LinkBack URL
About LinkBacks
الله يجزاك خير ويوفقك شكرا على الشرح المفصل
7 " 
خطوة بخطوة من مطار السعودية ثم لندن ثم فانكوفر وصولا لننايمو
خطوة بخطوة من مطار السعودية ثم لندن ثم فانكوفر وصولا لننايمو
تنبيه: هذا الموضوع قديم. تم طرحه قبل 6029 يوم مضى, قد يكون هناك ردود جديدة هي من سببت رفع الموضوع!
قائمة الأعضاء الموسومين في هذا الموضوع
-
-
- هلا فيك اخوي علاء وسفرا موفقا7 "
- ما شاء الله تقرير مفصل ، ما اتوقع بعد كذا فيه احد راح يضيع7 "
يعطيك العافية - 7 "هذا اقل الواجب اللي ممكن اقدمه عرفان لمنتداي الحبيب...
وانا عاهدت نفسي اني راح ابقى على تواصل مع الملتقى حتى بعد السفر
يعني زي ما انا استفدت لازم افيد غيري...
وعند ربك ما يضيع شي
- السلام عليكم7 "
لو سمحتوا لو في احد مبتعث لدراسة الطب البشري او يدرس الحين لو تكرم يساعدني
الله يوفقه دنيا واخرة - 7 "يا هلا اختي .. بس انتي شايفة الموضوع عن الطيران
... ولسوء الحظ كمان ماني طبيب
- بصراحة انا اقول يابخت اللي رايح لهذه الجزيرة رائعة بكل معنى الكلمة7 "
مشكور يااخي على المعلومات واذا تسمحلي اضيف تجربة هذا الطالب المبتعث
الى نفس الجامعة يمكن تستفيد منها :
http://travel.maktoob.com/vb/travel142300/ - ماشاء الله عليك من جد7 "
<< دخلتها جو بالرحله
والله يوفقك اخوي وييسر دربك
دمـــت بــــود,,
- اشكرك بقوووووووووة على هذا الموضوع المفصل ..7 "
الله يجزاك خير على شرحك و تفاصيلك اللي تهمنا كثيرا .. لأن الواحد يكون عنده غموض و تخوف , لكن لما يقرأ تجربه مفصلة مثل تجربتك يرتاح و يطمئن كثيرا ..
جزاك الله خيرا ..
و وفقك ربي في دراستك ..
بأي جامعة جاك القبول ؟
June 16th, 2008, 05:15 PM
بسم الله الرحمن الرحيماخوي اختي ... شباب صبايا.... الرحلة سهلة جدا ...
لما تطلع من جدة أكد على الموظف في المطار انك تبي تستلم الشنط في ننايمو
وحيعطيك لصقة تلصقها على الشنطة تأكد أنها كالتالي
LHR رمز مطار هيثرو
YVR رمز مطار فانكوفر
YCD رمز مطار ننايمو
وطبعا بما انك عى الطيران السعودي يمديك تشيل 32 كيلو للشنطة (ممكن تشيل شنطتين)
هذا الكلام كان بتاريخ 13-06 -2008
في الطيارة للندن راح يعطونك كرت الوصول للندن ... مافي داعي تعبيه لانك ما راح تطلع من المطار...
بس توصل للندن خلك ماشي مع الناس.... وحتلاقي لوحة اسمها
Connecting flights
تظلك ماشي معاها
وحتلاقي بعدين لوحة كبيرة فيها اسماء مكاتب الطيران المختلفة .. وحسب طيراتك اللي راح تركب فيها من لندن
اذا كانت Air Canada حتروح لمكتب Air Canada
وتفضل ماشي الى ان توصل لموظفين يدققون لك الجواز والتيكت... تعديهم
الى ان توصل الى مكان للتفتيش ... حتفسخ جزمتك وترمي اي سوائل شايلها معاك حتى لو بشنطة اليد الصغيرة ( انا كانت معاي كاسة الموية حقت الطيراة .. قال لي اشربها او ارميها )
لوحة كبيرة تعلمك وين مواقع مكاتب الطيران
وبعدها حيكون في مفترق طرق يا اما يمين او يسار ...
طبعا Air Canada على اليسار
..
بالمناسبة مكتب Air Canada بجنب مكتب Saudi Airlines
توقف في الدور .. وتحجز مقعدك في الطيارة ...
واذا كنت مكمل لننايمو بالطيارة راح تعطيك البوردينغ ( بطاقة الصعود للطائرة ) حق فانكوفر والبوردينغ حق ننايمو كمان
يعني لما تصل فانكوفر ما يحتاج توقف عند الموظف في المطار ...
والموظفة هذي راح تقول لك حاجة ثانية مهمة ..
راح تقول لك لازم تستلم الامتعة من مطار فانكوفر ( مع انك من السعودية انت طالب منهم انك تستلم العفش في ننايمو )...
بس لانه صالة الرحلات الداخلية في كندا غير صالة الرحلات الدولية
والظاهر انهم ما عندهم موظفين يوصولون الشنط بين الصالتين....
المهم انت لما تقول لك هالملاحظتين تتشكرها وتمشي باتجاه يسار الموظفة (او باتجاه يمينك) ...
راح تلاقي بالطريق على يمينك اول شي.... في تواليت ( يعني خش وريح مصارينك ..وتوضى لانك يمكن حتصلي ..
في غرفة في المطار اسمها
Multifaith room (حقت كلو.. مسلم مسيحي بوذي... اي شي ) وربنا شايف الكل
>>> المهم بس تطلع من التواليت حتلاقي اسواق ومحلات ... خليك ماشي الى ان توصل صالة كبيرة وقبتها قزاز يدخل من القبة نور الشمس (كيف بس الجو الرمانسي والوصف الشاعري خخخخ ) .. والصالة زحمة وبنصها قهوة ستارباكس ( أنا كنت احسب بس عندنا في شارع التحلية في ستاربكس.. يلعن ام التقليد خخخ ) وجنب القهوة حتلاقي لوحة كبيرة مكتوب عليها اسماء الرحلات الدولية ..
حتدور على رقم رحلتك ( فانكوفور ((الرقم )) ) وتحفظ رقم البوابة ووقت صعود الطائرة
غالبا صعود الطائرة قبل ساعة من الإقلاع
الان ريح الى ان يصير وقت الرحلة ...
بعدها تقوم باتجاه بوابة الصعود للطائرة ( لازم تكون عارف رقمها من اللوحة )
وفي لوحات راح تدلك وين رقم البوابة
راح تصعد للطيارة
والرحلة عشر ساعات لفانكوفر تقريبا
مقارنة سريعة بين الطيران السعودي والكندي
( ميزة الطيران الكندي انهم عندهم دواء لدوخة السفر قول للمضيفة ابغى Anti vomiting pill انتي فوميتينغ بيل يعني قرص دواء مضاد للطراش (والطراش هي كلمة مقتبسة من الصوت الذي يصدر من الشخص عندما يفرغ ما في معدته على الارض... ما ادري لو الواحد طرش وما كان في ارض ...ايش كان حيسموه ؟؟ خخخخخخ كيف الخيال العلمي حقي؟؟ ) ,, بينما الطيران السعودية ما عندهم غير المسكن الفعال لكل ما يخطر على البال ( فيفادول) ودبر نفسك ....كيف الدعاية ... لو عرفت شركة ادوائية اني طلعت لهم شعار جديد للفيفادول يمكن يشغلوني عندهم مدير تسويق لول
بس الصراحة في الطيارة السعودية ما تطفش لانك عندك تلفزيون خاص فيك والرحلة 6 ساعات للندن مو عشرة زي رحلة فانكوفر بالاضافة الى شيء مهم وهو ان الطيارة السعودية تعلمك بوقت دخول الصلاة وفي غرفة صلاة في آخر الطيارة والقبلة باتجاه ذيل الطيارة
( تعديل ... في سنة 2009 قامت ايركندا مشكورة باضافة التلفزيون لكل مقعد مما ادى لاستيقاظي طوال الرحلة ... والله تشكيلة الافلام رهيبة ).
كيف بس الابدايتينغ ... هذا دليل انه الموضوع متجدد ههههه
هذا غير ان دلعت نفسك على الطيارة الكندية ووصيت موظف الحجز لمن حجزت التذكرة انه يسجل لك رغبتك بوجبة الكوشر مييل )
بس توصل لفانكوفر راح تمشي مع الناس الى ان توصل الى مكان سلالم متحركة باتجاه الاسفل
بعد ما تنزل من السلالم راح تلاقي ناس واقفين سرى (طابور) عشان تفتيش الجوازات واستلام العفش
انت بما انك جاي للدراسة فلازم تروح الاميجراشين Immigration
هذا مكانه يا طويل العمر ويا طويلة العمر ( على فكرة ما احب هالكلمة لانه ما طويل العمر غير الشيطان ""قال ربي انظرني الى يوم يبعثون قال فانك من المنظرين"")
يالله خلص درس التفسير .. تررررررررن الفسحة خخخخخخ
المهم
وانت نازل من السلالم اللي قلت لك عليها من شوية .
حتلاقي موظف على يمينك اساله وين الاميغراشين ؟.. وهو راح يدلك .. وانت لو ما حصلت هالموظف .. لف خلف السلالم وحتلاقي لوحة مكتوب عليها Immigration تدخل من هالباب الصغير وتمشي في ممرات زجاجية الى ان تصل الى طابور طويل .
تمسك الطابور وتجهز:
1- جوازك
2- وقبول الجامعة حقتك
3- وورقة الفيزا (اللي جات مع الجواز من السفارة )
4- وكرت دخول كندا اللي تعبيه في الطيارة (اذا لغتك مو قد اللازم .. الافضل انك تسيبه فاضي).
رايح يسالك كم راح تجلس ؟؟ اذا كنت اكثر من 6 شهور لازم تعلمه انك رايح تجلس اكثر من 6 شهور
وراح يلصق لك تصريح الاقامة في كندا جنب طبعة الفيزا الكندية اللي في جوازك ...
بعدها تطلع تستسلم العفش..
( ضروري تتستلم عفشك حتى لو انك رايح ننايمو ) بس تطلع من صالة العفش وتمر على الكلب البوليسي.
راح تلاقي موظفة واقفة تنادي (كوننيكتينغ فلايت؟؟ بليز فروم هير....
Connecting flight ....... please from here(
كل اللي لازم تسويه انك تروح باتجاه العامل اللي واقف منتظرك عشان يشيل عفشك ويحطه على السير الكهربائي ... وسلامتكم ...
الموظف رايح يرمي لك الشنط ويقول لك اطلع Level three
طبعا رحلة ننايمو غالبا راح يكون انتظارها طويل ... فانا انصحك تطلع تتفرج على صالة المطار .. واسال عن غرفة
Multifaith room
انا لما وصلت فانكوفر كانت الساعة 1 وربع .. ورحت الغرفة لقيت أخ مصري جزاه الله خيرا واقف وبيخطب الجمعة وكانت الغرفة فيها حول 10 اشخاص وحرمة ( كندية مسلمة ) تصلي معانا عند الباب ..
( زي السنة يعني ... كان النساء يصلون الجمعة وراء الرجال وبدون ساتر ) .لا حد يقول ول ياساتر روح اقرا السيرة النبيوة بعدين تعال تميلح خخخ
بس تصلي ارجع الى ليفل ثري Level three
وخلي احد المظفين يساعدك ويكتب لك رقم بوابة الرحلة حقتك ( لان البوردينغ حق طيارة ننايمو اللي استلمته من مطار لندن ما عليه رقم البوابة )
بس تاخذ رقم البوابة . روح لبوابة Domestic flights
في ليفل ثريي
قبل ما تدخل راح تلاقي موظفة ومعاها اكياس بلاستيك عشان تحط فيه السوائل اللي انت شايلها معاك في الهاند باغ ( شنطة اليد )
ورايح تمر بتفتيش ... بعد التفتيش روح رقم البوابة اللي دوبك اخذته ...
واجلس انتظر موعد الطيارة ...
حتلاقي موظف واقف وفوقه شاشة مكتوب عليها Nanaimo ووقت الرحلة
ومن الشباك تشوف طيارتك ام مروحتين ابو ثلاثين راكب واقفة منتظرة
بس يعلنوا عن الرحلة . وقف في الطابور واظهر للموظف جوازك والبوردينغ ( ملاحظة البوردينغ هو بطاقة الصعود للطائرة
وانت طالع الطيارة اذا كانت شنطة اليد ( الهاند باغ) كبيرة .. راح تطلب منك المضيفة انك تحطها في العربة الموجود خارج الطائرة.... وراح توصل مع العفش عادي ..
اطلع على الطيارة وما ان تطير الطيارة حتى تسمع المضيفة تعلن اننا بدانا بالهبوط التدريجي ...
يعني ما يلحقون حتى يضيفونك كاسة عصير :... انا والله كنت متوقع اقل ما فيها كاسة شاهي ... بس معصي
خلي معك الكامير لانك حتشوف مناظر خيالية في الطريق .. جزر صغيرة ابو 100 متر وكلها اشجار
وحتلاقي اغصان شجر مقطعة ومرمية في البحر لانهم يتاجرون بالخشب بعد طحنه ..بس ما ادري ليش يخزنون الخشب في البحر .. يمكن عشان لما يبيعونه يكون وزنه ثقيل من المويه اللي فيه ..
ما علينا ..
لما توصل مطار ننايمو راح تلاقي سير كهربائي وحيد للشنط
تستلم الشنطة .. واستدر خلفك تحصل بروشورات عن الأماكن السياحية في ننايمو وخرايط لننايمو كلها مجانية ..
طبعا هذي موجود في اي مطار...
وجنبها تلفون لو انت حابب تتصل باحد يجي ياخذك .. التلفون دخل فيه ربع دولار ( كوارتر) واتصل.. أو حتلاقي العيلة منتظرتك في المطار طبعا حسب الاتفاق..
وفي كمان مكتب بدجت لتاجير السيارات في المطار .... للسيارة الصغيرة مثلا اليوم ب 50 دولار والتامين 30 دولار (2009)
والحمد لله على السلامة
أووووووووووه
والله دوبي انتبهت ان هالتقرير اخذ ساعتين
يالله سلام وبالتوفيق
طبعا لا اريد منكم سوى دعوة بظهر الغيب بالتوفيق بالدراسة والمعيشة
ملاحظة: اشكر جميع الداعمين والمشجعين لمواضيعي المتواضعة
والله فرحت لما جاني بعض الشباب وقالوا لي انهم طبعو التقرير ومشيو عليه خطوة بخطوة
احد الشباب من اخوانا من المنطقة الشرقية قالي كمان ( عجبني التقرير والطناز اللي فيه )
يعني احيانا الطناز مفيد ههههههه
والسلام عليكم ورحة الله وبركاته