استفسار لمن لديهم الخبرة في المعاهد

شكرا اختي نجمة وأيضا اخوانى الذين ردو على الموضوع

بالنسبة للمعاهد في أوكلاند

انا كلمت مكتب وقالي انه راح يحجزلي في معهد Worldwide School of English



وتواصل أيضا مع شخص ثاني في نيوزلاند في كرايست شريج وقال لي انا بكرة راح اجيبلك الموافقة بكرا في هذا المعهد

Garden City English School


في مدينة

Christchurch

وكان التواصل على الايميل وايضا على الجوال

وقال لي انك راح اخليك توفر مبلغ وقدرة ما بيل 4000 الى 5000 بدل ما يأخذها المكتب عليك

وانتى وش رايك في المعاهد هذى هل هي معتمدة من الملحقية

لانى احتمال ابي اقدم على الملحقية في برنامج الماجستير انشاء الله

بحيث الدراسة مكثفة وأيضا السكن مع عئلة وايضا التأمين الطبي والاستقبال في المطار

أنتظر ردك اختي العزيزة نجمة

مرحبا عزيزي...

اولا نصيحه قبل لا اتحدث عن كرايست شيرش
ابتعد عن المكاتب انـــــتــبـــــــــــــــــــــــــــة منها حاول تخلص امورك بنفسك او احنا نساعدك ان شاء الله
لكن لاتعتمد على المكاتب صدقني فقط للربح واذا خذوا منك الفلوس ارفسووك..

اخي كرايست شيرش ارى انها مناسبه جدا لك وجاردن ستي هذه معهد ممتاز لكن لااستطيع احكم عليه
لان يعتمد عليك انت شخصيا..

فانا افضل لك تذهب بنفسك بفيزة سائح وانت بنفسك راح يعطونك يوم بدون ماتدفع اي مبلغ وتدرس في المعهد اذا عجبك تدفع فلوس
وتكمل .. وميزتهم اكثر المعاهد بالستي وفيه كثير معاهد ممتازة

كذلك فيه معاهد رخيصه مثل باسفيك سكول بالستي...

ونصيحه لاتذهب اوكلاند لان الاكثريه العرب هناك ومن يقول غير الكلام هذه غير صحيح .. والدليل حتى المكاتب بالسعوديه

حينما تقول لهم اريد اذهب نيوزلندا اول وجهه لهم وكل تعاقداتهم مع معاهد اوكلاند ...

وتعتبر كرايست شيرش اقل بكثير .. ومفصولين لان المعاهد تجدها بالستي والجامعات خارج الستي وهذه يبعدك عن طلاب السعوديين بالجامعات

فانصحك بكرايست شيرش .. مع نصيحتي لك اذا راح تجي زائر راح تدخل وانت بنفسك تستطيع تختار المعاهد وراح تجدها بالسعر الارخص

أشكرك اااخوي عبدالعزيز


على مرورك

هلا اخوي حياك:

بالنسبه للمعاهد : انا درست في المعاهد المعتمده فقط وهذا كان اجباري للمبتعثين فالمعاهد اللي ذكرتها ماعندي تجربه فيها.

لكن مثل ما قال لك الاخ عبد العزيز انت بامكانك تجربة المعهد يوم دراسي قبل اتخاذ القرار في الاستمرار او التغيير والقبول مباشر متى مادفعت واحضرت الجواز.

اذا كنت حاب تجي عن طريق مكاتب : فانصحك تقدم عن طريق مكاتب السعوديين في نيوزلندا لانها مجانيه (وفوائهم يحصلون عليها من المعاهد والجامعات) وكذلك بما انهم سعوديين التواصل معهم بالعربي ونفس الشروط اللي تقدمها لمكاتب الرياض اشترطها هنا مثل : (الهوم ستاي ، استقبال المطار ، عائله كيويه لغتها الام انجليزيه، عائله ماعندها كلب ، لحم حلال ، ......)

انا عن نفسي جربت معهد : ELA في اوكلاند جدا ممتاز ولكنه غالي , معهد جامعة كانتربري في كرايست شرش، CCEL ،CPIT في كرايستشرش. كانت جميعها مفيده.

وانا حقيقه استغرب من الاخ عبد العزيز عندما ذكر ان اوكلاند مكتظه بالعرب(هل هو من باب التوقع او انه زار المدينه وسوا مقارنه مع كرايست شرش) فكل المدن الكبيره في نيوزلندا مليئه بالعرب والصينيين والجاليه السعوديه ثاني اكير جاليه في نيوزلندا الآن واوقفت مؤخرا جامعة كانتربري في كرايستشرش نظرا لتكدس الطلاب السعوديين فيها.

انا شخصيا انصح في اوكلاند لتعدد خيارات المعاهد مع التنافس في العروض وتوفر وسائل الترفيه فيها برا وبحرا وجوا (فالبحر في منتصف المدينه وتحديدا في نهاية شارع الكوين توجد المواني وتاكسي البحر لنقلك بين الجزر الاوكلنديه)

ثلث سكان نيوزلندا يعيشون في اوكلاند وهي اكبر مدينه في نيوزلندا.

اخي الكريم : انا انصحك اول ماتجي تجرب المعاهد وتختار بنفسك المعهد اللي يعجبك لاني ما اقدر انصحك بمعهد ماجربته وانا حتى على مستوى المعهد مااقدر اعمم انه ممتاز وبس لانه يعتمد على المدرس نفسه ففي معهد ELA كانت المدرستين : ريا ، وكريستي ممتازات بالمقابل درستني روز مره ما اعجبتني.لكن نظام المعهد كان حلو وعيبه غالي.

في معهد جامعة كانتربري درسني مدرس اسمه انتون مره مو كويس وبعده درستني روبن و سووو وكريستين(امريكيه) ممتازات جدا معهد CCEL درستني فيه مدرسه اسمها اندريا(بديطانيه) كانت ممتازه. يعني المعهد على المدرس فممكن يكون احد الشباب يمدح معهد لانه وفق بمدرس رائع والآخر يسب نفس المعهد لانه حظي بمدرس سيء.

وصولك لنيوزلندا وتحدثك مع الكيويين بحد ذاته مدرسه عندما تتعلم لغه الشارع تكون تعلمت جزءا كبير من اللغه التي تحتاجها في حياتك اليوميه.

اعذرني على الاطاله اردت لك المنفعه قدر المستطاع.

وبالتوفيق.

الله يوفقك ان شاء الله اخي الكريم وينولك مرادك

انصحك بمعهد

Rotorua English Language Academy

هذا موقعهم على الانترنت , بصراحه كنت موجود في هذي المدينه لمدة 4 أشهر, ولو الملحقيه تسمح لنا نكمل فيه كان كملت , بس عيب المدينه انها صغيره جدا بس ( يعني ممله) بس انه روتين فتره ووتعود عليه , مع انه المنطقه سياحيه فيها عيون طينيه واشياء حلوه - السكان الي اشوفه انه الماوريه كثار في المنطقه , ولو فكرة فيها فيه عائله محترمه اجيب لك رقمهم ,

موقعهم على الانترنت
Learn English New Zealand language school

أكثر المعاهد نفس الشي المهم هو انت كيف تذاكر

, انا صار لي 4 شهور خلال هذي المده بديت من المستوى الاول ووصلت الى المستوى الثالث . واحد من الي اعرفهم هنالك 3 شهور في أوكلند + 3 شهور في روتورا وبعده في المستوى الثاني والسبب الاهمال !

فقط نقطه واحده للتوضيح : احرص ثم احرص ان يكون اساتذه المعهد لغتهم الام هي الانجليزيه لانه يوجد معاهد تفاجيء بان المدرس صيني او ماليزي وهذا حدث لبعض الشباب وقد قرأت معاناة احد الشباب قبل فتره بانه اتى عن طريق مكتب وتفاجأ ان المدرس صيني والمعهد بكامله صينيين والطلاب كهول صينيين وكان يطلب منا المساعده لانه دفع كامل المبلغ والمعهد رفض استرداده له لانه كسر العقد من قبله.

وايضا مثل ماقال kingdiving هناك شباب لم يتقدم في اللغه والسبب الاهمال ،لا تتخيل ان المعهد سيعطيك ويعلمك كل شيء تقريبا تعلمت من المعهد 30٪ والباقي كان مجهودي الشخصي فكنت كل يوم احفظ مجموعه من الكلمات وابحث عن استخدماتها وقد اشتركت في منتديات انجلش فور عرب واستفدت كثيرا من خبرات الاساتذه في الموقع وكنت اكتب لهم تعبيري ويصححون لي اخطاءي النحويه.

أشكركم جميعا على الفائدة

انا توكلت على الله سبحانة

في معهد ورلدوليد بأوكلاند

والله يسسر كل أ/ر لنا ولكم جميعا

أنشاء الله راح تكون الرحلة تقريب في 16 سبتمبر

بس علمولى كم الوزن المحدد هل 30 كيلو ولا اقل

وكيف البرد الحيتن راح ولا باقي

تحياتي ولي رجعه

نعم القرار اخوي
اوكلاند مرره حلوه وزين سويت
والجو مرره مجنون ماتعرف له
يوم مطر يوم عادي بس اكثر شي الحين مطر يعني
والبرد مافي برد مرره يعني درجة الحراره تتراوح
من 8 الى 13 في الظهر
احيانا في الليل يعني لما توصل 8 انا بالنسبه ليي ابرد
مادري يمكن لاني مو متعود على جو ككذا
المهم معهدك في الكوين ادا ماخاب ظني صح ؟
عن سالفة الوزن صراحه مااخبر فيه
لكن ادا انك جاي مع مكتب المفروض يعلمك بكل شي
على العموم توصل بالسلامه اخي

حياك الله اخوي

بالنسبه للوزن لك ٢٠ كيلو فقط شحن و ٥ كيلو تحمله معاك داخل الطائره.

الشنطة المسموحه داخل الطائره حاول انك ماتحط فيها كريمات او عطورات او زيوت او اي شيء سائل يتجاوز وزنه ١٠٠ملل ، لانه يصادر امام عينيك في اقرب سلة نفايات.

كذلك الاكل احرص على المعلب واحرص على المصداقيه بمعنى لو جبت معاك بهارات وقهوه وتمر (في تعبئة ابليكيشن الطائره في خيار ان كان معاك اكل تكتب لهم نعم) واحرص ان يكون مكانه بارز في الشنطه لانهم راح يطلبون منك تعرضه لهم بصفه عامه ماقد صادروا لي شيء وكل الاكل دخلوه ماعدا حليب اولادي رموه في الزباله وكذلك كريم وزنه ١٢٥ملل صودر في مطار سنغافوره.

اما ٣٠ كيلو فهو للطلاب فقط الذين لديهم فيز دراسيه.

معلومة جديده جزاكي الله خير