تجربتي الشخصية من المدينة حتى فانكوفر

April 9th, 2008, 07:28 AM

اخواني اخواتي المبتعثات نبدأ الفقرة الاولى من الحلقة المملة من برنامج معاناة المبتعثين
ضيف الحلقة : الضحية مس نايس ووالدها المحترم
طبعا بعد فصل الفيزا البااااااااااايخ الي لن اتكلم عنه لكن كاشارة سريعة الفيزا لم تصل الا في وقت متأخر بعد ان طلبنا التأجيل وحصلنا على الموافقة لكن بسبب تحديد تاريخ فيزا المرافق اظطررنا الى التجهيز و السفر خلال 6 ايام من استلام الفيزا بعد مارتبنا امورنا ان نسافر في شهر 7 يال المفاجئة

الفصل التاني والاهم لكل الطلبة الي على وشك السفر لما تحجزو اتاكد مرة واتنين وعشرة من توفر المقاعد على الخطوط المكملة بعد الخطوط السعودية وهذا اشرت اليه في موضوع سابق
لكن انتبهواااااااااا مفاجئات اخر لحظة ممكن تظطركم لتغير خط السير تماما

الفصل الثالث لا تفكرو مجرد تفكير انكم تاخذو خط سير يمر بباريس ابداتعالو كندا عبر الصومال احسن
الاسباب: رحلتنا كانت جدة - باريس
من جدة طلعنا الرياض لاسباب مجهولة وانتظرنا فيها ساعة غير ساعة الطريق وهذا طبعا ليس مكتوب في خط السير عندنا المفروض من جدة دايركت على باريس قلنا بسيطة
بعد ماوصلنا باريس في المطار كنا نسابق الريح عشان نلحق الطيارة وبعد انقطاع الانفس تأتي المفاجئة
sorry you are too late
طبعا حملونا الغلط بالكامل والخطوط السعودية اخلت مسؤليتها مع ان الطيارة هي الي اتأخرت وفي المطار اخذونا على مكتب البوليس لاننا لانملك تصريح دخول باريس وبعد مكالمات طويلة وجلسة كالمتهمين ونزلت فينا الموظفة على قولة الطيارة وصلت في الوقت المحدد وعندكم ساعتين انتو اتاخرتو واحنا كلها ربع ساعة واحنا في تيرمنال 2 المفروض ندخل منه على الطيارة
بعد كل هذا اخذنا تصريح يوم واحد وكنا 5 اشخاص مو معقولة كلنا مهملين ومتأخرين المهم نمنا في الهيلتون وقالو لنا تاني يوم تكونو في المطار ماكسيمم على الساعة 8
صبحناهم من 7 وربع احنا عند مكتب الخطوط الكندية ويقولو لنا بدري تعالو 9 وربع لان الحجز غير مؤكد (انتظار )وقفنا الى الساعة 9وربع لعدم وجود مقاعد ومابدنا نغادر المكان
ومازال التأجيل الى الساعة 10 واعصابنا تلفت طبعا كل هذا يوم 5 ابريل ولسه في رحلة تورنتو وفانكوفر ويوم 7 تبدأ جامعتي المتوقع طبعا بكيت في المطار
الحمدلله بعد دعاء الكرب والابتهال الى الله ركبنا على الخطوط الكندية ورحنا تورنتو
من تورنتو على فانكوفر

الفصل الرابع: لما وصلنا الى فانكوفر بعد طيران 11 ساعة
نسأل عن الشنط المفاجئة يقولو شنطكم في تورنتو لسه, بعدها اعطونا رقم نتصل عليه ونعطيهم اسم الفندق الي نزلنا فيه عشان يتصلو بينا لما توصل الشنط
تاني يوم يقولو اسفين ماندري شنطكم فين شي يقولو ما جات من باريس وشي يقولو راحت الهند وحكايات مالها داعي
الاتفاق اننا من المدينة اخذنا ارقام اننا نستلمها في فانكوفر ليه كده؟؟؟؟؟؟؟؟؟؟؟ ماعندي جواب
وجلسنا الى اليوم 4 ايام وحضرتهم مايدرو عن شنطنا بدأنا الدوام بنفسية تحت الصفر كل ملابسنا واغراضنا لسه ماوصلت ( طبعا الموضوع للبنات قاتل تخيلو كل التجهيز لبداية الجامعة يذهب مع الريح وتحضري اول يوم بملابس السفر شي اسوء من السوء )
والى هذه اللحظة التي اكتب فيها الموضوع لم تصل امتعتنا وبكرة 3 يوم في الجامعة طبعا يمكن مابقى احد ماعرف ان شنطنا اتاخرت لاني قلت لكل الناس من قهري مع انه موضوع غير سار للتحدث فيه لكن احيانا يفقد الانسان اعصابه

الدروس المستفادة:
1- لا تختار خط سير يمر ابدا ابدا ابدا بباريس حفاظا على اعصابك واغراضك وابعد عن المشاكل
2- في hand bag دايما اعمل احتياط للطواريء خذ معاك غيار لو اتاخرت الشنط لا تتورط
3- الاوراق المهمة والتوصيات خليها معاك ابدا لا تخليها في شنطة السفر والحمدلله هذا الي طمنا اوراقنا والاصول معانا
4- خذ ارقام الشنط في ورقة معاك حتى لو لاسمح الله ضاعت شنطة تعرف من رقمها هي اي وحدة بالضبط احنا بس اخذنا الارقام بس مادري شنطة الملابس كم رقمها من بين الشنط الاربعة لان قالو لنا الشنطة الى رقمها---- مازالت مفقودة وانا مابفتكر اي وحدة
5- يابنات الكريمات والعطور ما اخذو منها شي طبعا حتى كريمي الواقي خليته مع العفش خوفا من تفتيش المطار بس ما سار شي في التفتيش وراح الواقي مع العفش والوجه حالته حالة وشاحن الجوال لان جوالاتنا قفلت ومافي شاحن مو قادرين حتى نطمن اهلنا مع انه مافي مشكلة من وضعه في hand bag
6- لا تخافو ابدا من حكاية تفتيش المطار كله سهل ولا في مشاكل حتى في باريس المعقدة
7- اول يوم دوام من الافضل انكم تاخذو القبول لاني مالقيت اسمي في القائمة وكان معايا القبول وهذا سهل الامور لان رقمك الجامعي هيكون مسجل فيه وبسهولة يقدرو يعطوكي ورقة تدخلي فيها الاختبار
8- الاختبارات سهلة وحلوة لا تخافو بس يحددو منها المستوى وبعدها يصنفوك ضمن اي فئة سواء المتقدمين او المبتدئين ويعطوكم خيارات تقرروا اي كورس تحبو تبدأ فيه

بعد طول شرح هذه تجربتي الى الان لكن على الرغم من كل هذه المصاعب الجامعة رائعة وراح تشوفو الفرق في طريقة التعليم و الخدمات المقدمة للطلاب وكل شي

• نشر عبر تويتر
• نشر عبر فيسبوك
• نشر عبر جوجل