تأخير إستصدار قرار الابتعاث وتأجيل السفر.. توضيحـــات

November 27th, 2013, 08:30 PM

1- الموضوع مُحدٓث
2- يهم شريحة كبيرة من طلاب التاسعة والاسئلة تكثر حوله
3- أتمنى مايُحذف من منتدى التاسعة زي غيره من المواضيع المُختلف في مناسبتها للمقام
4- شكراً لعدم الحذف



بدأت الاسئلة تكثر عن موضوع ضرورة السفر خلال فترة معينه او ان الوزاره حتتخذ اجراءاتها الي البعض يعتقد انها حتوصل للحرمان من البعثة. رغم اننا جاوبنا على الكثير منها بالتفصيل في مواضيع مختلفه ولكن اهمية إفراد موضوع خاص صار حتمي بحكم ان الاجابات تضيع في صفحات المواضيع من غير مايطلع عليها الكثير.

الكثير يسألوا ( هل نقدر نأجل البعثة) لأن الكثير يشوف زحمة الطلاب تخلص امورها ..والبعض من الاساس ناوي يطلع متأخر لغرض ما مخطط له او لظروف معينة زي الي تبغى تعرس او الي تنتظر محرمها يخلص دراسة او الي يبغوا يحضرو اختبارات القبول من هنا أو أو أو.. وعلشان كذا لازم الكل يكون على احاطة بالوضع وحقيقة الي يحصل...

اول هام لازم يتعرف انو مافي شي اسمو تأجيل البعثة (من حيث الاجراء) ولكن فيه التأخير في استصدار قرار الابتعاث والي بالنتيجة حيأخر موضوع السفر وتغيير حالتك من كونك مرشح للبعثة الى مبتعث (مختوم على قفاك ختم مبتعث).. ثاني هام أنو الوزارة وخلال الملتقيات وموقعها وتصريح مسؤوليها يحثوا كل الطلاب على اصدار قرار الابتعاث والسفر خلال الثلاث اشهر الجايه وموضة السنة هي الاشاعات انو الناس لازم تسافر
خلال 3 اشهر من اصدار "الضمان المالي"

هدف الوزارة انها تضمن سفر اكبر عدد من الطلاب خلال هذي الفترة لآسباب تنظيمية لااقل ولااكثر..وبالتالي هي "تهدد" وتصرح وتأكد من الوقت للثاني بضرورة السفر ع السريع لأنو هذا الي تقدر عليه وبــــــــــــس.. الي حاصل واقعاً أنو الطلاب وبإختلاف ظروفهم فيهم يصدرو على قرار الابتعاث ويسافرو على اواخر 2014..كلام مسؤلي الابرنامج أنو اي طالب يتأخر عن السفر الى بعد سبتمبر فوضعو يصعب ولو يبغى يصدر بعدها قرار ابتعاث فيه لجنة تدرس الوضع و مايوافقوا الا على الشديد القوي وهذا كلام مأخوذ خيره وحقك في البعثة هو هو ومافي اجراء عندهم يلغي احقيتك في الابتعاث.

طلاب من المراحل السابقه قدرو انهم يسافرو بعد ترشيحهم النهائي بأكثر من سنة وبعضهم سنة ونص وأكثر وهذا دليل أنو مافي شي يخلي الوزارة تلغي احقية احد في البعثة الا (بتنازل) المرشح نفسه عنها فضلاً عن نقطة انو ماقد سمعنا بحاله تم حرمانها وسحب حق الترشيح النهائي منها بسبب التأخير في السفر.. مُحدثكم من المرحلة الثامنة ولسا ماسافرت وقدامي 3 اشهر علبال مااسافر.


الكثير عندهم ظروف وخطط وترتيبات ماتتحمل السفر قبل شهر 3 مثلاً ولهم نقول : خليكم متطمنين انو بعد ماي وحتى سبتمبر تقدرو تصدرو قرار الابتعاث وتسافرو وعين الله عليكم وانو كلام الوزارة مو اكثر من مجرد حث على السفر المبكر من غير صلاحية الغاء بعثة.

نجي لقرار الابتعاث.. قرار الابتعاث : هو اخر خطوة تأكد أحقيتكم للبعثة والنقطة الي تتحول منها من مرشح الى مبتعث بقرار رسمي. بعد اصدار القرار فيكم تكملوا اجراء استصدار أمر الاركاب الي بعدو ع طول فيكم تصدروا التذاكر ومافي شي اسمو أنكم تصدروا التذاكر بضمان مالي او غيرو. نجي للتفاصيل الخاصة بالقرار وهي واضحة من الاساس ولكن الكثير ستل يشوفها (معقده) .. اول هام هي مدة القرار وهي مقررة ب3 اشهر من الاصدار وهذا معناته أنو لازمكم تسافروا لبلد ابتعاثكم خلالها بحيث انكم تنسقوا موعد وصولكم ماخذين بالاعتبار انو مايكون قبل بداية الدراسة (بما فيها الاورينتيشن ) بأكثر من شهر.. موعد اصدار قرار الابتعاث فيه يكون قبل موعد دراستكم بكم يوم وفيه يكون قبلها ب30 يوم ماتفرق لما توصلوا لهناك وماحيتغير بالموضوع شي.. وصولكم لهناك واستكمال مستندات فتح الملف (تتطلب قرار الابتعاث) هو اول يوم محسوب في الصرف..

مثال : طالب-ه يبدأ او تبدأ الدراسة ب5-مايو مثلاً فيه انو يسافر الى هناك من 5-ابريل وطالع وفيه يصدر قرار الابتعاث من 5-جانيوري وطالع
مع العلم أنو السفر قبل الدراسة بشهر يعني انو هذا الشهر محسوب ضمن فترة بعثتكم لأنو الاصل انو عدد ايام البعثة هي عملياً الايام الي تصرف عليكم الوزارة ومو ايام الدراسة زي مايتصور البعض .. نقطة يغفلها الكثير انو قرار الابتعاث اذا تصدر وماسافرتوا خلال 3 اشهر فحتنتهي صلاحيته وفيكم تعيدوا الاصدار ل3شهور ثانية لمرة واحدة بس.

الأخ السائل، اتمنى قراءة الموضوع جيداً قبل طرح السؤال وإن كان الجواب في ثنايا الموضوع اعتذر عن الرد.

• نشر عبر تويتر
• نشر عبر فيسبوك
• نشر عبر جوجل