إلى كل الطلاب المقيمين مع عوائل استرالية ... اطرح لنا تجربتك

المنتدى نايم ليش ؟

عنّي ما سكنت مع عائلة مع انها فاتت فرصة للتعرف على الشعب الاسترالي عن قرب..
لكن اخواني اللي اعرفهم ساكنين عند عوائل ؛ ما يذكرون انه فيها فائدة محرزة...
العيوب:
لأن العائلة أغلبهم يعمل أو يدرس يعني مو فاضي يدردش معك ؛ وبعدين اغلب العوائل ماهم استرال اصليين!! أغلبهم شرق آسيويين لغتهم مكسرة يبي من يعلمهم اللغة مو يتعلّم منهم!! أضف إلى ذلك ان بعض الطلاب يعيش معهم كأنه في فندق يعني هو ما يحتك بهم أصلا ؛ بس يجي ينام ويروح وتلاقي طلعاته وروحاته كلها مع سعوديين!! فأين الفائدة؟؟!
بل بالعكس بعضهم يشوفها مكلفة خاصة إذا ماخذ مع الوجبات وصار اغلب وقته ياكل برا..!! اللي ممكن تكون مفيدة العائلة اللي معها اطفال يعني هاه تتعلم منهم حبتين خاصة اذا كنت مرح وحبوك الاطفال وتعلّقوا فيك !! وهذي نادرا ما تحدث!! ثم ان اللغة أكاديمية يعني تبي لها قعدة وقراية وممارسة كتابة وترجمة وتلخيص وبحث مصادر وبحث على النت ومعرفة أنواع الكلمات ومتى تستخدم صح ومتى تستخدم خطأ؛ يعني شغل الطالب بنفسه ما للعائلة دخل فيه ... واللي أعتقده ان العائلة بتحاول تفهم منك من دون ما تعدّل لك إلا في النادر!!

في النهاية أشوف الشير مع طلاب أجانب خاصة أعلى منك مستوى في اللغة مناسبة أكثر من العوايل!
المزايا:
لأن الطالب الاجنبي اذا خلص التزاماته جاك في الصالة وهاتك طق حنك كل واحد عن بلده والقضايا المعاصرة ورأيه فيها وممكن تستشيره في واجب او بحث وهكذا ..وممكن تتخاوون في طلعة للسيتي أو السينما .... يعني تصير صحبة والمنفعة متبادلة!! خاصة إذا كان الشخص محبوب ومألوف وحاول انه ما يكون الصديق المقرب مرة عشان ما يطفش الطرف الآخر ولا يكون مرة قاطع ومنكمش على نفسه .... ومن هذا التوازن يكون لديه فرصة يجتمع مع اخوياه السعوديين!


بالنسبة للاسعار تتراوح من 160 - 190 دولار بالاسبوع بدون وجبات ؛؛ 240 - 260 مع الوجبات ؛ واللي قريبة من جامعة تكون أغلى طبعاً...
يا إخوان اللي ساكن مع عائلة .......؟ وينكم؟ حتى لو ما سكنت أكيد تعرف أحد ساكن تنقل تجربته!!
الظاهر ان اهل العوايل ملتهين!!
تحياتي......

الله يعطيك العافية اخوي العكاس ماقصرت على التوضيح
يالله ياشباب لاتبخلوا على اخوانكم بطرح تجاربكم

السلام عليكم ورحمة الله وبركاته

غلطان ياخوووي

بلعكس العوائل في استراليا ممتازة جداً لانه منفتح على الشعوب الأخرى وفرندلي جداً

ومثل ماقالوا الأخوان الشعب الأسترالي كله مو اصلي لكن تقدر تسكن مع استراليين من اصل اوربي

لهجتهم مره كويسه

وانصحك اخوووي لاتسكن مع استرالي اصلي لانه لغته صعبه الشعب الأسترالي من اصول اوربية او اسيوية كويسين مره

مشكورين على التوضيح أخي العكاس يعطك العافية سبق وأن ارسلت لك رسالة على الخاص ولم اجد رد والتمس لك العذر قد يكون لأنشغالك بالدراسة وفقك الله
تحياتي للجميع

السلام عليكم ورحمة الله ...

بصراحة من واقع تجربتي ... انا وصلت مطار سيدني وعلى العائله ... كانت العائله في حي (ريدفن) المعروف طبعا بسمعته السيئة ولكن عشت في هذا البيت ما يقارب السنه والاكثر مع هذي العائله المكونه من شخصين فقط كبار في السن استرالين الاصل والفصل وكان معي طالبين غيري اجانب في البيت ولكن لكل واحد غرفته الخاصه ....

طبعا خلال جلستي هذي السنه مر عليه اغلب الجنسيات في البيت .. الصيني والياباني والسعودي والكوري ووالخ ...

صرااااااااااااااحه عائله جدا جداا جدا ممتازه وطيبين جدا واتوقع مافيه احسن منها بسدني ...

اكلهم ممتاز جدا ... النت متوفر ... لك غرفتك الخاصه ... كل شي متوفر وموجود ..

قريبه من الستي فقط 5 دقايق للسنترال ستيشن ...


استفدت من لغتهم جدا جد جدا جدا .. كنا كل ليله نجتمع على العشاء وسواليف لمدة ساعتين اقل شي

غير كذا احفادهم يكونون الصبح في البيت والحرمه دايم 24 ساعه في البيت وتسوووولف وكانها امك


طبعا ما سبق ذكرت الايجابيات ...

بالنبسة للسلبيات والسلبية الوحيده الي واجهتا هو ان يكون معك طالب من نفس جنسك ...

اصبح الهاوس ميت كلهم سعودين قبل فتره لذا اصبحت مني مستفيد من العائله بالعكس صرنا نعلهم العربي

لذا قررت الرحيل وبعد ما خلصت اللغه ... وخلاص مليت سنه ونص بالبيت فقرررت اشوف لي مكاني الخاص

تعرفون العوائل مكانهم صغير ... واحنا شباب واصاحبنا كثير فنحب نطلع ونخرج ونتجمع في اي وقت فصعبه شوي

هذي تجربتي والي عنده اي سؤال انا حاضر

وعليكم السلام ورحمة الله وبركاته
بالنسبة للعوائل تختلف طبعاً فهم بشر هناك منهم الجيد ومنهم السيء كذلك ولعل كلاً منكما مر بتجربة مغايرة.
بالنسبة للاستراليين الأصليين فهم نادرون حسب معرفتي والأغلبية من أصول بريطانية وايرلندية أما الأصول الآسيوية فلا اعتقد أنها مناسبة لتعلم اللغة بشكل صحيح.

وعليكم السلام ورحمة الله وبركاته
أشكرك على طرح تجربتك مع هذه العائلة والسكن مع كبار السن المتقاعدين فرصة رائعة لتعلم اللغة نظراً لكثرة الاحتكاك والتواصل معهم لتواجدهم في المنزل أغلب الوقت.
تواجد السعوديين سيقلل من الاستفادة بشكل كبير لأنك تضطر تجاملهم وتتحدث معهم بحكم أنهم أبناء بلدك وفي غربة .
لكن هل لهجتهم واضحة ؟ لأن لهجة الاستراليين الأصل صعبة نوعاً ما ؟

بصراحه الرجال كان لغته في البداية صعبه شويتين لانه كبير بالسن ولغته كلها (هياط الاسترالين) ويستخدك كلمات خصوصا في التحيه والسلام استراليه يعني تحطها في القاموس ماتطلع لك شي بس لغته في النقاش اكاديمية ورائعه جدا وقاري ومتابع للاخبار العالمية فمثقف شويتين ... الحرمه لغتها جدا جدا جدا واضحه وسلسه ومتعلمه وتناقشك في جميع الامور ودائم متبسمة ...