تقرير يوميات مبتعث لفلاق ستاف (طآزه) خخخخخ

السسسسسسسسسسلام عليكم ورحمة الله وبركاته
يالله حيهم ويالله حيني بينهم

كيفكم بشرونا عنكم عسى اموركم ان شاء الله طيبه
احس اني مبطي ماكتبت شي ومانزف قلمي<<طيبين ان شاء الله

الانسان دائما يمر بمواقف يمكن في وقتها ينقهر وتقفل اخلاقه وقد تكون محرجة وقد تكون مكلفه او متعبه أو أو أو.... الخ
ولكن بعد فتره يتذكرها يقعد يضحك وينسى همه

طبعا فيه مواقف لاشخاص حصلت هاليومين واتمنى مايزعلون علي اني بكتبها هنا لكنها للفايده عموما ..






طبعا عشان تكونون في الصورة وتفهمون اللي حاصل من البداية
انا ياطويلين العمر منزل موضوع ثاني وقلت اني مستعد اخدم الطلاب الجدد يعني استقبلهم في المطار واشوف لهم سكن وكذا
المهم طبعا حطيت ايميلي وحطيت رقمي يعني اسهل للتواصل وكذا
وزي ماذكرت سابقا انه في ناس مايستاهلون وكويس انه بان معدنهم الدنيء قبل ماعرفهم وهذا من فضل الله عشان نحذر منهم.
وفيه ناس ينحطون على العين والراس والواحد يخدمهم بعيونه وبكل اريحيه.

المهم فيه اثنين من الشباب صراحه تحفه الله يحفظهم واسف ياشباب اني بكتب عنكم هههههه

طبعا هم يعرفون بعض واخوياء من السعوديه لكن رحلاتهم تختلف
المهم وصلو واشنطن الحمدلله على خير
لما وصلو واشنطن كان الاجراء المعتاد انك اول ماتوصل توقف على المسار وينادونك ويختمون جوازك ويدبسون فيه ورقة بيضاء ويصورونك ويخلونك تبصم وكذا وعقب تروح تاخذ شناطك وبعد كذا يدخلونك في صالة المقريشن وتقعد فيها على حسب يمكن ساعه يمكن ثنتين يمكن ثلاث اقل او اكثر حسب مزاجهم وبعد كذا يقولون لك توكل على الله وتطلع وتلقى سواق الملحقية وصلى الله وسلم.

لكن الشباب هذول وغيرهم قالو لي ان الاجراءات زي ماهي لكن الفرق انه خلاص لااخذت شناطك مايحتاج يدخلونك الصاله ويجلسونك كم ساعه خلاص تغير الوضع صار تاخذ شناطك وتطلع برا على طول
هذي نقطه كويسه الصراحه انه خلاص ماعاد فيه انتظار وحرق اعصاب وان شاء الله انهم يستمرون على كذا على طول بدل التعقيد والنكد اللي كان اول.
المهم الاول فيهم اللي كانت رحلته بدري وراح المطار وتوكل على الله والحمدلله اموره كانت تساهيل وراح لفينيكس وبعد فينيكس توجه لفلاقستاف
يوم وصل لفلاقستاف دق علي ومارديت لاني كنت نايم
هم يوم وصلو مابلغوني متى رحلتهم ومتى بيوصلون لفلاقستاف واي وقت والا كان حسبت حسابي
هم الصراحه علموني يوم كانو في السعوديه متى رحلتهم وكذا لكني كنت ناسي والله وماجت على بالي ابد وبرضو هم ماذكروني ولاعلموني متى وصولهم بالضبط
المهم الاخ يتصل ويتصل وانا نايم ماادري عنه ههههه
ومن سوء حظهم ان اليوم اللي وصلو فيه كان بررررررررد مع اننا تونا دخلنا الصيف وكان اليوم اللي قبله مطر وثلوج ههههه
ف ارسل لي رساله يقول تراني وصلت فلاقستاف بتجي والا لا ترى برد << حسبته بيطقني ههههههههههههه
والله اني رحمته مسيكين هههههههه
يوم صحيت على الساعه يمكن خمس شفت الرساله دقيت عليه قلت له والله العذر والسموحه مادريت انكم وصلتو وكذا هههههه
المهم انه يوم شافني مارديت خذا تكسي وراح اخذ له موتيل والحمدلله مشت اموره .


خويه الثاني سالفته سالفه
اخونا في الله يوم وصل واشنطن وخذا شناطه وطلع للصاله كان لابس شورت وقرر انه يغير ملابسه
ف يعني تخيلو المنظر معه شناط ومعه كرتون صغير نوعا ما وفيه اغراضه والكرتون ملفوف بشطرطون (شريط لاصق للي مايتكلمون نجدي هههههه ) ولونه بني طبعا وشكله صراحه يخوف شوي يعني مشكوك في امره ههههه
المهم اخونا حط الكرتون فوق الشنط وخلى الشنط قريبة من الحمام الله يكرمكم ودخل الحمام عشان يغير ملابسه

طبعا تصورو الموقف
شنط وكرتون شكله شبهه وفي نص المطار وماعنده أحد !! ههههه
المهم جو شرطة المطار ووخروا الناس وقوموا الناس اللي كانت جالسه على الكراسي وابعدو الناس عن المنطقه
المهم خوينا يوم طلع من الحمام شاف شرطه متجمعين وشناطه بالحالهم في النص وماعندهم احد ف قال لشرطية هذي شناطي ونادت المسؤول وقالت هذا صاحب الشنط
جاه المسؤول زي اللي يقول له سلامات يبوي خير ان شاء الله شفيك مخلي شناطك هنا وشكلها شبهه الصراحه ههههه
المهم خوينا يقول له سوري معليش ماكنت ادري بس اني دخلت الحمام وكذا ودخلت اغير ملابسي
عاد الشرطي زي اللي يقول له يبوي روعت العالم هههههههه
المهم سأله الشرطي قال له الحين بمطاراتكم في السعوديه تسوون كذا تخلون شناطكم وتروحون عنها
قال له خوينا ..... تبي الصدق اي والله نسويها هههههههه
وفعلا تدخل مطار الملك خالد تشوف شنط ماعندها احد وتشوف ناس تدخن وتشوف اللي منسدح واللي مدري وش يسوي...
المهم قاله الشرطي اني رحت السعوديه وماشفت زي كذا بالعكس كل واحد شنطته معه ومحد يخلي شناطه ويروح ... طبعا متاكد ان العسكري نصاب هههه
المهم خوينا سكت وقال سوري وكذا وتعذر ... ف قال له العسكري شنطك معك وين مارحت تروح معك لاتتركها ابدا ابدا
قال له خوينا طيب وراح خذا له عربية بثلاثة دولار وحط شناطه يقول والله اني دخلت بالعربية الحمام ودخلت الحمام الوسيع حق المعاقين فيها ههههههه


وهذي سالفة خوينا اللي خلى الشنط هههههه
العبره ياجماعة الخير انتبهو لشناطكم لاتبعدون عنها عشان ماتجيبون لنفسكم شبهات..



الشي الثاني كلهم لابتوباتهم خربت !!
يقولون كانت تشتغل زي الحلاوة بس يوم دخلو المطار مدري اي مطار بالضبط شغلو لابتوباتهم ودخلو من الوايرلس حق المطار وفجأه وبلامقدمات طفت لابتوباتهم !
شغلوها من جديد طلعت لهم شاشة زرقا مدري سودا وفيها رسالة خطا
الظاهر فيه ملف من الويندوز انحذف او مدري وش صار بالضبط
عاد يوم وصلو هنا ودينا لابتوبتهم عند حقين الكمبيوترات في الجامعه وان شاء الله يوم الاثنين نشوف وش يقولون وان شاء الله انها تزين ..

لذلك احتياطا حاولو ماتشغلون لابتوباتكم في المطار ك نوع من الاحتياط انا ماادري وش السبب يمكن البلا من كمبيوتراتهم او من الشبكه اللي استخدموها ...


اذا فيه احد حصل له موقف ووده يطرحه يتفضل خلونا نستفيد من تجاربكم

تحياتي لكم
الى اللقاء في موقف آخر

نورتو ....

هههههههههههههههههههههههههههههههاي الزبده ربعك فله هههههههههههههههههههاي

الإخوة الأعـزاء متابعين يوميات مبتعث لفلاق ستاف

السلام عليكم ورحمه الله وبركاته ،،
تحيه طيبه وبعد ،،

فإننا مأمورون شرعاً وعقلاً أن نقول ( للمـحـسـن أحـسـنـت و للـمـسـيء أسـأت )
فأخونا ( رجهـ بس رزهـ ) أحسن لكل واحد تابع يوميات مبتعث لفلاق ستاف فمن الـواجـب علينا أن نقول له ألف مليون شـكـر على كل شيء بذلته معنا .

حيث أنك نورت لنا الطريق المظلم ، وطمأنت قلوبنا الخائفة ، وأجبت على أسئلتنا المتكررة ، وفرغت لنا الكثير من وقتك ، واستعديت بتقديم المساعدة لكل شخص ،
وتجاوبت معنا بكل رحابه صدر .

فكان حقاً علينا أم نقول لك أحـسـنـت أحـسـنـت أحـسـنـت ولك منا جزيل الشكر والعرفان والامتنان .

فكما تعرفون قصه الصحابي الجليل عبدالله بن حذافه عندما وقع أسيراً في أيدي الروم في إحدى الغزوات ، فحمله الجنود إلى ملك الروم قفال له إني أعرض عليك أن تتنصر فرد عليه قائلاً هيهات إن الموت أحب إلى مما تدعوني إليه ، فعرض عليه أن يعطيه نصف ماله فقال والله لو أعطيتني جميع ما تملك وجميع ما ملكته العرب على أن أرجع عن دين محمد طرفه عين ما فعلت قال الملك إذن أقتلك . فأمربه فصلب , وقال : للرماة : ارموه قريبا من يديه قريبا من رجليه و هو يعرض عليه – أن يتنصر - و هو يأبى , ثم أمر به فأنزل ثم أمر بقدر يغلي فيه الماء حتى يفور ثم دعا بأسيرين من المسلمين فأمر بأحدهما فألقي في القدر و هو يعرض عليه النصرانية و هو يأبى ثم أمر به أن يلقى في القدر فلما ذهب به بكى فقيل له : إنه بكى فظن أنه رجع فقال : ردوه فعرض عليه النصرانية فأبى .
قال : فما أبكاك إذا ؟ قال : لا ترى أني بكيت جزعا مما تريد أن تصنع بي , ولكني بكيت حيث ليس لي إلا نفس واحدة يفعل بها هذا في الله , كنت أحب أن يكون لي من الأنفس عدد شعر جسمي ثم تسلط علي فتفعل بي هذا .

فأعجب منه : وأحب أن يطلقه فقال : هل لك أن تقبل رأسي و أخلي عنك ؟ قال عبد الله و عن جميع أسارى المسلمين ؟؟ قال : وعن جميع أسارى المسلمين . قال عبدالله : فقلت في نفسي عدو من أعداء الله أقبل رأسه يخلي عني و عن أسارى المسلمين لاأبالي فدنا منه و قبل رأسه فدفع إليه الأساري فقدم بهم على عمر بن الخطاب فأخبر عمر خبره فقال عمر : حق على كل مسلم أن يقبل رأس عبد الله بن حذافة و أنا أبدأ فقام عمر فقبل رأسه .

فالشاهد من القصة أن عمر بن الخطاب رضي الله عنه قبل رأس الصحابي الجليل عبدالله بن حذافه لقوة إيمانه و لفعله البطولي ومساعدته إخوانه المسلين وبسببه فرج الله عن إخوانه المسلمين ، وليكن لنا في صحابه رسول الله صلى الله عليه وسلم القدوة الحسنة .

فلفعل أخونا ( رجهـ بس رزهـ ) البطولي مع إخوانه المبتعثين و المبتعثات ومساعدته لهم فإنه من الـواجـب على كل شخص قراء يوميات مبتعث لفلاق ستاف واستفاد منها أن يقبل رأس أخونا ( رجهـ بس رزهـ ) وان شاء الله أول ما أوصل إلى فلاق ستاف سوف أقبل رأس أخونا ( رجهـ بس رزهـ ) .




فأنا لا أقول هذا الكلام مجامله ولا أريد من ورائه شيء ولكن لنكون منصفين وحقانيين ونشجع صاحب الفعل الطيب والعمل النبيل .

وفي الختام أقول لأخي ( رجهـ بس رزهـ ) استمر على ما أنت عليه وستجد ثمره ذلك إن شاء الله في الدنيا قبل الاخره ففي الحديث قال الرسول صلى الله عليه وسلم ( من فرج عن مسلم كربه في الدنيا فرج الله عنه كربه من كرب يوم القيامة ، والله في عون العبد ما دام العبد في عون أخيه ) وفي الحديث ايضاً قال الرسول صلى الله عليه وسلم ( خير الناس أنفعهم للناس ) .

وكما قال الشاعر :
ما يـنـفـع الـرجـال يـاكـود ثـنـتـيـن . . . . . . . . . . صـبـره عـلـى هـمـه وطـيـبـه مـع الـنـاس

وكما قال المثل :
خـدمـة الـخــوي شــرف

وأخير اً إسمحلي ومن بعد إذنك أن أغير اسمك من ( رجهـ بس رزهـ ) إلى ( الجمعية الإنسانية السعودية لمساعدة المبتعثين والمبتعثات في فلاق ستاف ) .
تأسست الجمعية في 17 / 8 / 2010 وتعتبر أول جمعية إنسانية سعودية في فلاق ستاف تهتم بتساؤلات المبتعثين و هدفها الأساسي مساعدة الطلاب المبتعثين وتقديم الاستشارات لهم ، عدد أعضاء الجمعية 1000 عضو وكلهم داخل جسم واحد و يديره عقل واحد ، تتلقى الجمعية الدعم من دعاء المبتعثين والمبتعثات .

وآآآسف جداً على الإطالة وتقبلوا خالص تحياتي ،،،

أخوكم :
المهندس فيصل القحطاني

فيصل القحطاني كلام كبييييييييييييييييييييييييييييييييييير

السلام عليكم

كان ودي أرد من زمان لكن جهازي من وصلت فلاغستاف وهو خربان والحمدلله صلحناه الان والفضل بعد الله يعود لاخوي رجه
مازود على كلام صالح والله يعزك يبو العز وما قصرت أدري تشكرناك واجد بس شفت الواجب أشكرك هنا برضو

مع تحيات راعي الشنطة والكرتون في المطار

اتمنى لك التوفيق والله يجزاك خير وياليت فيه 10 مثلك وياليت واحد يكون ساكن في سبوكان ويروي قصته ويجاوب على كل الاسئلة بصدر رحب مثل ما انت تسوي

بيض الله وجهك والله يكثر من امثالك , لاتنسى تدعيلي ان الله يوفقني .

الف شكر انا متابعك رد رد الى اخر رد

بالتوفيق لك ولأخوك ولكل المبتعثين السعوديين والسعوديات وان شاء الله نرجع نرفع راس الاهل وراس ابو متعب واهم شيء حب الوطن .

من متابعين اليوميات - استفدت كثير من كتاباتك وتكلمت عن اشياء مره مهمه وتهم كل المبعثين مو شرط اللي بفلاق ستاف بس - جزاك الله خير وربي يعطيك على قد نيتك

الله يوفقك آخوي رجة بس رزهـ ..

آخوي بيطلع لـ لوس آنجلس وأقول له شوف موضوع رجة .. وتعلم كيف تدبّر نفسك .. هنآك نادر ماتحصل أحد يساعدك ..

الله يسعدك وين ماكنت ..


آحترامي ..