اذا حايس ودايخ من حكاية الفيزا الامريكية...تفضــل ادخــل^^

November 1st, 2010, 10:19 PM

سلام عليكم

كيفكم ياجماعه...

عارف الكل متلخبط وحايس في حكاية الفيزا متى وكيف وفين ههههههه...

المهم من شويه كتبت رد لاحد المواضيع لخصت خطوات الفيزا بس طلع السائل مبتعث لكندا! هههههههههههههههه

وماني عارف هي الفيزا لكندا زي امريكا او لا...واعتقد لا والله اعلم...

قلت حرام بعد التعب امسح ردي كذا...خليني انزله في موضوع مع بعض الاضافات راجيا انه يفيد بعضكم ان شاء الله...

1. متى نطلع الفيزا ؟ وايش الاجراءات بالترتيب ؟
الملتقى شيلوه من تفكيركم يعني ما يفرق متى يكون...بالنسبة للفيزا حسبة تقريبية خذو موعد من 20 او 25 نوفمبر وطالع عشان يكون القبول ان شاء الله وصلكم....لانه القبول فيه رقم السيفس اللي لازم يكون معاكم في السفاره لما تطلعو فيزا...انت الان عشان تطلع فيزا كذا الخطوات اللي تحتاجها بالزبط :
1- تعبي ابلكيشن ds-160 >> السبب عشان تاخذ رقم تاكيد الطلب بعد ماتسوي الابلكيشن >> السبب عشان رقم 2
2- تاخذ موعد في السفارة >> تحتاج تحط رقم الطلب وتاخذ الموعد
3- رسوم السيفس والاي توني مو لازم تسددها الان حتى لو قبل موعدك في السفاره بيوم ماحتحتاج تسددهم قبل كذا

ملاحظات مهمه:
1- لما تعبي الابلكيشن ds-160 في خانة عن السيفس..والسيفس ماهو عندك..فتحط مكانه N0000000000 (حرف ان و عشره اصفار)...و أي معلومات زي اسم المعهد وعنوانه في امريكا حط none... اخر شي قبل ماترسل الابلكيشن في الموقع سويلو حفظ وخليه عندك على الكمبيوتر...عشان لما يجيك السيفس تكون حافظه وبس تعدل رقم السيفس وعنوان المعهد...وترسلهم ابلكيشن جديد...
وطبعا بناء على ارسالك لابلكيشن جديد معناته تغير عندك رقم تاكيد الطلب اللي حطيناه في السيفس...الحل في رقم 2 الفقرة التالية
2- ترجع لموقع السفاره...تدخل بيوزرك والباسوورد حقك...وتروح لتغيير المعلومات الشخصية...وتعدل رقم الطلب وتضغط موافق...وخلاص (طريقة شرح تغيير رقم الطلب تحت)
3- افرض جا وقت المقابلة لا جاك القبول ولا شي؟؟؟ بسيطه...يحق لك تأجيل موعدك مرتين... بشرط يكون قبلها بيومين
4- افرض اجلت مرتين وبرضو ماوصلني قبول ولا شي...ولا حاجه..تدفع 45 ريال من جديد وتاخذ موعد جديد وبرضو يحق لك تاجيل مرتين ونفس حكاية اول...
5- لما تعمل حفظ للابلكيشن ينحفظ على شكل ملف امتداده *DAT*
هذا الملف ماتمسحه ابدا لانه هو اللي عليه بيانات الابلكيشن حقك اللي راح ترجع تعدله لما يوصلك القبول وتكمل بياناتك


* بالنسبة لخطوات تعديل رقم الطلب في موقع السفارة :

1- تدخل على موقع السفاره https://ksa.us-visaservices.com/Form...viceLogin.aspx
تدخل باليوزر تبعك اللي سجلت بيه

2- تلقى مكتوب *تغيير معلومات الشخصية*


3- تلقى كلمة *تغيير* اضغط عليها

4- تطلعلك بياناتك روح للجزء حق معلومات جواز السفر تلقى الخانة *رقم تأكيد طلب التأشيرة : DS-160*


عدله واضغط *احفظ التغييرات*








2. (خاص بالماستر) هل ابدا اراسل الجامعات إلي في بالي و إلا أستنى إلى ما اخلص اللغة؟
انت ماتحتاج تراسل الجامعات...انت تحتاج تشوف شروط الجامعات ايش هي...زي الدرجة المطلوبة من التوفل او اختبار الايلتس او الجيمات...وبعدين خلال فترة دراستك لما تحس انك سرت كويس او تحب تجرب مستواك ادخل اختبر...لما تجيب الدرجات المطلوبة وتحقق شروطها تراسلهم وتعبي ابلكيشن التقديم عندهم...خلال سنة اللغة تدرس وتدرس وتختبر توفل او ايلتس او الجيمات (على حسب متطلبات الجامعة)...ولما تحقق الشروط تراسلهم وان شاء الله يجيك قبول منهم...بس اهم شي تجيب القبول قبل انتهاء مدة اللغة...
نقطه مهمه لازم تتاكد انه الجامعة اللي بتراسلها تكون معترف بها (موصى بها) من قبل الوزارة








نصيحه قبل ماتبدا الاجراءات نزل الملف هذا للأخ kewl الله يجزاه خير
لانه مفيد جدا...وحيفهمك كيف تحفظ الابلكيشن وكيف تسجل كل شي خطوه بخطوة معاك
غير الاسئلة الشائعه والشروحات اللي فيه...صراحه عمل ضخم...
http://www.mbt3th.us/vb/forum134/thread226861.html

هذا كمان موضوع جدا مهم يشرح طريقة رفع صورة الفيزا للابلكيشن الله يجزي كاتبه بالخير
http://www.mbt3th.us/vb/forum16/thread159200.html






اتمنى اكون وفقت في تلخيص خطوات واجراءات وبعض التوضيحات التي كان من الأولى ان تشرحها الوزارة وتبينها لنا كمبتعثين..

وماتسيبنا نترقع يمين وشمال هههههههه..لكن الشكوى لله...

المشكله حتى لما نسألهم...اجوبتهم ماتشفي القلب خخخخخ

اتمنى اذا اخطات في اي شي ان تصححوني عادي...


بالتوفيـق لكـم جميعـا...ودعواااااااتكـم بكـل خيـر....

• نشر عبر تويتر
• نشر عبر فيسبوك
• نشر عبر جوجل