تم تقديم موعدي بالسفاره اليكم طريقتي ( مهم لمن يريد حجز موعد )

May 20th, 2010, 02:16 AM

السلام عليكم ورحمة الله وبركاته

اخواني حبيت افيدكم بطريقتي اللي سويتها وحجزت موعد

الاحد القادم 23/5/2010

اولا موعد دراستي 30/6/2010
و I-20 ماوصلني الا يوم 9/5/2010 وكان وقتها ماعندي وقت نهائياً يعني 50 يوم على موعد الدراسه
وكان ببالي اني خلاص راحت علي

دخلت الموقع هذا وكنت وقتها خايف مدري وش اسوي ولا ادري وين اروح

دخلت القسم هذا وبديت اقراء مواضيع القسم واشوف المشاكل وحلها
وكنت حاط يدي على قلبي واقول والله مايمديني كيف اسوي ووش اسوي

اتصلت على واحد بالوزاره قالي بسرعه الحق نفسك دور مكتب يضبط امورك

صراحه بيني وبينكم خفت من المكاتب وواضح المشاكل هنا اللي عبو النموذج غلط واللي موعده متأخر وامور كثيره

قلت مالي الا اجازف

بديت اسجل نموذج DS-160 وشرحه موجود بالقسم وجزاء الله خير على من عمله

كان النموذج صعب جداً علي قعدي اسجل النموذج من الساعه 12 بالليل ولا خلصت الا الساعه 6 الفجر

وكل خطوه كنت احفظها عشان مايصير فيه غلط

ونقصني الصوره ورحت من بكره اصور واضبط اموري ورجعت كملت النموذج وخلصته

وبعدين رحت اسدد السيفيس عن طريق فيزه صديقي طبعاً بعد ماقعد يومين وانا احول له واحاول احط مبلغ بفيزته عشان اسجل

والحمدلله سددت السيفيس وبعدين رحت سددت التأشيره من بنك سامبا

وبعدين رحت اسجل بالسفاره عشان احجز موعد والحمدلله سددت رسوم العضويه
وسجلت موعد وكان في 13/6/2010

يعني مايمديني نهائياً وكنت فاقد الامل بعد كل اللي سويته

لكن سويت امر طارئ وقربو موعدي بعد ماوضحت لهم ان دراستي في 30/6/2010

وخلو موعدي في 30/5/2010

المهم كنت خلاص مالي الا انتظر

وكل يوم اقراء بالمواضيع واتابع الاجرائات عشان يكون عندي معرفه بكل شي

المهم سجلت بقروب فيه ناس بيروحون اوهايو الولايه اللي بروح لها

وقمت اسولف معهم وعلمتهم بسالفتي

ردت علي وحده الله يجزاها خير وقالت لي طريقه اقدر اقرب موعدي اكثر وجربتها والحمدلله حجزت موعد بتاريخ 23/5/2010

الطريقه يا اخواني هي

سجلت بعضويه جديده في السفاره وكانت بأسم اخوي وهو اصلا مو رايح بس عشان ادخل على صفحة المواعيد
طبعاً خسرت 45 ريال عشان العضويه بس مايهم في سبيل اني اقدم موعدي

وجلست كل يوم اراقب المواعيد ابي اي موعد بشهر مايو 5
الحمدلله قبل شوي لقيت موعد في 23/5/2010 كنت صراحه ماني مصدق ومن الحرص اناظر بجوالي التاريخ صحيح او لا

على طول حجزت الموعد

بعدين جبت كمبيوتر ثاني عشان ادخل بعضويتي الرئيسيه اللي بروح فيها للسفاره وبياناتي فيها صحيحه
وموعدها هو 30/5/2010

قمت كنسلت الموعد تمام

وبعدين رحت لعضويه اخوي وكنسلت موعده اللي هو 23/5/2010

وعلى طول بعضويتي حجزت الموعد

وهذي هي الطريقه

لازم تكون سريع عشان مايروح موعدك

سبب فتح عضويه ثانيه هو عشان تشوف جدول المواعيد وتقتنص موعد قريب
لان فيه ناس تكنسل مواعيدها فلازم تكون متجهز والافضل تشيك كل ساعه


اسف على الاطاله بس ما ابي احد يفقد الامل

بالتوفيق

• نشر عبر تويتر
• نشر عبر فيسبوك
• نشر عبر جوجل