اسواق ومحلات الجاكيتات والابوات في جدة بالصور

February 14th, 2008, 03:27 PM

السلام عليكم ورحمة الله وبركاته

خلينا نخش في الموضوع على طول وبدون مقدمات

طبعا زي ما انتو عارفين موعد سفري قرب الي هوا يوم الاثنين الجاي

والواحد كل يوم في الاسواق والمحلات

لكن بصراحة قد ما رحت محلات في شارع التحلية ( دبنهامز ، بي اتش اس ، سيتي سنتر ، وغيره ... ) ما لقيت زي البلد شارع قابل وسوق الندى وسوق العلوي....

بخصوص الجاكيتات صراحة ربنا وفقني في محل في سوق الندى الي يتفرع من شارع قابل في البلد

لقيت عنده جاكيتات وبالطوات جدا ممتازة واسعاره مناسبة ومعقولة مقارنة بالاسواق الي في شمال جدة

اسم المحل: المركز العربي

الموقع: سوق الندى

اشتريت من عنده جكيتين وبالطو

الجكيت الاول هذا يعتبر اخف واحد وحق البرد العايدي الي نص ونص

سعر الجكيت: 84 ريال فقط

صور الجاكيت





الجكيت الثاني هذا حق البرد الصح لبسته في المحل لدقيقتين حريت على الاخر

طبعا هذا الجكيت حق البرد القارس بس من غير مطر

سعر الجاكيت: 120 ريال

صور الجاكيت





البالطو الثالث الي اشتريته هذا جدا ممتاز وانصح الجميع باقتنائه وصراحة جدا ممتاز بجميع المقاييس لانه ينفع جاكيت عايدي وبرضو ينقلب حق مطر كمان

سعر البالطو: 140 ريال

طبعا البالطو هذا يتلبس على الجهتين وتقدر تعدل البرنوص الي فوق على حسب الجهة الي تقلب عليها البالطو

البرنوص الي هي الطاقية حقت الجكيت ما لقيت لها اسم سوا البرنوص

المهم هذي صورة للبالطو من الجهة العايدية حقت البرد من غير مطر



وهذي صورة للجاكيت من الداخل



وهذي صورة للبالطو وهوا مقلوب على جهة البرد والمطر



انتيهنا من الجاكيتات والبالطوات وندخل في موضوع الابوات

بصراحة طول الصباح وانا جالس ادور في السوق اشتري حوايج الين تعبت

ونسيت هرجة البوت الله يكرمكم

وافتكرته في الاخير وانا ماشي ودخلت على محل في السريع واشتريت بوت سعره 140 ريال من محل جزم في شارع قابل في البلد

وهذي صور البوت





اما بخصوص شنط السفر اشتريت طقم فيه 4 شنط داخل بعض من سوق العلوي في البلد بـ 250 ريال

اخذت الشنطتين الكبار الي حتشوفوها بالصورة الي في الاسفل والشنطتين الصغيرة اعطيتهم لاهلي

ختاما....

الي يبغى يشتري جكيتات وملابس شتا يروح لسوق الندى في البلد المتفرع من شارع قابل

الي يبغى يتشري ابوات وانتوا بكرامة من شارع قابل في البلد

الي يبغى يشتري ملابس داخلة وبجامات وشنط من سوق العلوي في البلد

وفي الاخير هذي صورة لغرفتي بعد ما خلصت شراء الحوايج والشنط والخرابيط هذي كلها



على فكرة انا طالع على الخطوط الفرنسية جدة - باريس ، باريس - تورنتو

سمحولي بشنطتين كل شنطة 23 كيلو + شنطة هاند باج الي اشيلها في اليد 8 كيلو الي راح تكون شنطة الاب توب

للي عنده حمولة كبيرة انصحه ياخد من هنا للندن على الخطوط السعودية يعطوك شنطتين كل شنطة 30 كيلو وقلهم ما ابغى استلمها الا في كندا علشان لو استلمتها في الترانزيت احتمال الخطوط الثانيه الي تطلع عليها يعطوك حجم اقل وتتوهق في العفش

وبخصوص صرف الدولار الكندي انا صرفته من شارع قابل اليوم من محل العمودي للصرافة مبلغ 1500 دولار كندي بـ 3.78 ريال للدولار

وتقبلوا خالص تحياتي .... اخوكم KaLaNgO

• نشر عبر تويتر
• نشر عبر فيسبوك
• نشر عبر جوجل