مساعدة عاجل: فيزة سياحية ولا فيزة طالب؟ (التفاصيل بالداخل)

هلا بك يالاخت .

وناخوك اذا بتستمرين على هالموال صدقيني ماراح نستفيدين شي وماراح نقدر نفيدك بشي ،، ابيك تهدين وتبعدين عن العجلة وتركزين معي عدل ،، واهم من هذا كله ،، لا اتخذي قرارك مباشرة وخلااااااااااااااااص ،، لاتغيرينه ابدد ،، فكري زين وشوي وش تبين تسوين وثمن اتخذي القرار وقفلي على الموضوع نهائيا ،،، التردد وكثرة الاسئلة مو في صالحك ابد .

اولا / وناخوك اهم شي مثل ماذكرت لك ،، تعوذي من الشيطان ولا تستعجلين وفكري بهدوء وعقلانية .

ثانيا / ضعي براسك ان المعيشة في كندا غالية شوي ،، واذا تبين معهد محترم لازم تدفعين اكثر ،، فاذا حالتك المادية جيدة انسي سالفة الصعوبة اللي قالك عنها اخوك وتوكلي على الله ،، لانك ان كنت ترغب بالدراسة من قلبك وتبي تستفيد راح تستفيد غصب سواء كانت الدراسة صعبة او بسيطة ،، فسالفة صعبة ومعقدة طيريها من راسك نهائيا من هاللحظة ودامك اخترتي كندا خلاص انسي باقي الدول ولا تقعدين تقارنين .

ثالثا / انا اشوفك مهتمة بفانكوفر اكثر ،، فخلي كل اهتمامك على احضار قبول معهد او قبول جامعي من فانكوفر ،، عشان تقدمينها للسفارة لاستخراج فيزا .

رابعا / من يوم السبت القادم ،، روحي لمعهد محترم وسجلي فيه ،، واهم شي يكونون يدرسونك رايتنق عشان تشغلين نفسك وماتضيعين وقتك سدى .

خامسا / عقب مايجي شهر سبعه وتستلمين اوراقك حقت الجامعة ان شاء الله بيكون معاك قبول المعهد او الجامعه ،، فجهزي باقي الاوراق وقدمي على الفيزا مباشرة .

سادسا / اذا جهزتي جميع الاوراق المطلوبة وقدمتي اوراقك للسفارة ،، وطلعت فيزتك ان شاء الله خلال شهرين او اقل من تاريخ تقديمك ،،ساعتها شوفي نفسك ،، اذا بغيتي تسافرين كندا توكلي على الله ،، واذا بغيتي تكملين دراستك وتاخذين الايلس من السعودية كملي لحد ماتخلصين اطلعي لكندا .

سابعا / اذا طلعتي لكندا روحي للمعهد اللي سجلتي فيه وادفعي لهم مبلغ شهر وادرسي فيه هالشهر ،، اذا ما اعجبك روحي لمعهد ثاني ،، وبما انك على حسابك ماحد يقدر يمنعك من تغير المعهد .

ثامنا / التفكير بالتخصص وبالجامعه هذي خليها عند وصولك لكندا ،، اذا رحتي لكندا ابحثي عن الجامعه اللي تبينها والتخصص اللي تبينه ،، وبتكونين في قلب الحدث ،، يعني بتروحين لنفسك عند الجامعات وبتسالينهم وبتستفسرين منهم وشوفة العين مو مثل شوفة الانترنت .

تاسعا / الحجز لا تفكرين فيه لحد ماتستلمين الفيزا تبعك .

عاشرا / بخصوص ورقة العمل ،، السفارة الكندية معقدددددددددة يعني هالحين لو شافوك متخرجة مثلا من اربع اشهر ،، ممكن يسالونك وش كنت تسوي خلال هالاربع اشهر ؟؟ ان قلت لهم فاضي بيقولون هذا وجهه مو حق دراسة ويلعب ،، والبعض الاخر يعطيهم اثبات انه كان يدرس في معهد مثلا ،، وسالفة حرمه ورجال ماعندهم ،، فاذا كنتي متخرجة قريب توكلي على الله وقدمي اوراقك بدون ورقة عمل اذا ماقدرتي توفرينها .

الحادي عشر / بخصوص التقديم بنفسك ،، التقديم على الفيزا الكندية مو مثل الامريكية اونلاين ،، هي ابلكيشنات تعبينها بالكمبيوتر ثمن تطبعينها وترسلينها لهم وهكذا ،، فاذا احضرتي قبول المعهد او الجامعه من كندا بتكونين تخطيتي نصف

لاحول ولا قوة الا بالله ،، رحت ابعدل سطر ،، راحت اسطر كثيرة في الاسفل ،،، ياليت من المشرف اذا بامكانه يرجعها اكون شاكر له .

السلام عليكم

أشكرك على هذه (الوقفه) وجزاك الله خير.
دعواتي أن (الله يطمّن قلبي بأسمه) من أجل أرتاح وتتسهل أموري,


كل كلامك (سليم) وأعجبني
بس فيه نقطة: ((
peace studies and conflict resolution) )

# وأعتذر إعتذار شديد عن الدوشة اللي سببتها لي ولكم,
والشكر لله على كل شيئ ثم لمساعدتكم وتوجيهاتكم ....

شكرًا لتفاعلكم والله بفرجها علينا

Up - up

.................................................. ...............................................

هلا بك ، والعذر والسموحة على التأخر بالرد لظروف خاصة .

بخصوص استفسارك الاول :

شوفي معهد ايلك معروف قوي وسمعته قوية ،، لكن بالتأكيد بتلقينه متروس سعوديين وهذا شي طبيعي ،، لان مستحيل تلقين معهد في كندا مافيه سعوديين ،، علعموم انا قلت لك دامك على حسابك رايحه ،، هذي ميزة ايجابية تعتبر لك ،، لانه اذا ما اعجبك المعهد بامكانك تغيرينه بدون ماتزعجك الملحقية .

وبعدين مثل ماقلت لك اختاري معهد ،، وضعي كم معهد على جنب ،، بحيث اذا طلعت لك الفيزا تروحين لمعهدك وتشوفينه ( قبل ماتدفعين الفلوس ) اذا ارتحتي له سجلي فيه ،، واذا مارتحتي له تشوفين المعاهد الثانية اللي درستيها وخططتي عليها ،، بس خلي الفيزا تنتهي وتطلع .


بخصوص الاستفسار الثاني عن التخصص ،، مافهمت وش تقصدين بالضبط ،، لكن انا افضل انك تفكرين فيه اذا وصلتي الاراضي الكندية ،، راح تلاقين طلاب وطالبات كثيرر يدرسون بنفس تخصصاتك وراح يفيدونك عن التخصص المناسب لك .


بخصوص الاستفسار الاخير ماعندي لك اجابة ثابته ،، لكن انتي ليه مركزة على هالنقطة ؟

انتي اذا قررتي تسافرين سافري سوا قبل موعد التسجيل او بعد ،، وبكلا الحالتين انتي ماراح تضيعين وقتك ،، راح تدرسين فيها لحد مايجي موعد التسجيل المقرر من الجامعه اللي اخترتيها ،، وعلعموم مواعيد التسجيل ونهايتها راح تلاقينها في مواقع الجامعات اللي تبينها .

الله يوفقك ان شاء الله ويسهل دربك ،، ومثل ماقلت لك ،، لا تشوشين عقلك وتوترين نفسك ،، خلي عندك اولويات عشان امورك تكون منظمة ومرتبة ولا تستعجلين ابد .

بالتوفيق

شكرا شكرا كثيرا
كلامك سليم .........ومطمئن
اي خطوة بخطيها ...بكتبها لكم


أكرر شكري أخ قوطي,
جزاك الله خير وسهل أمورك وظروفك
أنت ومن جاوبني ....






.
.

إلى لقاء قريب