حوار أين تــدرس الطــب ..!!

والله أنه حيف منكم يا دكاتره

30 دكتور ولحد رد علي

الله المستعان بس

وعليكم السلام ورحمة الله وبركاته



أخي محمد أنا أرى أن أفضل مكان لدراسسة الطب هنا
أعتقد أن أفضل مكان هو
بين أهلك وناسك (بالمملكة هنا ) ومميزاتها كثيرة بس تحتاج توجيه لأن التوجيه ينقص الكثير منا خصوصاً
في السنوات الأولى من الدراسة
طبعاً الايجابيات كثيرة خصوصاً أنك صغير في السن وقتها والأجتماع من الاهل ولو بالويكند يكفي


طبعاً أنا أتكلم عن مرحلة البكالريوس

أما بالنسبة للريزدنسي والفيلوشيب
بالإجماع كندا وأمريكا هي الأفضل
وهي اللي تفرق معك وين درست الطب مو مرحلة البكالريوس

وبالنسبة للمعيشة والطقس والثقافة كل مدينة عن مدينة تفرق في أمريكا وكندا
يعني فيه مدن تعيش فيها حياتك وطبيعتها حلوة
وفيه مدن عملية بحته متعبه الحياة فيها

وأعيد وأكرر البكالريوس ماتفرق من وين حصلت عليها



بالتوفيق

واللهي انا من رأيي انو ازا توفرت فيك شروط الابتعاث وعندك نفس للمرمطة والصبر من شهر رمضان الين دحين ونحنا نستنى انو نسافر فقدم وبصراحة شهادة برا لا يعلى عليها ويتفتح مخك وترجع بعقلية جديدة تطور البلد
المهم انا انسانة لسا ما سافرت ومقدمة في المرحلة الخامسة ولسا قاعدة اهش دبان المهم يا سيدي نبدا نحلل الدول حبة حبة
المرحلة الخامسة والرابعة نفس الدول كانت >> ايرلندا, المانيا, هولندا , بولندا, المجر, التشيك
طبعا اول ما قدمنا كان الاغلب يبغى ايرلند والمانيا وهولند >> يعني صعب تلاقي احد فكر في الدول ال 3 الاخيرة الا عدد مرة قليل وينعدو على الاصابع
انا وصاحباتي قدمنا على ايرلندا ( التقديم كان في رمضان ) نهاية شهر ذو الحجة بانت الدول كل واحد فين راح يروح طبعا الوزارة قسمتنا على كيفها
راح اشرحلك اكتر يعني >> ايرلندا شارطة على الطلاب والطالبات اللي تبغى طب في ايرلندا ( الكلية الملكية للجراحين ) لازم يجيبو على الاقل 4,5 في الايلتس وكل مواد العلمي ( الرياضيات والاحياء والكيميا والفيزيا والانقلش ) تجيب فوق ال 95 وعادي ازا عندك مادتين تحت ال 95 يمشوها لك وكمان النسبة العامة بعد جمع القدرات والتحصيلي معاها فوق ال 92 (يعني 30% قدرات و 30% تحصيلي و40 % ثانوية ) ازا جمعت وضربت وقسمت وطلعت 92 او فوق نقول مبروك وتروح ايرلندا اما ازا زي حالتي انا جبت 90 حولوني على هولندا رغم انها ما كانت رغبتي التانية اهو الحمد لله
نجي لهولندا لازم تكون جايب في كل المواد العلمية في ال 90 يعني ازا تحت ال 90 راح يمرمطوك زي واحد كان معانا اتمرمط وجري وراهم واخر شي قالولو نسبتك نازلة والجامعات الهولندية ما راح تقبلك وهوا جايب في الاحياء 85 >> والجامعتين اللي تقبل طب هيا ماسترخت وجرونقن >> على حسب كلام الطلاب اللي فيها ماسترخت مضمون مستقبلك فيها بس الدراسة قوية وكتير طلاب لعبو وغابو وما كملو سنة الا ورجعو على بيت اهاليهم وفي شي تاني ما عندهم سنة لغة يعني تدررس لغة+ مواد تانية ( احياء + كيميا + ...) وكل فترة تحتبر انقلش عشان يشوفو التطور اللي سار في لغتك ودحين طلع شرط جديد لازم تجيب في الانقلش 5 عشان تدخل البريميد اللي هيا لغة مع مواد العلمي ولا تسألني اللي ما جابو ال 5 ايش سار معاهم لا نو ماشا الله الكل جاب ال 5 وما اعرف احد في ماسترخت ما جابها

نجي لجرونقن بصراحة اغلب اللي اعرفهم فيها ومحد ينصح يقولو الملحقية حلت المشكلة بس لما راحو شافو الوضع زي والين دحين معقد كل يوم طالعتلهم مصيبة مرة انو المسمى الدراسي دبلوم ومرة مدري ايش اهم شي في طلاب فكرو انهم يحولو بولندا السنة الجاية واذا دخلت على الملتقى تبعهم راح تشوف الشكاوي حقتهم, والعدد مرة كبير ارسلو 147 طالب لهولندا وما راح يدخل طب الا 90 او اقل الله اعلم يعني الباقي مدري يقطع نفسو او يقتل نفسو >> بس راح يبان اللي رايح يدرس واللي رايح يلعب

نجي لالمانيا >> كتير نسبهم نازلة وانقبلو في المانيا يعني اللي تحت ال97 ينقبل ببرودة فيها المشكلة ازا جات تحت ال92 ممكن شوية صعبة لانو المانيا قوية في الطب والاغلب يفضلها بعد ايرلند
بس المشكلة اللي الكل ما يحبها هيا اللغة وراح تنسى الانقلش مرة الا ازا مثلا درست انقلش والماني مع بعض
وكتير يمدحوها والطب عندهم حلو وكلو تطبيق

نجي لبولندا عندي صاحبة تدرس فيها سنة لغة وبعد السنة تدخل طب والحمد لله ما عندهم مضاربة على المقاعد وكدا
والمجر والتشيك ما اعرف عنهم شي ممكن تدخل على الملتقى تبعهم وتشوف المواضيع وان شا الله تلاقي اللي يفيدك
بس اكيد زي بولندا

واللي انقبلو في دي الدول (بولندا والمجر والتشيك) اللي نسبهم اقل 94 واقل ما في احد اختارها الا كذا شخص كانو عارفين انو ما راح ينقبلو بنسبهم في دولة زي ايرلندا وهولندا ومن زمان مسافرين وبداو دراسة واللي اعرفو وحدة من صاحباتي حولولها من ايرلندا وكانت نسبتها 93 وانقبلت في بولند وفي تانية اقل منها وانقبلت في المجر فالافضل بولندا وبالذات جامعة وارسو

وازا تبغى تشتري راحة بالك وعندك قبول طب في السعودية >> زي ما قال الاخ اللي قبلي ادرس هنا اما ازا كان طموحك عالي وتبغى برة فالقرار يرجعلك >> لا تحسبني باحبطك بالعكس انا زي حالتك بكالوريوس وطموحي عالي وابغى ادرس برة حتى لو ضيعت سنتين اجري ورا البعثة
وازا ما تبى طب ترى امريكا وكندا موجودين انسى طب في امريكا او كندا لانو الوزارة ما راح توافق على قبولك لانو الدراسة عندهم اكتر من 6 سنين للطب والحق ليك فيالبكالوريوس 5 سنين وانتا تطولها ل 6 << انا حاربت عشان اروح ايرلند وما جبت النسبة وبعدين حولوني على هولندا وربك ما كتب حصلت شوية مشاكل ودحين على امريكا والله يسهل

<< انا عارفة كاني قاعدة احكي قصة عمري ( لق لق ) بس حبيت اوضحلك الصورة عشان تكون في الصورة وتبدا تخطط وتحسبها ومشكلتنا العام محد وضحلنا الصورة زي كدا بس لما دخلنا البرنامج عرفنا عيوبو ومحاسنو ودحين لو تعرف كلنا ندمانين انو اخترنا طب لانو الدول اللي حاطينها لو محدودة >> اغلبنا يفكر لو من البداية اخد امريكا او كندا وفي تخصص صيدلة او تقنية طبية او اشعة اي قسم على الاقل مو تعقيد زي دول اوربا وترى الاغلب بداو يسافرو من شهر فبراير بس بولندا مشيو قبل فبراير اتوقع 20 جانوري
والقرار في الاول والاخير يرجعلك استخير( وصدقني الاستخارة ثم الاستخارة ثم الاستخارة ) واستشير واي مساعدة حاضرين >> اعتبرني اختك الكبيرة بالتوفيق يارب

يعافيك أخي .. أعلم أننا في موقع مبتعث

فقط كانت وجهة نظر عن دراسة بكالريوس الطب البشري طبعاً الكلام لمن يستطيع وله القدرة
في الحصول على قبول هنا أو القدرة على اجتياز المرحلة التحضيرية
صدقني مرحلة الابتعاث الحقيقية هي مابعد البكالريوس



لا أخفيك صدقاً أعرف من يعاني كثيراً بسبب دراسة الطب في لغة غير اللغة الانجليزية
حبنما يعود هنا ويضطر للتحدث بالانجليزية



الأخت إيمان
ألف شكر رد موفق بالتفصيل لكل الدول



بالتوفيق وإلى الأمام

الله يسلمك خيو وربنا يختر لك الطيب وان شا الله تتوفق في اختيار المكان الصحيح

انا كتبت عن تجربة وكل اللي جربو راح يتفقو معايا
اكلنا من دي الوزارة الين قولنا بس وربنا عالم انو بعد توفيقو وخبرات الناس اللي قبلنا سرنا نعرف راسنا من رجولنا
بالتوفيييييييييييييييق للجميع يارب