انتبه لا تغلط نفس غلطتي في بعثة كندا !!

اهم شيء انك تستفيد منها مو تغير الموضوع اول ما تخلص منه مثل التلفزيون

ربي يتمم امورك على خير وتلقين ما تطمحين له خيتو ياسمين ، وهدفي من هالموضوع تعميم الفائدة وعلشان كل واحد يتلافى اخطاء اللي قبله، أبشري بسعدك اختي أنتِ وأي مبتعث/ مبتعثة يطلب مساعدة مني عيوني لكم في اللي اقدر عليه.
في النهاية كلنا عائلة وحدة في الغربة واذا الأخ ما ساعد اخوه/ اخته مين يساعدهم.

تسلم لي يا تاج عالي، وهذا اللي ابي اوصله اني انقل تجربتي للكل اللي ما يدرون شسالفه البعثات.

كم حلقة عيوني هذا يعتمد على مدى لياقتك النفسية والجسمانية وقوة تحملك ، الحلقة الاخيرة بدري عليها.

ربي يوفقنا وإياك والجميع حبيب قلبي، انا معك في كلامك لكن ما تعتقد انه لو كل واحد سكت عن المعاناة او المشاكل او اي شيء صار له وكتمها بقلبه. انه يضر عالم كثيرين ، انا لو اشتكيت يا ترى كم واحد بالمنتدى راح يسمع او يفهم شكوتي هذا اذا ما رد علي وقال هذا جزاك انت اللي جبته لنفسك!!! لكن بدل ما اشتكي انا انبه الكل علشان هم بكرة ما يشتكون.

أما موضوع كندا وامريكا انا اوافقك في معظمه ،وان شاء الله راح اتطرق له.

هههههههه لو اعرف ايبب كان يببت لما استلمت قرار الابتعاث ( أيبب = كللللووووش) شسوي خبلوا فيها الوزارة ما تسوى علينا ، سئلت الموظف خلاص كذا انتهينا ولا فيه شيء بعد نركض وراه ضحك وقال لا كذا خلاص رح واستلم امر الاركاب من الشباك اللي وراك وبعده قص التذاكر حقتك وسلامتك .

علشان اوصف لكم الصالة ، اول ما تدخل بتلقى مكتب الباش مهندس السكيورتي وما شاء الله عليهم دايم يكونوا طيبين وعنده تأخذ رقم انتظار حق تسليم استلام اوراقك ، أمر الاركاب ، مكتب الطيار . وانت عند الباب قدامك على اليسار شباك تسليم الاوراق ومن بعده البوفية وعندهم آلة تصوير الصفحة الوحدة بريال أو بريالين ما اذكر بالضبط لكن الشكوة لله وقتها ، على يمينك كونتر أمر الاركاب ، أمامك مكتب الطيار. طبعا وقت ما كنت هناك كانت فاضية الصالة لكن وقت الزحمة ما لك مكان لرجلك مو انك تجلس مثل ما سمعت .

ما علينا، رحت كونتر اللي اخذ منه أمر الاركاب عبيت استمارة أمر الاركاب واخذ الجوازات ودفتر العائلة يتأكد منها ، وقعها الموظف وقال لي رح على الميزانية يوقعوها ويختموها وبعدها على مكتب الطيار تاخذ التذاكر. طيب يا طويل العمر كيف اوصل الميزانية ؟ يمين الصالة فيه باب للمسجد تدخله وتطلع من الجهة الثانية للمسجد بتلقى نفسك في ممر لدورات المياه اعزكم الله وباب الصالة الرئيسية تروح الصالة الرئيسية على يسارك بتلقى السكيورتي يشيك البلوتوث اللي استلمهم من المراجعين في الصباح ، ما الومه ما عنده شيء يسويه غيره ، اسئله وين إدارة الميزانية وبيوصف لك ، اذا ما خانتني الذاكرة انها في الدور الثاني على يدك اليمين ، بتوصل هناك بتعطي أمر الإركاب للموظفين اللي بالوجه بترقى لهم درجتين راح يقول لك وقع في أمر الإركاب انك استلمت التذاكر ، انا طلعت فيها وقلت له ليش اوقع على شيء وانا ما استلمته اصلاً ، ناظرني بكل آدب وأحترام وقال وقع تراه فيه كثير غيرك مهوب انت لوحدك ، قلت في نفسي انا الغلطان اسئل سؤال وقح لموظف حكومي محترم فاهم النظام اكثر مني ، وقعت وأمري لله، سم طال عمرك ومديت له الأوراق ناظر فيني وكأنه يدري سشالفة ههههههه المهم أخذ الأوراق ودخل على المدير مكتبه على يسارنا ، لله وفي الله حبيت المدير ما أخذ حتى نص دقيقة علشان يوقع اوراقي، وقال لي الموظف عطها لفلان في المكتب اللي جنبنا ، تنزل الدرجتين اللي رقيتهم ( أموت واعرف ليش هالدرجتين من الاساس حاطينهم ) بيكون جنبك على اليمين اول مكتب تدخل وتعطيهم الاوراق بيسجل معلوماتك بالجهاز ولما يخلص بينادي بإسم المبتعث أو المبتعثة. وبكذا يا تكون انت رسمي خلصت مارثون الوزارة وانهيت كل الأوراق والتواقيع ووجع الرأس. ويبقى عليك تأخذ التذاكر من مكتب الطيار وبس.

بالنسبة لي وقبل ما أجي الوزارة جلست ادور في النت شنو احسن طيران لكندا ، لقيت ان طيران الأماراتية والإتحاد هم بس اللي دايركت لكندا بدون ترانزيت على أوروبا أو امريكا ، وهذا شيء مهم بالنسبة لي اني انتظر في دبي أو أبوظبي ولا انتظر في فرانكفورت أو أمستردام أو هيثرو أو واشنطن ونيورك، أخترت طيران الأماراتية وشيكت على جدول السفر الى كندا بما يتناسب مع موعد الدراسة اسبوعين قبل الدراسة .

نرجع لمكاننا في الوزارة وعند مكتب الطيار بالتحديد ، رحت لهم هنا 3 مصريين اللي يشتغلوا هناك بس حبوبين ، سئلت الموظف اقدر اني احجز واخذ التذاكر من أي فرع للطيار بالرياض ،الدمام، جدة ولا لازم هنا عندكم داخل الوزارة قال عادي بس لازم ناخذ اصل أمر الإركاب هنا ونعطيك صورة منه مكتوب عليه رقم الملف، وهذا اللي حصل اخذت صورة وسجل عليه رقم الملف علشان اقدر اروح لأي فرع لهم واكمل سالفة الحجز ، أي شخص يبي يخلص أموره في فرع غير اللي في الوزارة يتأكد من انه مكتوب رقم الملف على صورة أمر الأركاب قبل لا يمشي من عندهم.

اخذت لي استراحة محارب لمدة ثلاث ايام من سالفة البعثة ونقزت على مكتب الطيار بالخبر ، جنب تاج للخياطة ومقابل البنك الهولندي الرئيسي. رحت لهم الصبح من بدري تفادياً لآي زحمة ، انتظرت دوري اعطيت اوراقي للمشرف عليهم اسمه نور ( هندي أو باكستاني بس عسل لا يفوتكم ) واعطيته جدول رحلة الأماراتية ( طبعته من النت) وقلت له ابي هذه الرحلة ، وعمل لي الحجز على نفس الرحلة اللي كنت ابيها ، تفاصيل الرحلة :

دمام - دبي ، مدة الرحلة تقريبا ساعتين - انتظار 8 ساعات في دبي
دبي - مطار بيرسون الدولي تورونتو ، مدة الرحلة تقريبا 13-14 ساعة بدون توقف.

الاتحاد الدولي للنقل الجوي IATA ينص قانونه اذا كان عند 8 ساعات انتظار أو اكثر يحجزون لك شركة الطيران في فندق على حسابهم ، وهذا اللي صار اعطاني الطيار تذاكر للفندق ورحت لمكتب طيران الأماراتية في ابراج الدوسري علشان يأكدون الحجز للفندق ، هناك ما فيه الا موظف واحد سعودي وما شاء الله عليه حبوب وخدوم أشار علي اني اخذ بطاقات سكاي وردز ، زي بطاقة الفرسان حقت السعودية وقال لي هذه تنفعك كثير دامك بتسافر أميال كثيرة ، بصراحة انا ما اخذت اللي عنده وعبيتها لكن دخلت على موقع الأماراتية وسجلت عن طريق النت وطبعت البطاقات.

وبكذا انتهينا من إجراءات البعثة كاملة وباقي لنا على موعد السفر 3 اشهر تقريباً.



وللحديث بقية.......

بالتوووفيق ,,, ياحوووبي ,, وننتضر البقيه ,,

تحياتي .. تركي بن عبدالله..

أما موظفين الوزارة ،،، تشوف الواحد فيهم مسوي وزير و المشكلة مو بس ما عنده هرجه إلا مرة (أبيض يا ورد) خخخ

بس الدرجتين مهمه جدا عشان البرستيج خخخ على بالهم ديكور .... هادا و إنت ما دخلت مكتب المدير تلاقي زحلاقة جوا ...

في انتظار البقية ...

كمل وربي انت ماشي صح
وماعليك من الشامتين حبيبي ان شاءالله خيره وان شاءالله حاجه احسن منها واسالني والله انا عارف ايش اللي براسك بس جزاك الله الف خير وانا اعطيك خيار اذا تقدر وهو امريكا ليش ماادري بس كمل اهم شي
لاتنسى ان مئات من الطلبه اخذوا علقه وبعدها شماته من الناس مايدرون ان الدنيا تدور كل يوم عند واحد كمل بالله

التوفيق للجميع عيوني ، ومعذرة اذا طولت عليكم بالكتابة والردود هاليومين وذلك لضيق الوقت عندي.