مساعدة في السكن في أريزونا - تيمبي ... وما هو الفرق بين الكوندو والشقة ؟

أخوي عندك هذا>الملف< فيه قائمة بالشقق معها مواصفاتها وأسعارها ومسافتها من الجامعة.

هلا اخوي

شروطك صعبه مره...صعب جدا تلقى بأقل من 500 دولار شي كويس. وصعب تلقى شي 4 شهور الاى اذا غرفه مشتركه مع اني ما انصح بها. اذا العائله صغيره يعني بتكفيك ون بدروم ريح نفسك وشف لك شغل مرتب من الحين ترتاح من الشيل والحط ومنها ترتب شقتك على رواقه وتشتري اثاث كل ما تيسر لك ولقيت لك فرص (طالب طالع, تخفيضات...الخ) وصدقني اربع شهور تمشي بسرعة. الله يعينك على التكلفه بس اعتقد هي افضل حل.

المل افنيو راحت ايامه ترا...الوناسه الحين في المول المفتوح الجديد الي على تمبي ليك...ولا تحاول تسكن في المناطق الي ورا المل افنيو من غرب لانها مهيب زينه
احسن شي تسكن في يونيفرسيتي درايف ولا برادوي في المنظقه الي بين رورال وماكلنتوك
اذا بتشتري سياره بتصير الخيارات اكبر في بيس لاين وحتى تشاندلر

راجع برد اخر ان شاءالله

αhad
مشكور ما قصرت .. الملف مفيد جدا




Abdullah 10

انا اقتنعت اني من الافضل اني استأجر شقة غرفة واحدة وتكون مساحتها كويسة واجهزها على رواق
بس ما عندي خبرة في المدينة واخاف اني اضطر اني اغير من مكان لمكان

مخطط اني اشتري سيارة طبعا بس بعد شهرين ثلاثة ... وطبعا ودي في شقة تكون أمنة وهادية ومرتبة

ايش رايك في Scottsdale كاني فهمت انها احسن في السكن ؟!
او المنطقة الي تحت البرودواي كل ما اتجهنا جنوب ؟!

وايش الافضل اني اسكن كومبلكس ولا اشوف لي شقة منفردة ؟!
مفروشة ولا بدون فرش افضل ؟

وكويس انك افدتني في المل افنيو لاني بصراحة كنت افكر في غرب الشارع علشان قريب من الاسواق والمطاعم والمحلات التجارية !

واذا عندك فكرة عن هالكومبلكسات ياليت تفيدني فيها :

San Marbeya
The Palms on Scottsdale
Galleria Palms
Scottsdale Gateway

والله يا اخ عبدالله انا مخطط اني اصرف كبداية لتجهيز السكن والسيارة ما بين 10 الاف الى 15 الف دولار ! ... ممكن ازيده بس اذا اضطريت لهالشي !

السكن انا يهمني يكون في منطقة هادية وأمنة بما اني راح اروح مع عايلتي ! ... وعلى حسب ما فهمت من اغلب الاراء ان كل ما قربنا من الجامعة كان السكن اقدم واغلى وازعاج اكثر وجرائم بسبب وجود الطلاب والحفلات وقلة الحيا ! .... فصرت اتجه اني ابعد عن الاماكن القريبة من الجامعة لان السكن يكون اهدأ وارخص وجديد اكثر ! ... ويهمني برضو يكون في حماية او Gate للكومبلكس .. يعني مكان يحسسك انك مو في الشارع اذا انك فاهمني


ما ادري انا حاط في بالي ان شقة بغرفة في مكان كويس راح تكلفني حوالي الالف دولار مع اليوتليتيز ! ... ما ادري هالمبلغ قليل ولا كثير ؟!


بالنسبة للكومبلكس الكبير هل هو الي يكون جنب Mile Mall واعتقد اسمه الغاليريا الي كتبته فوق ؟!

وانا ودي اني احجز قبل لا اسافر علشان ما اتعب واتبهدل اول ما اوصل للجامعة في فنادق وغيرها ! ... او على الاقل احدد لي ثلاثة او اربعة اسماء علشان اشوفهم اول ما اوصل !

سان ماربيا واضح انه فخم بس المشكلة اني كل ما دخلت وشفت الـ Reviews على اي كومبلكس لقيت ناس تذم وتمدح ويضيعونك بكلامهم !!! ... ما تدري الصدق من الكذب !

هل تنصحني اني كبداية اسكن في فندق واجلس اشوف الشقق وحده وحده وبعدها اختار ؟؟؟ ... اخاف ان الشقق تروح وتمتلى وما الاقى في بداية اوغست ! ... او الافضل اني احجز من هنا وخاصة ان اغلبهم صار ممكن يحجز لك عن طريق النت !

http://phoenix.craigslist.org/apa/

اقصد Arizona Mills سوري لخبطت في الاسم !!

هلا اخوي

رد سريع ولي ردجعه

ايه الي على بيس لاين قبل الاريزونا ميلز وقبل ال اي 10 بس ما ادري عن اسمه صراحه...هو مقابل بلازا فيها كنتاكي وسوبرماركت نسيت وش اسمه

بالنسبه للمبلغ..الف دولار اعتقد كويسه. والله كلها خيارات كويسه. ممكن انك تسكن كم يوم في فندق وتلف المدينه (الله يعينك على الحر) او انك تاخذ عقد والشكوى على الله كانه ما عجبك لين خلصت السنه الاولى تغير...انت بتدرس ماستر ولا باكالوريوس؟

المبلغ حق الصرفيات كويس وماشاءالله يخلك تبدا كويس ..

مشكله تمبي المواصلات.... الباصات لك عليها مع انه فيه شتلز للمجمعات القريبه مره تنقلك للجامعه. هذي يبيلك تشيك مع الجامعه وش طريق الشتل ومتى يجي وكذا

لا تشيل هم من ناحيه ال gated complex اغلبها كذا...بعضها انضمتها افضل من كذا. الي قلت لك كبير وقريب من اريزونا ميلز نظامهم كويس مره صعبه تدخل اذا ماتعرف احد في المجمع.

اذا تبغى الهدوء تشاندلر وسكوتسديل احسن لك...مع ان طلاب الجامعه المهبل موجودين في كل مكان...ترا اي اس يو ضخمه مره واذا منيب غلطان هي ثالث اكبر جامعه حكوميه...الكامبس الي في تمبي فيه فوق الخمسين الف طالب!

طيب بتروح قبل الدراسه بكم يوم؟

على فكره
اريزونا ميلز مستواه متوسط يصلح لاشياء سريعه بس مهوب حق تمشيه...يتجمعون فيه المكسيكان ..المولات الزينه تشاندلر فاشن مول وسكوتسديل فاشن سكوير وفيه غيرها بس اصغر