ماهي تكاليف الدراسه في كندا حالياً خلال اربعه اشهر \ اتمنى الرد اخواني

وينكم عطوني وجه

ع الاقل ردو ع السوال الاول ^_^

ايش يعني شاهده ؟

وعليكم السلامة ورحمة ،، هلا بك اخوي بكهام .

شوفي يالغالي بالنسبة للسؤال الاول :
يعتمد على المعهد اللي تبيه أن كان معهد اكاديمي تبع جامعه معتمدة بيكلفك حول الـ 1000 دولار كندي بالشهر وان كانت معاهد اهلية معتمدة بتكلفك على حسب الساعات اللي تاخذها يعني 700 -600 دولار كندي تزيد شوي وتنقص شوي ،،، ومثل ماتعرف العملة الكندية زادت شوي .
بالنسبة للسكن مع العائلة بيكلفك شهريا تقريبا بين 700-800 دولار كندي مع وجبتين يوميا ،، عاد وجبة الغداء لاتحسبها لانك بتكون في المعهد الا ان كانت ناوي تتغداء عقب ماترجع .
وبالنسبة للمصروف الشهري والله يالغالي تعتمد عليك انت ،، يعني عندك كارد المواصلات الشهري تقريبا بـ 110 دولار ، يشمل الصب واي ( اللي تحت الارض ) ويشمل الباصات وغيرها .
وبالنسبة للاكل عندك الوجبات السريعه اسعارها تقريبا بين الـ 8-9 دولار ، وتلاقي مطاعم هندية تبيع لك لحم ودجاج بنفس السعر تقريبا ،، وبالنسبة للنت والغسيل راح يكون مجاني ان كنت ساكن مع عائلة .

وبالنسبة للتذكرة ماعتقد تقل عن الـ 5000 ريال سعودي .
فلو قلنا ونا خوك : معهد اكاديمي تابع للجامعه ومعتمد ( 1000 $) + سكن عائلة (800 $) + مواصلات (110$) + مصروفك الشهري (700$ اذا ماكنت راعي صرفيات) = عليك الحسبة .
واذا تبي معهد أهلي معتمد من الوزارة ايضا ، نقص ثلاث مية دولار او حولها من الالف وكمل حسبتك .

وبالنسبة للسؤال الثاني الكذب خيبة مافهمته يالغالي وياليت الاخوان يفيدونك لاني اعتقد انك تتكلم عن دبلوم وغيرهـ ونا ماعندي خبرة بهالموضوع .

بالتوفيق

يعطيك الف عافيه اخوي

حسبتها اخوي تطلع حول 33 الف

بس هذي الحسبه حقت كم شهر اخوي ؟؟

اذا اربع شهور صراحه معقوله

ولا شكله حسابي غلط ههههههه

حاليا كم الدولار الكندي = ريال سعودي ؟؟

والله يبارك لك في دنياك يارب

..................

رفع

شوف يالغالي عشان اوضح لك اكثر في كندا المعاهد نوعين :
1- معاهد اكاديمية تابعه للجامعات ومعترفة ،، وهذي الجامعات وظيفتها تهيئك لدخول الجامعه ،، يعني تهتم بالرايتنق اكثر شي وهي تقريبا ست ساعات يوميا ماعدى الويكند والاجازات ،، ولكن مشكلتها انها غالية شوي توصل لـ 1000$ كندي شهريا .

2- معاهد اهلية ،، هي معاهد تهتم بالمحادثات والقواعد اكثر من الرايتنق بكثير وبعضها معترف من قبل الملحقية ،، ولكن ميزتها انها ارخص من المعاهد الاكاديمية وتعتمد على عدد ساعاتك .

فأنا راح اعطيك مثال على معهد اهلي مثلا ،،،، هذا المعهد معترف من قبل الملحقية السعودية وشاهد اسعارهـ على الرابط التالي راح تلاقيها تحت على حسب ساعاتك :
ESL - English as a Second Language Programs - English courses


فالأن عرفت قيمة الدراسة شهريا ان شاء الله ،، وعرفت وش اقصد بالقسمين اللي فوق وبفرق الاسعار بينهم .

بعد اختيار المعهد راح تجيلك سالفة اختيار العائلة ،، العوائل أنت وحظك ممكن تلقاء عائلة بعيدة عن المعهد وبسعر رخيص ، وممكن عائلة قريبة وغالية ولكن اللي يسأل مايتوهش ولو تبحث بالانترنت وبمواقع البحث عن عائلات راح تلاقي ،، العلة ان الطلاب زادو بشكل كبيررر في كندا ، وتخبر كل مازادو الطلاب زادت الاسعار شوي وهذا غير ان العملة حقتهم زادت كثير بصراحة ، صارت اقوى من الدولار الامريكي ،،،، فأسعارها تقريبا بين 800-700 $ شهريا .

نجي للمواصلات ،، تشتري كارد مواصلات شهري بـ 110 $ دولار تقريبا يوصلك بالصب واي وبالباصات .

نجي للأكل والغسيل والنت وكله ذكرته لك في الاعلى ،، أيضا عندك في تورنتو فيه مكاتب كبيرة وضخمة للقراءة وغيرها يوجد فيها انترنت مجانا .

وبالنسبة للمصروف الشخصي انا والله خايف اعطيك مبلغ معين وتطلع من النوع اللي يصرف واجد واخاف اعطيك مبلغ معين ويطلع اكثر من قدرتك وتتحطم ،، فراح اقولك عن نفسي مثلا كنت اصرف شهريا حول الـ 700$ ،، شاملة المواصلات والاكل خارج البيت أيام والطبخ داخل البيت ايام اخرى ،، كنت افطر في سلسلة محلات مشهورة عندهم اسمها ( تيم هورتن ) شاهي على حبة دونات بـ 3 دولار تقريبا ،، والغداء كنت أوقات مطاعم هندية واوقات وجبات سريعه تكلفني حول الـ 8 دولار ،، ولكن اللي ساعدني كثير بصراحة الطبخ داخل البيت ،، وفر علي كثير ،، ولكن أنت أعتقد اول شهر بتحتاج اكبر من هالمبلغ لانك جديد ،، وكل مامرت الشهور كل ماقلت صرفيتك لان بتزيد معرفتك واطلاعك عن المنطقة وعن الاسعار .

فالأنسان مايمنع انه يشد على نفسه شوي في البداية ويجتهد لحد ماتجيه البعثة ويفرجها الله له .

فزبدة الكلام وناخوك :
1- اجراءات الفيزا وغيرهـ : الشيك راح يكلفك حول الـ ( 500 ) ريال ،، وورقة القبول راسل المعاهد او فيه اخوان كثير يجيبونها لك مجانا او بمقابل بسيط .

2- اسعار المعاهد وضحتها لك بشكل تقريبي ،، ووضعت لك رابط لاحد المعاهد المعترفة لدى الملحقية .

3- اسعار السكن مع العوائل تقريبا بين الـ 700-800 $ شهريا مع وجبتين.

4- صرفيتك الشهرية .

نصيحة اخوية مهمة / الحالة المادية مهمة جدا جدا في نفسية الطالب فأنتبه تسافر وأنت غير قادر ماديا او تحاول تضع لك ميزانية محدودة ومخططة بدقة ،، لان الانسان مايضمن اللي يجيه هناك ومايضمن الحالات الطارئة فالواحد ضروري يروح ومعاهـ زيادة عن حسبته اللي حسبها بألفين او ثلاثة الالاف دولار ،، يضعها كأحتياط فقط .

بالنسبة لسعر صرف العملة ،، كنت اتابعها من بنك الراجحي لكن للاسف ماوجدته ،، لذلك تفضل هالرابط وأحسب العملة :
http://www.srafa.com/

بالتوفيق

الله يوفقك اخوي

بارك الله لك في دنياك

ويفتحها بوجهك يارب

هلا بك يالغالي .

بالنسبة للمعهد اللي رسلت لك رابطه هذا موجود في ( أونتاريو وبالتحديد في تورنتو ) ON-Toronto

وبالنسبة لباقي المعاهد فيه هناك معاهد معترفة لدى الملحقية ومعاهد غير معترفة ،، فأغلب المعاهد المعترفة تكون التابعه للجامعات واسعارها مثل ماذكرتها لك بالاعلى ،، لكن المعهد اللي رسلت لك رابطه الان هو اهلي ومعترف ولكن اسعارهـ جيدة وانت شايفها بالرابط .

فأنا والله ودي انك تعتمد على نفسك يالغالي وتختار المعهد اللي يناسبك سعرهـ ومكانه بنفسك والطريقة بسيطة ، فقط ركز معي :
تبحث عن المعاهد الجيدة في المنطقة اللتي تريدها سواء تورنتو او فانكوفر او غيرها ، أو طالع هالرابط :
http://www.mbt3th.us/vb/forum107/thread279813.html

بعد ماتختار المعهد اللي تبي تسأل عنه وتبي تعرف أسعارهـ وموقعه ولكن اللغة ماتساعدك ،، سوي الطريقة التالية :
http://www.mbt3th.us/vb/forum108/thr...ml#post2805521

(( المشاركة رقم 28 ))

فقط كل ماهو عليك أنك تطلع رابط المعهد اللي تبيه من قوقل وتاكد ان المعهد موجود في كندا يعني مثلا لمن تنسخ رابط المعهد في قوقل أكتب جنبه Canada عشان يبحث لك في كندا واول ماتجيب رابط الموقع ،، ترجمه بالطريقة اللي موجودهـ بالرابط السابق ،، وراح يطلع لك الموقع وكأنه عربي وشيك على الاسعار وعلى كل شي تبيه .

مرهـ ثانية راح أقولك المعاهد التابعه للجامعات اسعارها مرتفعه شوي مثل ماذكرت لك على عكس المعاهد الاهلية ،، فاذا بتدور على معهد اهلي حاول انه يكون معترف لدى الملحقية .

ونا بصراحة وبوجهة نظري الخاصة أشوف المعهد اللي وضعت لك رابطه في الاعلى الافضل من حيث السعر ولكن مايركزون على الرايتنق كثير مثل الاكاديمي وهو يناسب اللي ودهـ يدرس على حسابه ووضعه المادي بسيط لحد مايلحق بالبعثة .

والله أعلم