انتبه لا تغلط نفس غلطتي في بعثة كندا !!

بالله لاتنسى تحلى الموضوع بالاماكن السياحه والحلوه من جزر او بحيرات ورحلات الشلالات والسي ان تور
بس ابدعت يابطل
وبالله اذكر المطاعم والسينما وجيب كل شي لاتخلى حتى الكاتشاب والمايونيز
خخخخخخخخخخخخخخخخخخخخخخخخخخخخخخخخخخخ
بالتوفيق

Stealthy
يعطيك الف عافية على الموضوع
سؤالي: لازم يسير لنا كل اللي سار معاك ولا نقدر نحل المواضيع من هنا واذا من هنا من فييييييييين؟
خاصة موضوع مرافق المتعثة والدراسة وخطاب الضمان

مرحبا أختي أم نورة ،

أوكي مع أني مرتبط بشغلات كثيرة أسويها اليوم لكن براسك أرد وأكمل.

أولاً معنى ( ستلثي) هو الشخص أو الشيء الخفي المتسلل في الخفاء أو الظلام ولا تشعر به.

ثانياً بالنسبة لي صرفت 40 ألف على ما نزلوا لنا المكافأة بعد شهر من وصولي وغيرنا صرف 50 و 60 ألف وناس ما صرفوا حتى 10 ألالاف وهذا شيء يعتمد عليك وعلى عدد أفراد العائلة وايضا والمهم مدة جلوسك في فندق أو شقة مفروشة على ما تلقين سكن.

ثالثاُ ونصيحة من أخوك ، سواء توفرت لديكم السيولة أم لم تتوفر حاولوا انكم تقتصدون في مصاريفكم وما يحتاج انكم تسوون مثلي لما رحت على فندق غالي في لحظة غضب ويأس وحطوا في بالكم ان وضعكم يمكن يطول فلا تصرفوا على اللي رايحة وجاية وبكرة تحتاجون مبلغها لغاية ما تستلمي المكافأة.

رابعاً لكي تتفادي أي تأخير في صرف المكافأة انكِ تخلصي أجراءاتك الأولية من فتح حساب بنكي إلى سرعة فتح الملف في الملحقية والعادة يتم الصرف في تاريخ 19 كل شهر حسب ما اشوفه معاي.

أخيراً العذر والسموحة منك ومن الجميع إذا طولت بالكتابة والرد وذلك لضيق الوقت وكثرة المشاغل.

مراحب حبيب قلبي ،

إن شاء الله جايين في الطريق هالسوالف من مطاعم ومولات واسواق ومحلات وسينمات واماكن سياحية لسه ما جاء دورهم ، وأما الكاتشب والمايونيز راح يكون لهم دور بطولي في السوالف ههههههه.

يعافيك عيوني ،

جوابي : كلا ، نعم تقدر تحل كثير من الأشياء وأنت في السعودية .

منها واهمها تغيير فيزتك كمرافق من زائر إلى دارس عند حصولك على قبول خاص بك ، مراسلة الجامعات من الآن ولا تنتظر لما توصل على كندا ، خطابات الضمان لازم تكون في كندا وفاتح ملف مبتعث أو مرافق علشان تحصل عليه.

بالنسبة للسكن ومشاكله هذا يعتمد على المدينة المبتعث لها وتعرفها بعد إستلامكم لخطاب القبول في الملتقى للمبتعثين بعد اعلان اسماء المرشحين للإبتعاث، ونصيحة أخ لأخوه اذا عرفت مدينتك إدخل على جووجل ماب وحدد معهدك ومنه إبدأ البحث عن كل ما يخطر على بالك بناء عليه ، وبهذا تقلل من صعوبة التعرف على المدينة قبل وصولك لها.

شيء أخر ادخل على موقع الملحقية الثقافية في كندا حاول التعرف على خدماتهم http://www.saudibureau.org

ومتطلبات الخدمات علشان تكون مجهز أغلب الأشياء ، والباقي لما توصل هنا مثل اوراق الهجرة الحساب البنكي والشلة الباقية.

ابغي الباقي رايح ابكي
انتظرك بفارغ الصبر
وانتظر التكمله
واتمني تكون بافضل صحه وعافيه

....أممممممم أيش تتوقعوا كان الإكتشاف الخطير بالنسبة للشطاف ......

أوكي ادري ان ما أحد راح يجي في باله ان الماء باااااااااااااااارد ثلج لدرجة انك تحس ببرودته من بعيد واحنا في عز الصيف أجل في وقت الثلج شنو بيكون وضعه ، انا ما قد انتبهت لهذا الشيء لكن لما نظرت لكرسي الحمام الله يكرمكم وتحديداً لمكان تخزين الماء لقيت انه من برودة الماء ان الطبقة الخارجية له عليها قطرات الماء. طيب والحين شنو الحل لهذا حتى الشيء السهل مو راضي يضبط معاي اصرخ ولا ابكي ولا شلون.

ناظرت فيه لمدة وانا فاتح الموية مو راضي تقل برودته ، قلت لنفسي أوكي أمرك انت هين أهم شيء فيه موية الواحد يستعملها مؤقتا على بال ما آلقى حل ثاني له ، عرفت وقتها ليش كان فيه شباب في مواضيعهم كانوا يستخدمون اشياء بدائية وفعالة اثاري علشان برودة المياه أو على الاقل هذا اللي جاء في بالي، عموماً لقيت له حل خطير بعد شهر ونص من البحث وراح اقول لكم مع سرد الأحداث لاحقاً.

طيب أيش اسوي الحين ، ما فيه الا اني أطلع أغير جو وطبعاً معي قمرنا المصون تمشينا على شارعنا الأوحد يونق وتوقفنا عند مطعم أسمه درويش رستوان ، هذا الله يسلمكم مطعم إيراني (عندما تتكلم عن إيرانيين هنا في كندا فهم في الغالب إيرانيين اللي طلعوا من ايران قبل اللي يسمونه الثورة على الشاه ، معظمهم مسيح أو مسلمين بالأسم فقط وحتى العلم اللي يحطونه في مطاعمهم هو على ايران القديم) شكله من الخارج ما يأهل لكن من داخل يمشي الحال انا قرأت من أحد الشباب في مبتعث انه ذهب له وكان كويس وعلشان كذا قلت نجربه مثل ما جربنا مطاعم قبله، المهم دخلنا المطعم وطلبنا شيلو كباب وشيلو سلطاني وجاء الطلب بعد 15 دقيقة تقريباً بصراحة الطعم لذيذ وما اقول انه اقل من المطاعم الإيرانية في السعودية لكن في بعض مسوى بعضها وحجم الكباب كبير مقارنه باللي في السعودية وانا أكل اللي جنبنا خلصوا أكلها وقاموا انتبهت لزجاجة الواين حقهم !! في البداية طنشت الموضوع لكن وانا اناظر في المطعم فوق تحت لقيت ان صور المحل كلها واين وهنا انسدت نفسي عن الأكل واستعجلنا في خروجنا من المطعم، هنا تنبهت انه مو كل مكان يحط لوحة HALAL يعني كل شيء فيه حلال وانه اسلامي 100%، كملنا على يونق الى الجنوب مررنا بجانب سينمات صغيرة لدرجة انها ما تأهل ان الواحد يدخلها بسبب مكانها مررنا بجانب سينما خاصة بـ 18+ وكانوا حاطين بوستر للفلم الرئيسي واوقات العرض يعني الكل يعرف شنو الفلم قبل ما يدخل وتصادف مرورنا بجانب الباب بخروج 3 شباب سعوديين من السينما وهم يتكلمون عن الفلم ، واحد منهم لما انتبه لنا خجل وسكت والآخر جلس يناظر فينا بكل وقاحة وهو يقول بصوت مسموع لنا " وش عليك لا يكون حنا بالسعودية وهذولا بقية اهلنا " بصراحة حزت في نفسي كلمته وكان فيني ارجع له وارد عليه ويمكن بيدي قبل لساني لكن زوجتي سحبتني وهي تقول ما عليك منهم بعدهم بزارين ، طنشتهم وكملنا طريقنا وصلنا لكولج بارك هنا تذكرت اني نسيت اني اقول لمكان الاثاث ايش صار معي على التوصيل ودخلت لهم وحددت معهم موعد بعد 3 اسابيع ومن عندهم دخلت على داخل المجمع ندور بين المحلات لقيت هناك مكان خطير أسمه دولاراما Dollarama
www.dollarama.com

هذا محل كل اللي فيه بدولار أو دولارين ، مثل محلات أبو ريال أو ريالين عندنا بالسعودية ، وصدقني بتحتاجون هذا المكان كثير ولأشياء كثيرة فحطه في بالك ، اشترينا منه اشياء كثيرة وضرورية ما كلفتنا حتى 50 دولار يا بلاش ، ولما حاسبنا وطلعنا واحنا حاملين الأكياس لاحظت شيء في زبائن المكان ، اغلبهم ساحب معه عربة زي الشنطة ولما يحاسب يحط كل اغراضه فيها ويجرها وهو ماشيء وكنا احنا الوحيديين اللي حاملين اكياس كثيرة بين العالم ، عجبتني الفكرة وقلت لازم ناخذ لنا هالعربة لها فوائد ومأرب آخرى.

للمعلومية فقط ، هنا في تورنتو علة جميع مشترياتك يحسب عليك تاكس أو ضريبتان ، 1- ضريبة المقاطعة +2- ضريبة السلعة ومجموعهما تقريباً 15% من أجمالي مشترياتك ، يعني تشتري أو تأكل أي شيء قيمته 100 دولار راح يكون عليه تاكس 15 دولار ، وايضاً الكيس البلاستيك اللي تشيل فيه الأغراض ليس مجاني لكن سعره 5 سنت للكيس الواحد.

المهم وإحنا نكمل لفتنا إلتقينا بشخص وزوجته بمواجهتنا تشجعت وسلمت عليه وكلمة ورى كلمة وبدأ التعارف بيننا هما كانوا ساكنين في مبنى قريب من مجمع كولج بارك وفيه عدد من السعوديين موجودين معهم بنفس المبنى وصار لهم أكثر من 6 أشهر في كندا ، وطبعا اخذت رقمه واخذ رقمي وكالعادة راح تسمع كلمة " اذا احتجت أي حاجة أخوك موجود " لما تسمعها وهي صادرة من قلب قبل اللسان تعرف قيمة الأخوة في الغربة.

رجعنا على الشقة حطينا الأغراض إلا صاحبنا اللي تعرفت عليه متصل علي يعزمني ثاني يوم عنده بالبيت وقال لي انه كلم جيرانه في العمارة علشان اتعرف عليهم بعد ، ما قدرت اني أرفض عزومته مع انه خجلني بها.

حسيت ان نفسيتي بدأت تتغير كل ما جاء على بالي شيء يضايق قلت بكرة ربك يفرجها وماني لوحدي هنا، وقضينا ليلتنا ( أو بالأصح نهارنا بما ان الشمس لسه ما غابت وكان الوقت في حدود 10 مساء ) على خير علشان دوام بكرة.

صحينا الصباح بدري وخلصنا امورنا ونزلنا قلت اليوم خلينا نجرب تيم هورتن نشوف ايش حكاية الزحمة http://www.timhortons.com
راح تلقى تيم هورتن في كل مكان وين ما تروح في الداون تاون يعني ما بتتعب نفسك وانت تدور عليه ههههه ، دخلنا الكافيه وانا واقف في الزحمة ناظرت الأسعار اللي له فكانت خيالية مقارنة بستاربكس فرق 4 دولار بين الكافي العادي وكل ما كبر الحجم كل ما زاد الفرق هنا وهناك ، يمكن احنا ما نهتم بهذا الفرق لكن بالنسبة للعالم هنا 4 دولار مسألة حياة أو موت عندهم ههههههه وبكذا يجون تيم هورتن لأنه ارخص في كل شيء يبيعه ، طلبنا كافي وكوكيز ورحنا على المعهد ، دخلت على المسؤلة وسئلتها اذا جاها شيء من الملحقية قالت للحين ما جاء أي شيء قلت لها طيب وعلى ما يجي شيء انا شنو بأسوي قلت لي انا فاهمة ومقدرة وضعك لكن هذا قرار إدارة المعهد في في فانكوفر وتورنتو واحنا تقيدنا بهذا ، قلت لها طيب اذا وصل لك شيء ممكن انك تبلغيني على طول وعطيتها رقمي قالت ياه شور آي ول .

طلعت من عندها رجعت على الشقة علشان اشيك على الايميل قبل لا أبدأ معاناة الإتصال مع الملحقية.

.......تو بي كنتينيو

هههههه ليش البكى يا قلبي mmm1998،

الحمدلله انا بخير ونعمة من ربي ، وهذه التكملة وصلتك.

الله يسهل لك دربك ويفرج همك ان شاء الله


اخوى لدى استفسار بخصوص موضوع التاكس فى تورنتو انت ذكرت يعنى لو ابى اشترى شى بدولار راح ادفع 15 دولار

بمعنى عصير لو افترضنا كل عصير بدولار راح اضر ادفع لو عدد افراد العائلة 6 راح ادفع 90 دولار ؟

هههههه وين رايح ياخوي يالملكي الظاهر ما أنتبهت لعلامة النسبة المئوية % ، 15 بالمية التاكس وليست 15 دولار .
وتصحيح لحسبتك على العصير راح تكون 90 سنت ، الدولار = 100 سنت، يعني 6 دولار و 90 سنت.

وبيني وبينك يا قلبي راح تتعود على سالفة التاكس لدرجة انك ما راح تحاسب عليها بعد مدة من إقامتك في كندا.

لكن الشيء اللي أنت الحين ذكرتني به واحب أني أنبهكم عليه انك اذا جيت تشتري حاجة وخصوصا الأشياء اللي تكون معروضة بتخفيض، راح يكتبون السعر عليها بعدة طرق ومنها مثلاً:

1- 39.99$
2- 39.99$ + Tax