نصيحة لوجه الله ابعدو عن معهد امباسي اللي بسياتل - تاكوما Embassy CES

كل الشكر لك اخوي على التنويه والتنبيه
ومعهد امباسي معهد تعبان وسيء لأبعد الحدود حتى عندنا في سان دييغو
وياريت اخوي تذكر لنا اسم معهدك وموقعه حتى يستفيد منه الكثير من الطلاب

أخووي أنـآآ بجيب قبوول من سياتل فمـآ أدري وش المعهد الزين والجامعه الزينه ..| يقولون جب قبول من معهد تابع للجامعه ..



وياليت أخووي تفيدني .. أنـآ مـآ أعرف شي .. وأنت مجرب وتعرف ..


أفدني لآ هنت وعطني أسم المعهد الزين والجامعه .. بحيث انظم للبعثه بدون تعقيد ..

للعلم اخوي شانيل ترا المديرة مره درستنا اسبوع كامل خخخخخخخخ

المعهد نزلنا عنه مواضيع قبل والله بحل يامعهد العالمية ونيوهرايزن المعهد يعتبر حق سياح ووناسه دراسة جدية مافيه سستم واضح وصريح مافيه والله كل الأمور ماشيه على البركة ضيعت خمس شهور من عمري في معهد ما عطاني فائدة ولا 10% .

شانيل جايكم بمشيئة الله وياليت تعطينا وش وضع معهدك الحالي وطريقة المستوايات .

معهد ع البركه ,,

الله يعين بس وننقل منه بافرب فرصه ,,

هين ما أعرف واحد دخل ها المعهد و مدحه ، لا هو و لا معهد ELS

وين الملحقية عن ها الكلام ؟؟؟؟ و إذا يبغى الواحد يحول لأي معهد قالوا تكدس و ممنوع....

مع التحية لملحقيتنا

ودعتكم الله

اختي شانيل

الله يعين والله مشكله من بدايتها كذا ،، طيب انا جايه مع زوجي بعد 25 يوم لـ تكوما ممكن نغير المعهد بعد شهر من الدراسه والا صعب وهل فيه مرونه للتغير المعهد عن طريق الملحقيه

وعندي كذا استفسار

كيف وضع المدينه حلوه والا كئيبه ، والامان ، والحضانه ، والسكن ، وجوها الان

تحياتي

شانيل الله يعافيك ممكن رقمك على الخاص

عدنا من جديد
نجي للدراسة
بمعهد امباسي الدراسة تبدأ من 8 وتنتهي 2:30
ووقت الصيفية يجون طلاب صيفية ويروح المعهد في امها
يقسمون الدوام فترتين لان مافيه مدرسين كفاية ويحبون يفرون
يعني الشغلة تجميع وبس ..
التسجيل عندهم لو تبي بنص الترم ماعندهم مشكلة يسجلونك
المهم ورهم ضمانك او فلوسك قبل وجهك ..
الداوم في امباسي من صباح لحد 12 يدرسون فيها كتابين بس جامعة اللسننج والسبيكين والرايتنق والريدينق
وهالكتابين لها 2 من المدرسين كل واحد يجي منها ساعيين
بعد فترة الغداء يبدا بما يسمى اللاكتف ..
على قولتهم يعلمونك في اماكن الضعف عندك مثل الرايتنج والنطق والقرامر
اذكر اني اخترت القرامر وجلسنا ترم كامل على المضارع البسيط وعلى in - on- at
كل اسبوع يجينا مدرس غير الاسبوع اللي فات ويعيده علينا
الواجبات في امباسي : كنت وقتها الاقي وقت اكتب واجبي والعب واكلم اهلي واخوياي لانها بصراحة اعتبرها كلام فاضي

في معهدنا الحالي
التسجيل كل ترم دراسي ومافيه شي بوسط الترم
سمعت حاليا انهم راح يقفون تسجيل السعوديين لانهم صاروا تقريبا كثير بس هالشي مايمنع اني اقول ان المعهد ممتاز
كتابين بس جامعة اللسننج والسبيكين والرايتنق والريدينق ولكن كل قسم له مدرس خاص فيه
يعني الريدينق مدرس مستقل عن الرايتنق ومستقل عن اللسننق والسبيكنق
كتاب للقرامر وحصة رسمية ولها مدرس خاص " مدرستي عندها شهادة ماجستير في القرامر "
دوامنا من الساعة 9:15 - 2:30 فيها بريك ساعة للغداء
كلااسات مختلفة كل يوم
تشدد في الحضور والغياب والتأخير " حتى لو خمس دقايق "
واجبات وش كثرها
يعني بالامانة احيانا تكره نفسك من كثرها " بس هذي افضل طريقة للتعلم "
ومنها شي من الكتب وشي من خارج الكتاب
مثلا الرايتنج اسبوعيا يكلفونك تكتب عن اي شي مرتين او ثلاث مرات
هذا من غير اللي تكتبه في الفصل ..
الريدنج : تقرا قصة اسبوعيا من المكتبة
تكتب الكلمات الجديدة عليها وتطلع معانيها من الديجشنري وتحظفها لانها تجي بالاختبار
تكتب اسبوعيا ملخص " قصة مصغرة " عن اللي قريته بالاسبوع
اللسينيج والسبيكينق : مطلوب اسبوعيا تشوف فيلم او تسوي محادثة مع امريكي او تسمع اي شي
وتسجل عنه قصة مصغرة
وبعد يقسمونا قروبات وكل قروب يجيب له موضوع ونتناقش فيه : يسمونه small talk
هذا الكلام في الليفل اللي انا فيه ماادري عن الباقين
بس لما اسالهم كلهم يقولون تشتغل تنجح وتعدي او تعبط وتتساهل تعيد

** نقطة مهمة نسيتها
مو كل واحد يعدي من لفل للثاني
يعني فيه تقييم معين من المدرسين والدكاترة هو اللي يحدد تطلع او تعيد
يعني تشد حيلك منها تستفيد ومنها تعدي اللفل
واكرر بخصوص الغياب والتاخير
الغياب مايتعدي 3 لان ممكن تروح بمشاكل مع الامقريشين
التاخير محسوب عن كل 3 مرات تاخير غياب يوم

معهدي اسمها قونزاقا
ولكن سمعت انهم راح يقفون استقبال السعوديين في الفترة المقبلة لكثرتهم حاليا
بس مايمنع اقول انه ممتاز
هلا بك
في سياتل افضل معهد في ولاية واشنطن

وهو اليوداب

بس سمعت انه مقفل
تأكد من هالخبرية



الله يعينكم

على فكرة سمعت انك بتجي معهدنا ؟؟
صح هالكلام والا لا ؟

ان شاء الله ويكتب لك اللي فيه خير

المشكلة من الوزارة مو من الملحقية

وكلها من مكاتب ايجك وتيسيير

اخوك مو اختك

ايه تقدرين تغييرن المعهد خلال شهر واذا تبين خلال يوم

حاولي تجيبي قبول من معهد ثاني ويفضل بقوة تجيبي قبول مشروط لان الملحقية تدقق في هالطلب
او حاولي تغييري معهدك من الحين

حتى لو تتاخرون شوي بالسعودية على حساب معهد افضل

وبالنسبة للمدينة مااقول لك انها وااااو ولا كئيبة

تعتبر ريفية حليوة
مخيفة في الليل مثل كل مدن ولاية واشنطن
الجو : يجيها شهرين حر والباقي امطار وبرد
السكن : فيه سكن جنب المعهد يعني خطوتين وانتي بالمعهد وكان ايجاره شهري بس الحين مسكته شركة وصار 6 اشهر ..
الحضانة : في وحدة اسفل المعهد وماتقبل الا من فوق سنة تقريبا
وفيه كذا حضانة قريبة بس كلها تعتبر عادية
والسعر تقريبا من 800 - 1000 دولار شهريا
ولكن لنا جارة قريبة من المعهد
كلمتني تسال اذا فيه عوايل تحب تخليها اولادهم عندها بدل الحضانة
الحرمة عمرها تقريبا 45
حبوبه وتحب الاطفال
ساكنة هي وولدها بس في شقة
ولدها عمره تقريبا 11 او 12

ضيف ايميلي عندك
gfnsheآت هوتميل دوت كوم
وابشر باللي تبي

اخوي شانيل .. اولا اشكرك على اهتمامك وحرصك على مساعده الاخوان والاخوات ..

ثانيا .. عندي استفسار .. كم عدد السعوديين في المدينة وكل فصل يتكون من كم طالب والمعهد الي انت فيه هل هو تابع للجامعه والا معهد تجاري مثل امبسي ؟ والاسفتسار الاخير اذا تعطيني اسم المعهد كامل لان ودي اشوف موقعهم على النت .



كل الشكر والعرفان..

تحياتي ..