تقريري عن كمبريدج في بداية الاسبوع التالت ...

January 25th, 2009, 12:35 AM

وصلت كمبريدج الساعة السابعة ونص مساء يوم 12 يناير بعد معاناة مع الشنط في القطار


عشان كده اول نصيحة خدوا الباص للي عندهم شنط كتيرة مع انو يطول عن القطار في وقت الرحلة

اخدنا تاكسي واعطيناه عنوان العائلة

ووصلنا للعائلة

طلعت العائلة اصلهم ايطالي عايشين في بريطانيا لهم 20 سنة بس في النهاية يتكلموا انجليزي احسن من الانجليز نفسهم

المهم

وصلنا حسيت نفسي في قرية مهجورة مافي انوار في الشوارع وكل شيء ساكت ولاحس ولا نفس


دخلنا بيت العائلة طلعنا شنطنا ورتبنا اغراضنا وكنا انا واخويه ميتيين من الجوع لانو مااكلنا من الصباح اي شيء

سألنا العائلة من فين ممكن نروح على المطاعم

اشرو لنا ومشينا انا واخويه في البلد كاننا في مدينة الاشباح لابني ادام في الطريق لانور ولاشيء

المهم لقينا شارع مافيه انوار محل واحد مكتوب انو حق بيتزا قلنا الله يستر دخلنا وطلبنا وكنا احنا الوحيدين اللي في ىالمطعم والمطعم اساسا طاولة واحدة فيه ...بيني وبينكم فكرت انو الاكل سيء حايكون بس من الجوع قلت اي شيء مافي مشكلة
بس المفاجأة انو الاكل طلع رائع ...واكثر من رائع المطعم اسمه بيرفيكت بيتزا perfect pizza

لصنا اكلنا وقعدنا نتكلم خرج واحد من اللي بيشتغلوا في المطعم وبدأ يتكلم معانا وسألنا اخنا من فين وكده ولمن قلناله من السعودية فرح جدا تعرفوا ليش؟؟؟ طلع باكستاني ومسلم وبيدرس هناك وبيشتغل عشان يغطي مصاريفه في محل البيتزا ده

المهم بيني وبينكم زاد الظلام وكبرت في عيني مدينة الاشباح

قام الباكستاني جزاه الله خير كان بيوصل طلبية قالنا تعالوا اوديكم بالمرة

وركبنا في سيارة توصي الطلبات ...ههههههههههههه خبرة جديدة ومختلفة بالمرة

وطلعت في النهاية المدينة فيها انوار وكل شيء بس على حظنا المطر داك اليوم قطع كهربة البلد كلها

المهم رجعت بيني وبينكم على رغم التعب كله ماقدرت انام

بيت جديد وناس جديدين والغرفة صغيرة وكل شيء مختلف عن بيتي ومكاني وقعدت اتقلب بالساعات مني عارفة كيف حأنام في ده البيت.. تصدقوا ايش حسيت ؟؟؟

حسيت زي الشغالة الاندونسية لمن نجيبها من المطار اول يوم وتجي تلاقي العيلة والطبيلة كلهم مستنينها ويقولولها هدي غرفتك ياله هنا تشتغلي وهنا تنامي

من جد اول مرة احس بالخدامات ...

المهم مع كل التقليب نمت تقريبا 4 ساعات

تاني يوم قومتنا صاحبة البيت وكانت عاملتلنا فطور راحت هي شغلها واحنا فطرنا وخرجنا نشوف المدرسة

المدرسة هي ريجنت وبينها وبين البيت 10 دقايق مشي استنشقنا انا واخويه الهواء العليل مع اشراقة الصباح ودخلنا اشترينا من سوبرماركت اتنين تروبيكانا وشربناها في الطريق

ولمن وصلنا المدرسة ..واخويه كان يدور على زبالة يرمي فيها قارورة العصير خرجت لنا واحدة زي المجنونة من باب المدرسة وقالت خير ممكن اساعدكم ..قلنالها احنا المفروض ندرس هنا

صرخت بسعادة وقال انتوا الطلاب السعوديين الجداد ...طبعا اتفجعنا منها بس تبين مؤخرا انها طيبة ومجنونة رباني مو فيها شيء غريب ولاتتفاجأوا لو شفتوها فترة وتتعودوا عليها

المهم ....عملتلنا اختبار وحطت اخويه في المستوى المتوسط وانا في المستوى الاعلى منه

المهم اعطونا جداولنا ودخلنا الفصول

والبريك حقنا من 10 ونص صباحا ل11

ومن 12 ونص ل 1 ونص بريك الغداء

في اول الايام كنت اخرج مع اخويه اتغدى بعدين كل واحد منننا لقاله رفقة صار يخرج يتغدى معاها

ونبتدي كلاس من 1 ونص الى 3 وبعدين من 3 وربع الى 4 وربع ماعدا يوم الجمعة اخر كلاس يخلص 3 وربع

الاشياء اللي استخلصتها من الاسبوعين دي مايلي...
كامبريدج لاتنطق كامبريدج بالالف ولكن بكسرة كمبريدج وطبعا مافي احد ماصلحلنا النطق بداية من حق الاوتيل للتذاكر لعامل اللي ساعدنا نشيل الشنط واخيرا سواق التاكسي اللي وصلنا بيت العائلة

كمبريدج جوها اكثر من رائع بارد ولكن البرودة الطبيعية اللي ماتحتاج لبس كتير يعني قطعتين وجاكت وقلفز وانتا دفيين مية مية
ولكن ولكن ولكن ... اهم شيء الشمسية دائما معاك لانها ممكن تمطر في اي لحظة وطبعا تغرق بالمطر ...

اهل البلد...حقيقي جدا لطيفيين واحسن من كتير بريطانيين شفتهم ...وخدوميين ولوتسألهم عن اي شيء يردوا عليك ويدلوك..

المطاعم ..عندهم مطاعم حلال في شارع اسمه ميل رود mill road
هده الشارع يسموه شارع العرب لانه اغلب مطاعم عربية وحتى اللي مو عربية حلال ووقت الغداء تلاقيها مليانة بالطلاب العرب

من خلال تجربتي

في مطعم جزائري وهو شوية غالي يعني تروحه لمن تستلم مكافأتك بس اكله خطيييير

ومطعم اسمه روستو يقدم وجبات سريعة بس لذيذة واسعاره معتدلة

وبيتزا هت

وغيرها

وذا تبغوا ارخص اكل ممكن تلاقوه سوبرماركت اسمه الامين صاحبه وكل اللي يشتغلوا فيه هنود وكل اشيائه حلال يبيع السندوتشات الجاهزة ممكن تاخدوها مع عصير والحمدلله


في الشارع نفسه في 3 كافيهات حقة نت

ومن اهمها روتانا كافيه كل الشعب الخليجي هناك تلاقيه وخصوصا باوقات متابعة المباريا ت
صاحب الكافيه فلسطيني ومحترم وشربت عنده شاي ماشربته من يوم دخلت بريطانيا كانه شاي بيتنا وعنده فول وطعمية وحمص

في محل جنب الاشارة يصلح كمبيوترات حق واحد عراقي برضه مرررررة كويس بس اسعاره واااااااااااو ..بس ضغط كم زر في كمبيوتري اخد 10 باوند

اخر الشارع باءتجاه السيتي سنتر تلاقي قسم البوليس طبعا للطلاب اللي يبغوا يسجلوه تدفع 34 باوند (حار ونار في جسمهم يارب) يعني انا واخويه دفعنا 68 باوند

وتمشي على طول تلاقي تلاقي السيتي سنتر على يدك اليسار موووووووووول كبير

شارع فيه مكاتب عقار وراء بعض اللي يدور شقة والمول والشارع كله محلات تجارية ومطاعم وانصحك بمطعم بيتزا اكسبريس البيتزا عنده تحفة والكنيلوني خطيرة

داخل المول تلاقوه كتير شركات للجوالات وانا في الحقيقة اخدت شريحة ليكة lyca
مكالمتها للسعودية ب15 بنس الدقيقة يعني بلاش كلمت خالتي من كم يوم 20 دقيقة باقل من 3 باوند واخدت للانترنت من شركة o2 ادفع على usb 29 باوند وكل شهر 15 باوند

لمن تروح من وراه المول تلاقي بداية مبنى جامعة كمبريدج وبينهم ايضا في محلات تجارية ومكتبات ضخمة وكل ماتريده

وحضرت الاسبوع الماضي احتفال جامعة كمبريدج ب800 سنة ومن جد لمن دخلتها قمة الشيء القديم

البلده صغيرة بحيث انك تشوف كل طلاب المعهد في اي مكان

نسبة العرب قليلة في البلد

وهده مما قوى لغتي في اسبوعين بطريقة غير عادية

هده ماافتكرته وماردت كتابته عن كمبريدج اذا في اي سؤال انا حاضرة ورهن الاشارة بس دعواتكم لي بالتوووووفيق

• نشر عبر تويتر
• نشر عبر فيسبوك
• نشر عبر جوجل