رأيكم في جامعة فكتوريا وأفضل المناطق المجاورة للسكن

مرحبا

المعهد ممتاز والمدرسين متمكنين خاصة في المحادثه والكتابه
وميزتو انو مافيه عرب كتير يعني ممكن 3 من اصل 12
بس في المرحله الجامعيه الملحقيه ما تقبل الا التخصصات النضريه فقط
مريح المعهد في الدوام لانو يبدا 9 وينتهي 3 ونص كل يوم الا يوم واحد تخلص 12 ونص
يعني مو زي بعض المعاهد سمستر ليل وسميستر صباح وسميستر ظهر

المعهد جنب محظة القطار الرئيسيه لملبورن بينهم دقيقتين بالكتير مشي
طبعا المعهد في السيتي يعني قريب من كل الخدمات

بالنسبه للسكن المؤقت على حسب طلبك لو تبغى زي نظام الشقق في فندق نزلت فيه بعيد عن المعهد ربع ساعه شوف الرابط دا
http://www.mbt3th.us/vb/forum114/thread99200.html

اما لو تبغى فندق بغرفه ومستواه شويه اقل طبعا السعر ارخص ففي الفورملا ون واغلب المبتعثين نزلو فيه

بالنسبه للسكن الدائم فشويه حتتعب فيه على ما ينفتح ملف في الملحقيه وتقدر تكمل الاوراق المطلوبه في مكتب عقار

طبعا افض مكان السيتي وكل ما بعدت عن السيتي كل ما يرخص الايجار

الا في منظقة الساوث بنك فتعتبر في نفس حدود الاسعار تبع السيتي

متوسط ايجار الاسبوع لشقه مكونه من غرفتين في منطقة السيتي والساوث بنك 470 دولار تقريبا الا في الشقق السكنيه اللي في مباني الطلاب تجي ارخص

لو في اي سؤال

مرحبا بيك
انا كاتبه رايي في جامعه فكتوريا من اول بس على اسالتك اول مره حجاوب

على حكاية انو الجامعه ما ترد بالعكس الجامعه مره مره متتعاونه معايا لما كنت في السعوديه

جرب ترسل لمكتب الطلاب الدوليين بنفسك في تاني يوم على طول يردو عليك
دا ايميل اللي كنت اتواصل بيه International @ vu.edu.au

اما بالنسبه لملبورن ملبورن مدينه حلوه ولما تدرس فيها حتنبسط يعني مدينه دراسه وسياحه وترا مو داك الغلى طبعا على حسب الشخص نفسو وصرفيتو
لو كان من الاساس طبعو مسرف ما حيجي نص الشهر الا خلصت فلوسوو
بس الحمد لله عايشين انا ومرافقي بمستوى كويس ومكفيتنا المكافاه

وعن البروده انا من جده في الاساس يعني متعوده على الحر واللين دحين ما لبست ولا مره جاكيت برد
"معلومه انا في جده ما افك مكيف لاني ما احب البرد"
يعني صح برد في فترة الصباح خاصة انو قربنا من الشتاء بس مو بالصوره اللي انتا سامعها جيبلك شي تقيل تمشي امورك حلاوه

لو في اي استفسار قولي وان شا الله ما اخيبك

تحياتي

شكرا أخت سها على تعاونك معانا، وأنا مثلك الجامعة كانوا جداً متعاونين معاي عن طريق الايميل ويردون بسرعة، مع أني تعبتهم في التخصص، وغيروه لي ثلاث مرات حسب طلب جهة عملي الله يسامحهم بس، وأنا تخصصي نظري معترف فيه.

بس حبيت اسأل وش أفضل طريقة للبحث عن سكن دائم، وهل الجامعة تعطيني ورقة أني بدأت أول ما أوصل علشان أقدمها للملحقية، ولا لا.
وقبل بدء الدراسة بكم الواحد لازم يكون موجود في رأيك أسبوع عشرة أيام أقل أكثر.

سامحيني على الأسئلة المتشابكة مع بعض بس محتاسين وخليها على الله.

ولا يهمك حجاوب على قد معرفتي وان شا الله اكفي

اول شي توصل بالسلامه

في كم طريق للسكن الدائم

في بعض الاحيان تلاقي بيوت لبعض الطلاب السعوديين يكونو راجعين او انو سار ضرف وبيغير بيتو وعقدو لسا جاري تقدر تتفق معاه وتغير العقد باسمك و دي تعتبر طريقه سهله وفي نفس الوقت يبغالك تدور على الشخص دا وفي كتير سارت معاهم وتلاقي اعلانات هنا في مبتعث او في موقع النادي السعودي

الطريقه التانيه سكن اليوني لودج "سكن طلاب مشهور في ملبورن " تقدر تقدم عليه وانتا في السعوديه طبعا للعوايل احس ما ينفع وما اعرف كيف وضعك

الطريقه التالته ودي اللي انا سويتها قعدت في سكن مؤقت لما فتحولي لفي الملحقيه وقدرت اجيب خطاب تعريف بالراتب وقدمتو لمكتب العقار طبعا مع باقي الاوراق اللي طالبها المكتب من كشف بالحساب في البنك والجواز و بطاقه الجامعي والفيزا وكل ما كترت الاثباتات كل ما يكون في صالحك
مكاتب العقار لكل مكتب عقار عروض كتير لشقق وبيوت باحجام واشكال واماكن وانتا تختار في بعض الشقق لها موعد تقدر تشوف الشقه فيه طبعا مع كل اللي اتقدمو للشقه وبعدين لو عجبتك تعبي الابلكيشن وتسير المفاضله عن طريق المالك واللي ضماناتو اكتر ترسى عليه
وممكن شقه يكون المفتاح مع المكتب تروح الشقه ولو عجبتك تعبي ابلكيشن ويشاورو المالك

وبصراحه انا ربي سخرلي صاحبة مكتب العقار بعد ما تعبت وانا ادور وورتني شقتي وساعتها كلمت المالك ورسيت عليا لو تبغى رقمها اعطيك هيا بس قولها انا تعبت وانا ادور وبدات تخلص فلوسي واديها قد ايش خصصت لايجار الشقه بس مثلا لو مخصص 2500 قولها 2100 ولو قالت مافي قولها حاوللي او خد موعد معاها من المكتب وقابلها

اما بالنسبه للجامعه انا في البدايه ما رضيو يعطوني الخطاب اللي يبين اني بديت دراسه يقولو لما تبداي لانو مو متعودين على نظامنا زي جامعة RMIT بس رحتلهم تاني مره وطبعت معايا ورق طبعتو من موقع الملحقيه "تلاقيه اول ما تدخل موقع الملحقيه فوق مكتوب معلومات للطلاب الجدد وفي نموذجين واحد خطاب من الملحق الثقافي وواحد نموذج كمثال لجامعه تانيه" المهم طبعتهم واخدتهم معايا لمكتب الطلاب الدوليين في المعهد وقلتلهم انو انا مره محتاجه الورقه لانو ما ينزل راتبي الا بالورقه واحتاج كمان استاجر شقه ووريتها الخطاب اللي من الملحق الثقافي وكلها دقيقتين والخطاب حقهم في يدي

انا جيت قبل الدراسه ب 10 ايام وافضل دا الشي لانو لسا حدور على سكن ولسا كمان تتعرف على البلد وتسوي اوراقك يعني من دا الكلام لانو المواعيد اغلبها وقت الكلاسات وياتغيب ياما تحضر الموعد ولو غبت مشكله مع الفيزا

انا عارفه اني اتكلمت كتير بس على الله انو يكون في شي مفيد

بالتوفيق

الله يعطيك العافيه يارب و يجزاك ألف خير

ما قصرتي على العمووم انا راح اراسلهم و اشوف وش وضعي وصلتهم أوراقي ولا المكتب يكذب علي

راسلهم على الايميل وحط معلوماتك كاملة كالتالي:
الاسم الأول:
الأسم الأخير:
تاريخ الميلاد:
رقم الجواز:
برنامج الدراسة المطلوب:
الترم اللي ترغب الالتحاق فيه:
سنة الالتحاق المطلوبة:

قدر الامكان كل ما وفرت المعلومة لهم كان ردهم أسرع وأطلب منهم رقم الطالب اللي هو Stdunt ID، على اساس تتابعهم معاهم من خلاله، وأطلب يرسلون نسخة من القبول على ايميلك.

والله يوفقك.


الأخت سها شكر على مجهوداتك بارك الله فيك، ولي رجعة بإذن الله

مشكووور اخووي AMAQ

لكن انا مقدم عن طريق مكتب لو ارسلت لهم من ايميلي راح يردون علي ولا يقولون توكل على الله بيانات سريه

او يغيرون الأيميل وبدال ما يرسلون للمكتب يرسلون لي و يضيع القبول بين ايميلي و ايميل المكتب

ما أعتقد أنهم يقولون لك انه المعلومات سرية خاصة إذا وضحت لهم أنك انت صاحب الطلب، ووضح أنك ودك تعرف الوضع الحالي لطلبك، وأن المكتب غير متجاوب معاك بشكل ممتاز، وأنك مستعجل على الطلب على اساس ما تلغى بعثتك وأنه المتكفل بدراستك محدد لك وقت للحصول على القبول، وإن شاء الله أمورك إلى خير.