انتبه لا تغلط نفس غلطتي في بعثة كندا !!

بسم الله الرحمن الرحيم

في البداية أحب ان أتوجه بالشكر الجزيل لطاقم إدارة منتدى مبتعث على الجهد المبذول والذي لا يخفى على أحد مدى حجمه، وأشكر جميع أعضاء مبتعث سواء من كانوا زوار أو مشاركين في موضوعي هذا الذي دام أشهر كثير من الوقت ولم ينتهي ، جمعني موضوعي هذا بأشخاص كثيرون فكانوا كالأخوة والأخوات لي ، لم آرهم ولم أكلمهم ولكن الموضوع هو وسيلة التواصل بيننا ، الكثير منهم كان زائر دائم في بريدي الإلكتروني فكنت اتلقى ما لايقل عن 20 إيميل يومياً وكنت قدر المستطاع اني ارد عليهم في أسرع وقت ، على الرغم من وجود حياة خاصة لي ولأهلي ووجود حياة دراسية ووجود حياة إجتماعية فلم أبخل على أحد منكم بالمساعدة والرد .
ولكن لكل بداية نهاية ، واليوم هو نهاية وأخر عهدي بمبتعث... كُنت أتمنى إكمال موضوعي هذا لكن للأسف لم يعد هناك مجال للإكمال، لماذا ؟؟؟؟ سأحكي لكم ما جرى لي في الفترة الماضية و استفيدوا منه وانتبهوا لا تغلطوا فيه اذا حصل لكم شيء منه .

منذُ ما يقارب الشهر ، وبينما كنت اشيك على حسابي البنكي لاحظت انه هناك مبلغ تم خصمه من الحساب من قبل الشركة الجديدة التي تدير وتشرف على المبنى الذي اسكن به ، وهذا المبلغ يعادل 3 اشهر إيجار ، فنزلت لمشرف المبنى استفسر عن الموضوع ، فقال لي احنا أرسلنا لك خطاب يفيد بزيادة مبلغ الإيجار 50% ، جلست اناظر فيه هذا يستهبل ولا ايش ؟ فقلت له انا ما وصلني أي خطاب ولا شيء وبعدين أو مرة اسمع بزيادة في ايجار 50% ، فقال لا احنا ارسلنا لك ، قلت له عطني اثبات انكم ارسلتم لي ، لأنه في مثل هالحالات لازم تكون خطابات رسمية ومرسولة على البريد المسجل ولازم توقعي للإستلام وليس تسليم باليد فقط في المبنى ، فراح يدور في ملفي عندهم ورجع لي وألوانه متغيره فقال لي سوري شكلنا نرسل لك الخطاب على البريد !!! فكت عيوني كأنها انوار جمس والدم طق لمخي ومسكت نفسي على اخر لحظة لا ارتكب فيه جريمة فقال لي بكل برود مو انت مدعوم من سفارة بلدك مالياً ليه انت زعلان الحين ، وقتها انقطعت كل سبل المؤدية للحوار الأدبي عندي وجلست اصارخ عليه وكنت شوي واذبحه لكن تعوذت من الشيطان واخذ نفسي وخرجت من عنده ، طلعت شقتي اهدي نفسي وقلت اتصل على الشركة بدل ما تكلم مع مشرف المبنى و من بكرة الصبح اتصلت عليهم فقالوا لي يا سيد فلان انت شخص غير مرغوب فيه في المبنى وعندك 15 يوم علشان تخلي الشقة والسبب انك تهجمت على مشرف المبنى !!!!
قفلت من عندهم ورحت اطلع العقد للشقة واحلل امه كلمة كلمة ، فلقيت انه فيه شروط الزيادة في اسعار الإيجار :

1- لا تتم زيادة الإيجار على المستأجر اذا لم يمكث بالشقة اكثر من سنة ، يعني اذا صار لك اقل من سنة ما يحق لهم زيادة سنت واحد على ايجارك في العقد الموقع.

2- أي زيادة فوق 5% (خمسة وليس خمسين) لا بد من الؤجر ان يحصل على موافقة من جمعية المؤجرين بمدينة تورنتو.

3- ان يتم شرح أسباب الزيادة من قبل المؤجر للمستأجر

4- لا تسري الزيادة على المستأجر الا في حال :
مضى على عقده سنة كاملة
موافقة موقعة خطيأً من قبل المؤجر والمستأجر معاً
ان تكون الموافقة قد ارسلت للمستأجر قبل 3 أشهر من نهاية السنة للإجاره

5- في حالة عدم قبول المستأجر بالزيادة ، يتم اكمال عقده السنوي للنهايته ، وان يرسل خطاب للمؤجر يفيد بتركه للشقة قبل 60 يوم أو 30 يوم ( حسب نوع الملكية المؤجرة) من نهاية العقد، دون حساب أي زياده عليه.

أخذت العقد ونقزت على جامعتي ورحت عميدة كلية القانون ، قلت لها ابي ارفع قضية على الشركة المشرفة على مبنى سكني وأبي مساعدتك ، بعد ما شرحت لها الموضوع وقرأت العقد قالت لي قضيتك مليون بالمية ربحانة ، واتصلت على احد طلبتها المتخرجين من سنة الآبيض والأسود وقالت له يأخذ قضيتي ووافق ، وانا خارج من عندها اتصلت على السفارة السعودية وعطيتهم الهرجة قالوا لي عندنا محاميين معتمدين ولكن اذا تبي هذا المحامي فهو على مسؤليتك وما نضمن لك اي شيء حتى اتعابه قلت لهم مو مشكلة فقالوا عطنا معلوماتك وراح نرجع نتصل عليك ، اتصلوا علي بعد يوم وقالوا لي وكلنا لك محامي وطلع نفس المحامي اللي كلمته العميدة !!! آآآآآه يا قلبي على شغل السفارة السعودية ، معليش ابلعها وانا ساكت انا اللي محتاج لهم الحين .
رحت للمحامي جلست معه وعطاني تصوره للقضية وقال لي تبي نكلمهم ونحلها بشكل رسمي بدون محاكم أو ترفع قضية ، قلت له ابي ارفع قضية من القهر اللي فيني . فقال لي وش بنسوي وشنو بنطالب فيه في قضيتنا ، ورحنا المحكمة ورفعنا قضية رسمية ضد الشركة لمخالفتها شروط جمعية المؤجرين ، ولإستغلاها جهلي بالأنظمة العقارية ( على اخر عمري طلعت جاهل بس معليه جاهل عن جاهل يفرق) لطلب زيادة غير مشروعة ابداً خصوصا وان مبلغ الزيادة يعتبر فلكي مقارنة الزيادة السموح بها التي هي تتراوح بين 1% الى 15% فقط ، وايضا لما سببته من اضرار نفسية ومعنوية لي انا،هذه حجة علشان نأخذ فلوس منهم ، بعد ما يصير احنا في دولة تستانس على هالأشياء.و اصدرنا قرار يبطل طلب الشركة مني اخلاء الشقة والبقاء فيها طول المدة المتبقية في عقدي.
ومن بكرة اتصل علي محامي الشركة وجلس يهرج ويمرج ، وانا موصيني المحامي اني لا اتكلم في اي شيء الا بوجوده تفاديا لأي كلمة اقولها ويستخدمونها ضدي ، كل اللي قلته له كلم المحامي حقي وبس. بعدها بثلاث ساعات اتصل علي المحامي حقي وقال لي ، انهم عارضين علينا تسوية للموضوع مقابل سحب القضية من المحكمة ، والشغلة فيها سكن بلاش لمدة 3 سنوات ومبلغ مالي يستاهل ، وقال فكر في الموضوع ومرني بكرة المكتب نتناقش.
فكرت بالموضوع وقلت الحين محاكم وما نعرف متى تنتهي القضية وكل مرة روح المحكمة وتعال وانا وراي دراسة فما ابي اوجع راسي اكثر من كذا ، ايش ابي اكثر من سكن بلوشي وفلوس فوقها ، فرحت له وقلت له انا موافق على عرض التسوية ، ووقعت معهم التسوية بعد يومين وبكذا تقفلت القضية ، وطلعت منها ربحان بكل المقاييس ولا اني خليت هالكلاب يستغفلوني لاني غريب وجاي ادرس ببلدهم وما افهم شيء بنظامهم .

بعد ما تنفست الصعداء ونفسيتي زي الفل ، قلت خليني اروح اتمشى اغير جو شوي كان وقت ظهرية ، وكنت اتمشى في الداون تاون فدخلت مطعم عنده شيشة ، قلت اخذ لي نفس على الطاير . كان هناك شاب جالس يشيش في الركن لحاله ومن هيئته سعودي ، فرحت جلست قريب منه سلمت عليه من وين الأخو ، سعودي ، هلا والله زمان صار لك في تورنتو ، لا جديد ما صار لي 10 ايام ، الأخ مبتعث ، لا مرافق لزوجتي ، ما شاء الله طيب بدأت دراستكم ولا لسه ؟ ، ان شاء الله بعد الويكند على طول ( كان يوم خميس) ، بأي معهد ان شاء الله ؟ قال لي المعهد الفلاني ، قلت له وان شاء الله ساكنين قريب منه ، قال لي لا والله للحين جالسين في فندق ورسم على وجهه تعابير الحزن والآسى ، قلت له ترى عادي اخوي الكل هنا اول ما يجي يتمرمط اول الايام وبعدها تزين الأمور ، قال لي والله انا تعبت وانا ادور واسئل من قبل ما اجي على كندا ، قلت له دامك دورت وسئلت المفروض انك عرفت طريقك ، لكن وش السبب ؟ قال لي كنت شاد الظهر بالمبتعثين الموجودين هنا ما خليت احد ما راسلته بمنتدى مبتعث ، اللي جحدني واللي وعدني واللي وصلني القمر بكلامه واخرتها ولا شيء ، كسر خاطري الولد وحسيت بمعاناته ، وبيني وبينكم الشيشة عاطية جو مع الكلام الحزين ، المهم سئلته طيب وش وعدوك هالعالم ، قال انهم بيساعدوني لما اوصل ويضبطون لي السكن مع زوجتي اجي من المطار على الشقة على طول كل شيء جاهز مجهز ، قلت له ما اعتقد فيه احد هنا اصلا يقدر يسوي كذا خصوصا ان الشقة لازم انت اللي تشوفها وتوقع عقدها وما احد راح يوقع عنك القعد ويسكنك اول ما تجي من المطار ، قال الا فيه واحد وعدني يضبط لي كل شيء ، قلت له منوا هذا اللي ينصب عليك قال لي واحد ينقال له ستيلثي في مبتعث .

أوكي وقف قلبي لما سمعت هالكلام ، قلت له انت متأكد من كلامك قال ايه والله العظيم هو واعدني بكل شيء ، قلت له استغفر ربك يارجال لا تحلف ، قال لي قسم بالله ، اوكي وش سالفتك مع هالأدمي بالضبط ، قال لي هو حاط موضوع ينصب فيه على العالم في مبتعث انه يساعد الطلاب الجدد ، بعدين سئلني فجأة انت تدخل منتدى مبتعث ، قلت له قليل يعني اذا صار عندي وقت دخلت اطق اطق على المواضيع ، قال طيب تعرف هذا ستيلثي قلت له هذا مشرف في المنتدى يعني ولا شلون ؟ المهم تطمن الرجال اني مالي علاقة لا من قريب ولا من بعيد وساق على الكلام في ستيلثي ، قال هذا نصاب نمرة واستمارة تلاقيه وش حلاة لسانه لما يرد على العالم وابشر وكل شيء اوكي ووووو ولما يجد الجد يجحدك اذا ما ما تعطيه فلوس لكل سؤال تسئله ويجاوب عليه ، قلت له بذمتك يا رجال هالأدمي اللي تتكلم عنه كذا قال ايه والله ، ارتفع ضغطي وانا اسمعه ، قال وفوق هذا اول ما وصلنا على تورنتو كلمته وقال لي يبي فلوس علشان يضبط لنا السكن فقلت له انا توني واصل الحين كيف اعطيك فلوس قال لي تبي والله دبر نفسك وقفل الخط ، فرجعت اتصل عليه وخليت زوجتي تكلمه يمكن يحن عليها ، هنا ما قدرت استحمل وما شفت نفسي الا وانا ماسكه من ثيابه وقلت له الحين انا يا زبال سويت كذا معك وطلبت منك قرش واحد علشان ارد عليك وبعدين من متى تعرف رقمي و اعرف رقمك علشان نطق حنك انا وياك ولا بعد بكل قلة حيا خليت زوجتك تكلمني ليه منت رجال كفاية علشان حرمتك تمشي امورك ، والمصيبة تحلف بالله كذب وفي وجهي بعد ، اجل وش جالس تقول للعالم عني . جاء صاحب المطعم وهو يعرفني وانا اعرفه ومسكتي تعوذت من الشيطان وتركت الولد من يدي الا هو حاط رجله وانحاش برى المطعم .

أوكي هذه قصتي للفترة الماضية وسبب ابتعادي عن هذا المنتدى للأبد ، لآن فيه ناس اقسم بالله انهم احقر من الحقارة المكاتب في السعودية تنصب عليهم بألالاف الريالات ويشتكون في المنتدى ويقولون العوض على الله ما نقدر نسوي شيء ولما نساعدهم بالمجان لوجه الله هذا الجزاء اللي ننوله منهم.
كثير من الاعضاء وعدوني بمبالغ مالية مقابل مساعدتهم لكن وربي لا إله الا هو ، كان ردي لهم تكفيني منك دعوتك ودعوة والديك ، واذا احد قلت له ابي هللة واحدة منه فليتفضل على الملاء ويقول اني طلبت مقابل مادي لأي شيء ويجعل الله شهيدا على كلامه ، وبعدها يطلب من الله التوفيق في سفره وغربته ودراسته .

أعتذر لكل شخص غلطت عليه أو بحقه خلال المدة التي قضيتها معكم هنا ، اعتذر من اللي يرسلون لي على الإيميل لآني لا أستطيع خدمتكم بعد اليوم ، اعتذر اذا بذر مني أي شيء وحسيت انه موجه لك شخصيا ، اعتذر على الهفوات الإملائية في موضوعي هذا التي قد تغير معنى الكلمة لربما مع الكتابة السريعة لا انتبه لها.

اذا استفدت من موضوعي هذا ادعي لنفسك بالتوفيق والهداية قبل ما تدعي لي ، فلربما تحتاجها اكثر مني.

وداعاً ، وانتبهوا لا تغلطون نفس غلطتي.