هل المكافئة تكفي أم لا ؟؟؟ هنا الإجابة ..

الى اخر يومين في الشهر اذا فيه زيادهـ ترى مانقول لا ..

عزيزي اذا كنت تقصد زيادة المكافئة ،، أكيد ماراح أقول لا ،،

ومن اللي بيقول لا ؟؟!!!!!!!

انت ما فهمت اخوي مسافر
فيه إخوان من النوعية اللي " تذمر تذمر تذمر حتى تطلب أكثر و للأسف أحيانا المسؤولين ياخذون منهم و أحيانا تتطربق الأمور على ها المتذمرين و تعم المصيبة على الكل "
و للأسف على قولك ، فيه شباب عديمي المسؤولية يصرف المكافأة من الضرس للضرس و يجي يبكي بالتلفون عند أميمته و يهك عليها بكلمتين علشان يرسل له أبوه قرشين ، و يجيك أبوه إذا هو نشيط و يصج العالم في الصحافة و التلفزيون و لا عند المسؤولين إن عيالنا تشردوا بره و فقرتوهم .... إلى آخر سلسلة العمليات

انا بالنسبة لي توني هذي ثاني مكافاه تنزل لي

اشوف ان المكافاه تكفي وتزيد
ذكرته بأحد المواضيع
الشهر هذا بقي معي 300$
مع العلم اني اشتريت حاجه بـ 600$
يعني لو ما شريتها كان باقي معي 900$

يعني اعرف احد الاشخاص
تلااقيه اول ما تنزل المكافاه ينزل السوق يشتري ملابس
ويشتري مدري وشو
ويروح يشتري اشياء ما يحتاجها ومو ضروريه
وكل يوم او كل يومين نايت كلوب
او تلاقيه ينزل تورنتو كل ويك اند ويصرف بشكل غير طبيعي اجار سياره وشقه واكل ونايتات و و و و

وآخر اسبوع يقول والله المكافاه خلصت !
والمكافاه ما تكفي ..

الله يعين الجميع .
الف شكر

- - - مشاركة محدثة - - -

بالنسبة لي تكفي و بزيادة الحمدلله .. و اوفر كل شهر ما بين ٩٠٠ - ١٢٠٠ دولار .. و فوق هذا عندي سيارة .. من الامور اللي تساعد على التوفير ان الواحد يحط ميزانية كل شهر .. و يبتعد عن الاشياء اللي الغير ضرورية .. فعلاً كلام الاخ مناحي صحيح .. أنا ما أعاتب الشخص و طريقة صرفيته لان هذا الشي في الاخير حقه و لا في أحد يقدر يحاسبه ، بس المشكلة لو جا هذا الشخص و بدأ ينتقد " هو بوادي و الانتقاد بوادي " و يسب الملحقية و كأنهم سارقين حلاله .. كل ما صار له شي يعلقه بالملحقية .. و هذه العينة كثييييير منهم ماخذ البعثة " سياحة براتب " .. من الاشياء اللي البعض يسويها و استحي اني اذكرها ، انه لتعرف على بنت يشتري لها هدية كل اسبوع عشان ترضى تطلع معاه .. و عادةً ما تقل عن ٢٠٠ دولار .. مدري لأي مرحلة في السذاجة وصلوا لها .. الله المستعان .. تحياتي

انا ماأعرف ضروفكم
لكني شخصياً مرافق وعندي ابن
الابن تكلف حضانته 1200 دولار
وكروت مواصلات 208
ودي اس ال وكهرب بواقع تقريباً 120 كل شهر واجار شقه ب1600
ونقال ومصاريف اخرى للأبن ومستلزماتها
تقريبا الاصول 3500 هذي لازم ادفها كل شهر كفواتير ومصاريف ثابته ويبقآ لي 1000 دولار من المكافئة مصاريف اكل وشرب ومصاريف آخرى
من ال1000 اوفر كل شهر مابين 100 إلى 200 دولار يعني كل شهر مصروف العائله كامل بين 800 دولار و900 شامل الأكل والشرب
الموضوع فقط يحتاج لإداره ماليه وبتمشي الأمور ان شاء الله
انا ماعمري شلت هم المكافئة تكفي او لا ألا بحاله انه يكون عند ولدي تطعيمات او تعب وانتم عارفين مصاريف المستشفيات هنا والتأمين ترفع فواتيرك وردد لين يعوضونك تقعد مابين الشهر والشهرين

اللي عزابي ويقول ان المكافئة ماتكفي لازم يراجع حساباته

على فكره سعر الصرف القديم مساعدنا هنا بكندا لو الماليه تحدث اسعار الصرف راح تنزل المكافئة ل1833 دولار

المكافئه تكفي لكن بحال وجود اطفال الحقيقه
يصير عجز كبير للعوائل