انتبه لا تغلط نفس غلطتي في بعثة كندا !!

هذه مشاركة خاصة بالمياه الخاصة بالشرب ، وايضاً حل لمشكلة المياه في دورة المياه اعزكم الله .

=================================

أول ما وصلنا على كندا وتحديدا على تورنتو ما كان فيه فرصة ان الواحد يلف فيها من اول يوم علشان يتعرف ويستكشف الأشياء وخباياها ، كندا مثلها مثل دول كثيرة في العالم تعتمد على مياه الحنفية/البزبوز/البلبلة ايش ما كانت لهجتك المهم انك تعرف ايش اقصد، قبل وصولي لكندا قرات في احد المواضيع ان احد المبتعثين يشتكي من انه يضع ميزانية لشراء الماء !! وكانت احدى الأخوات ترد عليه ليه ما تشرب من ماء الحنفية لانها تستخدمها كمصدر للمياه.

لما وصلت لكندا عرفت وفهمت الموضوع ، لما كنت في الفندق ايامي الاولي في تورنتو كنت استخدم مياه الحنفية وما فيه الا حنفية وحدة في الغرفة وطبعا تعرفوا انها بتكون في دورة المياه اعزكم الله، وبصراحة كانت المياه عذبة اكثر من الماء اللي يباع عندنا بالسعودية وطبعا ما راح تلقى في ثلاجة الفندق اي قارورة ماء . ما كنت محتاج اشتري ماء الا لحالتين :

1- اذا كنا خارج الفندق وحسيت بعطش انا أو زوجتي من كثر المشي اللي ما تعودنا عليه

2- عند اضطرار زوجتي دخول دورة المياه ، وهذه سالفة تؤرق جميع البنات هنا في كندا . سنأتي لتفاصيل هذه المشكلة وحلها.

المهم لما نقلنا على الشقة ولما جيت اجرب مياه حنفية المطبخ ما لقيتها صافية بل ان فيها شوائب وتبان للعين ، هنا عرفت كلام خوينا اللي يحط ميزانية ورد الأخت عليه ، مو كل مبنى أو عمارة يوفر اجهزة تصفية للشقق ، اما الفنادق هذا شيء اساسي عندهم وانت وحظك يطلع المبنى اللي تتأجر فيه شقتك الماء يكون مصفى أو لا .

اشتريت صفاية تتركب على الحنفية حيث اني لقيتهم يتكلمون عنها في نفس موضوع خوينا اسمها Birta هذا موقعهم
Britaآ® Water Filtration Systems

اشتريتها بمبلغ 39 دولار من كنديان تايرز وانا حاط في بالي انها بتريحني من سالفة الماء الغير صافي ، لكن اكتشفت انها ولاشيء لا ماء تصفى وخلص الفلتر خلال كم يوم بس مع انه المفروض يصفي لغاية 100 لتر واللي استعملته كتجارب ما يجي حتى 10 لتر ، فكان مصيرها الرمي في الزبالة .

عاد ما فيه الا اني يومياً اشتري قوارير ماء ، وهنا ما يبيعون بالكرتون اما بالحبة او 6 حبات بكت ، كل مرة كنا نجرب نوع من انواع المياه التي تباع ولا اخفي عليكم سر انه فيه تفاوت كبير في الطعم وحتى احيان الرائحة للماء بين الانواع بعض الانواع اذا شربتها وانت تأكل تقول هذه توب واذا شربتها لوحدها الله يعينك واغلبها ما تنفع للطبخ او حتى تسخين للشاهي والقهوة ، لين صفيتا على 3 انواع وهي :

1- Aquafina

وهي افضل مياه ، لكن كل شيء بحسابه هي اغلى نوع راح تشتريها سعة 1.5 لتر تباع بسعر 2.50 دولار، وهي منتج لشركة بيبسي كولا.

2- Dasani

وهي ثاني افضل مياه راح تلقاها والكل يفضل استخدامها سعر 1.5 لتر بمبلغ 2.20 وهي منتج لشركة كوكاكولا.


3- Naya

وهي ثالث افضل مياه وارخصها 1.5 لتر بمبلغ يتراوح بين 0.70 - 0.99 دولار حسب المكان اللي تباع فيه وهي منتج لشركة كندية .


وطبعا هناك احجام مختلفة واسعار ايضا مختلفة .

بعد فترة من الزمن لقيت اني اصرف مبالغ على المياه وكان لابد من من حل لهذه المشكلة ، ولقيت ان افضل حل هو شراء القارورة الكبيرة اللي كثير منا يستخدمها في منزله بالسعودية للبراد ، لقيت انواع واحجام تبدأ من 15 لتر الى 21 لتر في اماكن مختلفة لكن كل مكان تلقى عنده نوع معين ولا تلقاه في مكان ثاني وفوق هذا اذا اشتريت من عندهم بتضطر انك كل ما خلصت انك تروح لهم علشان تستبدلها !!! فكرت اني اشترك في شركة مياه ويوصلون للبيت مثل ما انا مسوي في السعودية لكن سعر الاشتراك مبالغ فيه هنا .





======================

تكلمنا سابقاً عن مشكلة شطاف الماء في دورة المياه وكيف لم استفيد منه لما جلبته معي من السعودية ، كنت استعمله لغاية ما القى حل يفكني منه ، ما اكذب عليكم شقد هالموضوع شاغل بالي خصوصا لما نكون خارج البيت ، يعني احنا الرجال يمكن يمشي حالنا لكن بالنسبة للبنات الوضع مختلف عندهم تماما ، وهذا اللي يخليني ادور على حل سريع لهذه المشكلة ، ما خليت موضوع ولا منتدى الا دورت فيه ، لقيت موضوع لشباب في كندا يستخدمون مسدسات الماء كطريقة واخرون يستخدمون جيك للزراعة وانواع واختراعات مع انها حلول لكنها لم تكن لتناسبني ، فضليت ابحث حتى طحت على موقع ولقيت فيه ما ابحث عنه تماماً ، اذا كنت مكاني شنو كنت بتبحث عنه ؟؟؟ حل لمشكلة حمام الشقة ؟؟ حل لأهلك خارج البيت ؟؟؟ أم الأثنين معاً !!!؟

اوكي نتوقف بريك هنا ونكمل بعدين.....










هههههههههههه ادري ما ينفع البريك هنا .


اوكي لقيت الأثنين معا في احد المواقع الأمريكية

Mini-Shower for Faucet - Bidet and Multi-Use Personal Spray Wand

هذا الشطاف حل كارثة الماء البارد ، حيث انه يركب على الحنفية مباشرة بكل سهولة وبدون ما تكون عندك اي شهادة سباكة وتختار الماء عادي بارد حار اللي يعجبك ، وعندما تركبه لا تحتاج لإزالته بتاتا حيث تقدر تستخدم الشطاف أو الحنفية ، فقط حرك الهاندل وانتهى الموضوع خلال 2 دقيقتين فقط تركبه وتستخدمه.

يا سلام ايش تبي احسن من كذا وياليت الموضوع هنا وبس !!!

لكن يأتي مع هذا الشطاف للإستخدام النسائي البناتي اللي هو ، المهم انه يفك ازمة لما يكونوا خارج البيت سعره 40 دولار لكن يأتي مجانا مع الشطاف أو هكذا يبونك تفتكر المهم ما فرقت معاي على السعر انا كذا كذا شاريه شاريه ،

عن طريق الموقع اشتريت الشطاف بالكريدت اونلاين ، كلفني كله على بعضه مع الشحن خلال 8 ايام بالضبط 90 دولار أمريكي . أدري اذا بتحسبها بالريال بيطلع حول 350 ريال قيمة شطاف لكن الحاجة تبرر الوسيلة.


اوكي اعتقد كذا تكلمنا عن سالفة المياه بشكل موسع ، واذا عندكم اي استفسار انا بالخدمة .

جزاك الله خيرا اخي الفاضل ويسر لك كل امورك , عندي سؤال الله يحفظك ,ما شاء الله انت لغتك الانجليزية ممتازة حبيت اسالك هل سمعت شي عن مستوى معهد king gerge international college,والشي الثاني انا بستاجر شقة جنب هذا المعهد وفيه اثاث معروض علي عبارة عن ثلاث قطع كنب مع طاولة وتلفزيون بلازما مع طاولة , وسرير نوم ومايكرويف وصاحب الاثاث استخدمه لمدة شهرين بمبلغ 2700 دولار كندي , هل هذا المبلغ مناسب حسب خبرتك ,واعذرني على الاسالة ولكن احببت استشير شخص له خبرة في كندا مع شكري لك مقدما

السلام عليكم ورحمة الله وبركاته

الصراحة أنا من يوم 27 فبراير 2010 وأنا أقرأ موضوعك الشيق لأول مرة واليوم وصلت للصفحة 46 وانا مني مصدق نفسي 5 ايام وانا اقرأ
اخيرا والحمدلله
(الي يارب تستمر الى الابد الين ماتاخذ الدكتوراة ان شاء الله ونشوف عيالك كبار في المدارس)

انا من المبتعثين الي كنت اقدم منك في تورنتو من المرحلة الثالثة من 6-2008 ولكن مريت بظروف اصعب منك كثير وكتبت بعضها في الرابط
http://www.mbt3th.us/vb/forum92/thre...#axzz0gtf2Fh1m
يعني قد يفيد بعض الاخوان او الاخوات
علشان يتعظون مننا ومن البلاوي الي ورطنا فيها
كتبت جزء من معاناتي لمن كملت شهر تقريبا بس في مكان واحد يمكن قليل الي لاحظوه لكن مو مهم
لانه يخص المبتعثين والمبتعثات الي في هذاك الوقت
لانه حسيت انه المراحل الي بعدنا اتحسن وضعهم عننا (الرابعة والخامسة) من أمور كثيرة مثل فتح الملف وانزال او مكافأة
ولكن بصراحة كلامك كان نابع من انسان خبير في الحياة

وفي تجارب كثيرة انا مريت بيها مثلك وبالفعل اعتقد 90% من المبتعثين والمبتعثات مروا بالمشاكل الي انت ذكرتها
واتمنى انه القادمون من الخلف (المرحلة الخامسة) انهم يحطوا في اعتبارهم الامور هذي وما يلدغوا مثل ماانلدغنا

اعجبني كلامك ومساعدتك للناس الي بالفعل احنا مفتقدينها احيانا من اقرب اخ او جار او صديق

كلمة من قلب صادق ومخلص - الله يرزقك ويوفقك في دنياك لاخرتك عمل يرضاه - ويرزقك بالذرية الصالحة ويوفقك في دراستك انت وزوجتك وكل من تحب - اللهم آمين

وأنا والله بأدعيلك ترى على الفجرية - ان شاء الله تكون ساعة مستجابة يارب

اللهم ووفقني ووفق جميع المبتعثين والمبتعثات في دراساتهم ويارب نرجع كلنا رافعين راس عوائلنا ودولتنا ونكون مفخرة الأرض ان شاء الله
ونرجع نطور بلدنا ونحسن من المستوى الثقافي والاجتماعي والحكومي وجميع القطاعات يارب

وانا اتمنى اشوفك ان شاء الله لمن اجي تورنتو

قبل مااجي ان شاء الله حأرسلك ايميل

اذا انك تسمحلنا نسلم عليك وجها لوجه
لانه السلام الالكتروني هذا ماينفع لانه غير مباشر

واحنا الي عانين نفس العناء و كلنا خبراء في العملية دي نحس ببعض كتير في كل كلمة كتبتها

وعلى العموم الكلام يعجز عن التعبير يالغالي وكلمة الحق خرساء احيانا
بس مررررررررررررررة يسلموووووووووو

على الموضوع وعلى الجهد الرهيب وانت تستاهل كل خير

تقبل مروري وبالله التوفيق