طلاب كندا ابغى مساعدتكم

وعليكم السلام ورحمة الله
1-كل المناطق كويسة اهم شي ما تنشغلي بامور الحياة وتركزي في الدراسة/ بالنسبة لية افضل المناطق النائية لأن الكنديين هناك اجتماعيين اكثر من المدن الكبيرة
2- طريقة الدراسة نفس طريقة امريكا ولو يغلب قليلا الصعوبة في كندا من وجهة نظري والتوفل او الايلتس او الكان تست او الكايل كلها مقبولة في كندا وكل وحدة لها نمط معين في الاسئلة
3- التقديم بنفسك افضل / لأنو المكاتب اغلبهم نصابين ويطولو الين يجيبولك قبول. قبول المعهد سهل ولكن قبول الجامعة عليه كلام بعض الجامعات تعطي قبول مشروط وبعضها ماتعطي قبول مشروط باللغة او انك لازم تجيبي فوق 5 في الايلتس عشان تجيبي قبول
فانكوفر كويسة اذا ماتحبي البرد كثير لأنها ادفى منطقة في كندا/ كثرة السعوديين والصينيين فيها تعتبر بالنسبة لية سلبية

شكرا اخوي مصطفى ، انا ابغى منطقه ملائمة للدراسة اكثر وكثرت العرب عموماَ سلبيه كمان ، بس انا ما عندي اي خلفية عن كندا و لا اعرف احد هناك
والصعوبه في كندا من اي ناحيه اخوي ؟
انا اختبرت التوفل ولكن للاسف النتيجه سيئه ، لذلك ابغى ادرس في المعهد واخذ الوقت اللازم عشان اقوي فيه لغتي ،بالنسبة للتقديم للجامعة في كندا عموماً ايش هيا متطلباتهم الاساسيه ؟
اتمنى ما اكون ازعجتك و الله يوفقك

العفو اختي
طبعا بالنسبة لية اوتاوا تعتبر مناسبة لأني عايش فيها وكل شي فيها متكامل وكثرة العرب تعتبر كثيرة بس الواحد لمن يدرس ما يحاول يحتك بيهم كثير يحتك بالكنديين نفسهم وبالتالي حتكون الفائدة بالنسبة للغة.
الصعوبة في طريقة الدراسة طبعا انا ما درست في امريكا عشان اقارن بس من اللي اسمعو من الشباب اللي حولو من امريكا قالو كندا اصعب(صعوبة مقررات)

اللغة يبالها وقتها ,وبالنسبة للمتطلبات شهادة الثانوية مترجمة وبعضهم يطلبو شهادة حسن سيرة وسلوك,وكشف درجات كمان مترجمة ومصدقة من وزارة الخارجية,صورة من جواز السفر هذا اللي اعرفو وطبعا لغة عشان تدخلي الجامعة

أهلا أختي

1. أنصحك ماتقرري دراستك على حسب المنطقة انما على حسب التخصص اللي تحبيه واختيار افضل جامعة فيها التخصص لانه الدراسة هي الاهم ومع الوقت راح تتعرفي على المنطقة

2. طريقة اللغة في كندا اما انك تعدي اللغة من معهد الجامعة وهاذي الشهادة مقبولة غالبا فقط في نفس الجامعة او انك تعدي التوفل او الاليتس وتقدمي على اي جامعة بشرط انه الدرجة اللي جبتيها في الاختبار تكون مقبولة في الجامعة اللي قدمتي عليها

3. الافضل انك تقدمي بنفسك. اولا اغلب المكاتب كلها نصب واحتيال ثاني شيء قبول البكالوريوس جدا سهل فقط تعبي الابلكيشن وتدفعي رسوم التقديم (والملحقية راح تعوض هذه الرسوم) وغالبا يقبلوا يعطوكي قبول مشروط يعني بشرط اكتمال شرط اللغة

أشدد على اهمية التركيز على التخصص وليس المنطقة لان هذي الدراسة اللي راح تدوملك في الشهادة

موفقة يارب

لا تتضايقي بسبب درجة التوفل, معظم الطلاب (وهذا الافضل) يختبروا كذا مرة الين مايجيبوا الدرجة المطلوبة (الملحقية تعوض على الاختبار مرة كل شهر)
أغلب الطلاب كمان يجوا كندا مايعرفوا احد لكن مع الوقت راح تتعرفي على ناس كثير, والكنديين شعب طيب وغير عنصري
بالنسبة لمتطلبات الجامعة تفرق شيء بسيط من جامعة لاخرى انما اغلبهم يطلبوا لغة (لان الانجليزي مهي لغتنا الام) + درجة ثانوي عالية (في الممتاز و الجيد جدا) + رسوم التقديم + تعبي الابلكشن (اسمك - عمرك....الخ)