهم الشتويه ممتازه وتدفيك
اشتروا فيش " انترناشونال " < اللي يركب على اي فيش لان هنا افياشهم تختلف عنا ولا ترى ماراح تقدر تشغل الاب توب
سجادتك واشيائك الدينيه احرص عليها ولا تنساها < لان كل مايضيق صدرك مالك الا هي .
وعاد كل واحد يجيب الشي اللي يبيه , بن , قهوه , عسل , زيت , مدري وش اللي تبيه وما تقدر تستغني عنه خذه معه
وحطه في شنطة الشحن ماهو في الطياره معاك < ولا راح يطلعوها عليك .. انتبه !!
وانصحكم بعد , الاشياء اشتروها اصليه من السعوديه < عشان ما تتورط هنا
شريت مكينه حلاقه , يوم وصلت حلقت نص الشنب وخربت علي و النص الثاني باقي 
< ما اعرف اروح للحلاق ولا اعرف وش اسوي >> والحمد لله كان معي امواس وتداركت الموضوع هههه قاموس عربي - انقلش
>^ هذا كل ما يخص الملابس ^<
----------------------
ثالثا : الطيران
انصحك تحجز قبل سفرك بـ 3 اسابيع
البعض يقول الفيزا توصل متأخر !>
<مدد تاريخ بدأ الدراسه
وعشان يكون السعر ارخص عليك
بصراحه انا ما عندي خبره بالطيارات لكن بقلكم تجربتي وكلام الشباب
انصحكم بـ > الالمانيه و البريطانيه
توقف في فرانكفورت
والثانيه توقف في لندن
وانا طلعت على الخطوط الصينيه " كاثي باسيفيك " < شقيت الكره الارضيه شق
وكانت رحله متعبه للامانه , خصوصا ان الترانزيت تبعي كان 9 ساعات ^ بعدين بتطلع من الرحله كاااااااااره الصينين واليابانين واصحاب العيون الضيقه بصفه عامه والاكل مختلف عنا
حاولت ابحث عن موضوع يخص التذاكر < بس مالقيت , اللي عنده رابط يتكرم ويحطه
بالنسبه للبوابات > الموضوع اسهل مما تتخيل راح تعرف كل شي يوم توصل
واللي قبلك ماهم اذكى منك
الشي المهم هو / اول ما توصل مطار كندا
لا تطلع من المطار الا والاستدي بيرمت " تصريح الدراسه " معااااااك < فهمت ؟!!
وفيه شي مهم بعد
خذ لك دفتر نايلون الاوراق الشفافه هذاك ,, وخذي كللللل اورااااااقك وحطها في هالدفتر
من الشهاده الدراسيه الا اوراق الفيزا < كل شي صوره وحطه في هالملف
^ اي شي احتاجه افتح الدفتر واطلع الورقه على طول < ومصور من كل ورقه نسسخ عديده
>^ هذا كل ما يختص بالطيران وما بعده ^<
-----------------
رابعا : القبول الجامعي
س1/ وش هو القبول الجامعي المشروط والغير مشروط ؟!!
س2/ وش الفرق بين معهد الجامعه والمعهد التجاري ؟!!
ج1/
القبول الجامعي الغير مشروط : هو انك تجيب قبول جامعه فقط بالتخصص اللي تبيه , والجامعه تقولك تبي تبدأ الدراسه لازم تجيب معدل معين في اللغه الانجليزيه
^ وعاد هنا انت براحتك تدرس في البيت تدرس في المعهد اهم شي تجيب معدل االلي تطلبه الجامعه
وغالبا يطلبون 6 الى 6.5 في الايلتس
القبول الجامعي المشروط : وهو انك تجيب قبول جامعي مع المعهد التابع لهذه الجامعه
^ وهذا القبول اللي تبيه الملحقيه واللي لازم انت تجيبه ^
طبعا تدرس في المعهد التابع للجامعه اللغه وتقدر تنزل في المستويات الاخيره من اللغه مواد اكاديميه اذا كنت تبي .
ج2/
الفرق بين المعهد الحكومي و التجاري
المعهد الحكومي : يدرس دراسه اكاديمه " يعني تدريس جامعه واختبارات وزي كذا وجدي مافيه تساهل "
المعهد التجاري : يدرسك بطريقه ابطئ واسهل ويعلمك ممارسة الاسبيكنق و الرايتينق والريدينق , مبسسط جدا
طبعا اللي لغته زيرووو " صفر " يدخل معهد تجاري لمدة 6 شهور او حسب المده اللي يحس انه تحسنت لغته فيها وبعدها يحول على معهد الجامعه
علما : ان الملحقيه ما تسمح لطالب ان يدرس اكثر من 6 شهور في معهد تجاري
نرجع للقبول
لازم تكون الجامعه موصى بها ومافيها تكدس طلاب
والتخصص لازم يكون مطلوب ايضا موصى به
والمعهد التجاري ايضا لازم يكون موصى به
وتقدر تراجع هذي الجامعات عن طريق موقع الملحقيه
وراح احط بعض الروابط المهمه اخر الموضوع
>^ هذا كل ما يخص القبولات انشا الله ^<
------------------
اخيرا : فتح ملف وطلب الحاق بالبعثه
فتح ملف طالب دارس على حسابه الخاص
للحين الحمد لله ما تطبق نظام الـ 30 ساعه يعني تقدر تجي وتلتحق على طول اذا اراد الله
وفي ناس التحقت في 15 يوم وانا منهم
وفي ناس لها 6 شهور وللحين ما التحقت < الله يسهلهم امرهم ويفرجها عليهم
فـ توكلوا على الله دائما
طبعا ما تقدر تفتح ملف الا اذا كانت اوراقك كامله وتكون موجود في بلد الدراسه وقاعد تدرس
^ والشروط موجوده في موقع الملحقيه اللي راح ادرجه تحت ^
وبالنسبه انهم طالبين معدل 80% فـ ممكن يتغاضوا عن هالشرط
بس اهم شي اوراقك كامله معهد وجامعه والاشياء الباقيه والبيانات صحيحه
^ انصحكم تفتحوا ملف عند المكاتب المختصه في كندا وماراح ياخذوا اكثر من 50 دولار ^
اختصارا للوقت و الجهد و اسهل و عشان عندهم خبره
بعدها اذا كانت اوراقك كامله ,, راح يرسلوا لك عالايميل رقمك الطلابي و الرقم السري
وتنطلق بعدها على
بعد ما تدخل على البوابة راح تلاقي مكتوب . 3 معاملات , انتظر لين يجي جنبها مكتوب " مقبول "
^ اذا كتبوا لك مقبول يعني اوراقك كامله وكل شي سليم , الحين تروح تسوي من نفس البوابه " طلب الحاق بالبعثه " وتعبي البيانات وتنتظر الين الله يفرررجها ويلحقوووك باذن اللي ما تنام عينه بالبعثه
-----------------------
روابط تهمك
ارجو من كل شخص استفاد من موضوعي هذا
ان يدعوا لي ولوالدتي واهلي اجمعين بالتوفيق وتحقيق ما اصبوا اليه
ان اصبت فمن الله ,, وان اخطئت فمن الشيطان
سبحان الله وبحمده ,, سبحان الله العظيم
بالتووووفيق
حرر في 1/10/1431
LinkBack URL
About LinkBacks
تستاهل كل خير اخوي دحمووون اقسم بالله فرحتلك من قلبي ..
وهذا بفضل الله ثم بفضل دعوات الاشخاص الذين تحاول ان تساعدهم ..
هذي افضل عيدية ..ههههه
كل عام وانت بخير
اخوك / علي