اخواني افيدوانا نحن الدارسين على حسابنا الخاص كندا

والله وناخوك شوف ،، الانضمام للبعثة في كندا كان مثل السلام عليكم ،، اول ماتوصل مباشرة يتم ضمك خلال شهرين ،، لكن هالحين ما اعتقد صراحة خاصة مع كثرة الطلاب والمبتعثين ،، فأنت وناخوك اذا تبي تسافر لكندا مثلا ،، ضع في حسبانك انك راح تدرس اقل شي اقل شي ست شهور على حسابك ،، وأول ماتوصل تقدم مباشرة على الملحقية ،، الواحد مايضمن يمكن ابو متعب يصدر مكرمة ثانية يمكن يرحمونك ويضمونك ماتدري .
لذلك انتبه تروح لكندا وانت حاط براسك ان البعثة بتجيك بسرعه او خلال شهر او شهرين الا اذا كنت مخلص مرحلة اللغة وداخل في الكليه عاد هذا كلام ثاني .

بالنسبة للسفارة الكندية في السعودية ،، اذا كنت تبي تقدم على فيزا اكيد تطلب ضمان مالي ،، لانها تبي تعرف انك انسان قادر ماديا انك تدرس على حسابك مو تروح عندهم وتصير عاله عليهم ،، طبعا هذا تفكيرهم ،، وعلفكرة قيمة الضمان المالي ماتضمن لك قبول الفيزا ،، يعني اخبر لك واحد معطيه ضمان مالي بقيمة ستة مليون ورفضوا طلبه وواحد معطيهم ضمان مالي بقيمة عشرين الف دولار وقبلو طلبه ،، فالسالفة انت وحظك وهذا اللي اكتشفته للاسف بالسفارة الكندية بالسعودية .

والضمان يالغالي تطلبه السفارهـ ومتى ماجاتك الفيزا الباقي يهون ،، وبالنسبة لمبلغ الضمان المالي يعتمد عليك ولكن كل مازاد كل ماكان افضل ،، ومثل ماقلت لك انت وحظك ،، ويفضل انك تحسب تكلفة دراستك وتكلفة المعيشة والمصروف وتضربها بالمدة اللي بتقعد فيها وتجيب ضمان مالي بالمبلغ الناتج وزيادة .

وبالنسبة لقبولات المعاهد الاخوان مايقصرون معك ،، وبامكانك انت تراسل المعاهد وتطلب منهم قبول ،، واذا كنت تعرف اي زميل هناك فكلمه يجيب لك قبول وريح راسك .

بالتوفيق

طيب لو نويت اكمل على حسابي الخاص بكندا مع قبول غير مشروط (جبت درجة التوفل المطلوبة) وبدون قبول المعهد، كيف الاجراءات وسرعة الالحاق بالبعثة؟

شوف يالغالي .
اسهل طريقة وافضل طريقة عشان تضمن البعثة ان شاء الله ، اتبع شروط انضمام الطالب الخاص لحساب البعثة وهي :
انهاء مرحلة اللغة الانجليزية وثلاثين ساعة اذا كانت بكالريوس ،، عند تحقيق هالشرطين ان شاء الله الانضمام راح يكون مضمون باذن الله .
حتى لو انهيت مرحلة اللغة وصرت جاهز لبدأ الدراسة الجامعية تعتبر حققت شرط مهم جدا واحتمال يضمونك قبل ماتنهي الثلاثين ساعة ،، لكن الاحتياط واجب والانسان يتعامل مع الامور بالواقع مو بالخيال ولو ولو .
فهمت وش اقصد يالغلا .

أنا عندي لك اقتراح اذا كانت حالتك المادية ضعيفة نوعا ما وماودك تسافر الا وانت قريب جدا من الانضمام وهي :
أنك تروح لماليزيا وتدرس في معاهد اسمها ELS ولها فروع في كندا ،، بصراحة لاحظت تدريسهم للرايتنق واهتمامهم فيه مثل اهتمام المعاهد التابعه للجامعه الكندية ،، وارخص منها بكثيررر ،، يعني تروح لماليزيا وتدرس في احد فروع هالمعهد بالشهر راح تدفع لهم تقريبا 2200 ريال وتتعلم الرايتنق اللي تهتم فيه جدا المعاهد الاكاديمية في كندا وتاخذ التوفل من عندهم ،،، وعقبها تسافر لكندا ومباشرة ان شاء الله تنضم للكلية بدل ماتضيع فلوسك ووقتك على معاهد الجامعات ،، لا والمشكلة انا سمعت من بعض الطلاب ان المعاهد التابعه للجامعات تتعمد ترسيبهم عشان تستفيد من فلوسهم ،، لان الملحقية تدفع لهم ،، والله أعلم .

اما ان كنت مستعجل على كندا وتبي تدرس فيها ،، فالاول تطلع فيزة الدراسة ،، وأول ماتوصل الاراضي الكندية تقدم اوراقك للملحقية ، لانه ماتدري يمكن تجي مكرمة من ابو متعب او تجي مفاجأة ويضمون جميع الطلاب ،، وعقب ماترفع اوراقك تدرس على حسابك لحد ماتنهي مرحلة اللغة وثمن تسجل في الكلية وتخلص الثلاثين ساعه اللي يبونها ،، وعقب ماتخلص الثلاثين ساعه ان شاء الله تضمن البعثة لانك حققت كامل الشروط .
ومثل ماذكرت لك انت وحظك ممكن تنضم اول ماتخلص مرحلة اللغة وممكن تنضم وانت تدرس اللغة وممكن ماتنضم لحد ماتلبي جميع الشروط .

اتمنى اني افدتك يالغالي ،، واي استفسار ان شاء الله نفيدك او يفيدونك الاخوان .