نفر مندي مع الرز.. وين الاقيها في فانكوفر (الكبسة) ؟

ياهلابك.. اس ال كشف والا عادي
يااختي العزيزه.. اجراءات البعثة شيء روتيني.. وكل شيء في هالدنيا توسعين صدرك عليه يتسهل.. وماراح تعيشين عمرك مرتين.. اكلي من الي تحبين.. والي مقدر بيكون

ااااااامين.. والله يعينك على بعثتك

تحياتي لك،،،

والله يابن الحلال انا لي شهر هالحين في فانكوفر ادور قشطه وجبن سايل مالقيت ..

عشان القى رز .. الرز ماعندهم الا الامريكي الله يكرّم النعمه ..

استغفر الله العظيم

يابن الحلال انت اذا استقريت ارسل لأهلك كل اللي تبيه وهم يشحنون لك ..

يعني هالحين خذ معك في كيسه مهب تجيب لي خيشه .. خذ معك شيء يكفيك اسبوع ..

عاد انت تتطبخ كاس لك مهب تتدحى لي قوطي الشوربه تراك انت بلحالك ..

وانا والله ماهمتني هالايام قد ماهمني رمضان الله يشرفه ..

مدري وشلون الشوربه بدون قطع لحم ..

الله يعينا بس ..وان شاء الله تبي تيسر الأمور وبصراحه الله يلوم اللي يلومك.

ترى والله العيشه من دون هالكبسه اللي تعودت عليها صعبه ..

انا بس ودي اشوف اشكالنا في رمضان احس الفيمتو حقهم مغشوش مايطلع شوارب ..

ياهلا وغلا بأم خيال.. حياك ربي.. وحي الله اهل السعودية الي في فانكوفر كلهم
اقولك.. قصي يدي اذا ماانتي نجدية.. باين عليك من شويربة اللحيمات.. شكلي بصوم بكرى عشان افطر على الشوربا.. طقتني الشهوه

شربت دمي جعله سم في بطنها<< ماعليش هذي جمله اعتراضية لباعوضة بهذلت فيني

بعدين.. تراك خوفتيني.. مالقيتي جبن وقشطة!!!!!! انتي من جدك والا تمزحين؟؟ لعنبو شيطانهم وش ياكلون ذولا؟؟؟

شوفي.. لا تخافين بجيب لك معي شوربا.. لا وكويكر بعد..بجلس انا حتى نصف رمضان.. بس قطع لحم صعبه اجيبها معي.. ايه صح.. بجيب شريح يصلح؟

هههههههههههههههههههههههههههههههههاي.. رهيبه شوارب الفيمتو.. قطعتي كبدي من الضحك.. نقلبها فيمتو الي يجي معلب اكيد عندهم.

بجيب معي تمر.. اذا بغيتي قبل اجي خبريني اجيب لك معي سكري القصيم.. تفطرين عليه في رمضان

الا قولي لي شلون طريقة الشحن.. وكم الكيلو يوصل لي؟

لا هنتي على هالمعلومات الي طيرت قلبي... تحياتي لك،،

اييه والله الله يحيينا بس صدز هالمره على قل الكلافه لاننا والله ماكلفناهم كل شيء نبي نجيبه من ديرتنا ..

ببعدين لا مايحتاج تقص يدك اييه نجديه بس مهب من فصيلة الخرفان من الاوادم ..

بعدين ايه واله مالقيت لا جبن سايل ولاقشطه اجبانهم مثل لحومهم تقل اسلاك ..

والقشطه مهنا قشطه عندهم شيء كنه كريمه ..يعني ماينفع ..

لان اغلب طبخاتنا تعتمد على جبن ولاتهون اخته القشطه ..

هيّن الشوربه كودنا نتفضى يوم وندّور على طحين وخميره وشوربه عشان يمدي نطلب ويشحنون قبل رمضان ..

اما اللحم تتجيبه معك وراه تحسبه علك .. لحم هذا يخيس عليك في ثانيه ..

وان شاء الله انا اهلي يبي يشحنون لي طلبت منهم لستة عاد مدري وش الي بياصل من اللي مهب واصل ..

والشحن على حسب شطارة الشركة .. في شيء ياصل بأسبوع وشيء ياصل بعشرة اياام ..

انا هالحين مابعد جربت الشحن لانه مابعد وصلني اول مايصير عندي تجربه اقولكم ..

انت شف بس موضعي هل يوجد في فانكوفر بقالات عربيه تبهذلت ابي جبن وقشطه ماحصلت..

وبالنسبه للتمر يبي جيني خيور ان شاء الله وابوزع عليكم .. بدل ماكنا نوزع في الحرم نوزع على اللي معنا هنا

السلام عليكم

والله يا ام خيال ضحكتيني ،، ابغالي ارسل لك بكرررة قشطة ،،

المهم

السائل // تلاقي عندهم رز طعم هندي بسمتي ،،، لقيته بالسيف واي كمان لقيت عنده بصل مقطع وجاهز

والقشطة والتمرة والقهوة تلاقيها في سوبر ماركت عربي طلع جنب بيتي من حظي
Jasmine Halal Meats & Mediterranean Produce
6048795518
4323 Main Street
Vancouver, BC V5V 3R1

بس قدر الضغط (الكاتم) الي ادور عليه وما لقيته ،، اخ نفسي اشتريه لاني احب البخاري والمقلوبة باللحمة وما في قدر ،،

وتوصل بالسلامة ان شاء الله

اخوي ولد القصيم
وشقالولك مطعم البحار على غفله اقول خذلك دوره الايام الجاية على اكل التوست مع الجبن
وانس الاكل الحار يعني يطبخون الدجاج اليوم واذا يبون ياكلون لو بعد يومين يصخنونه وياكلون
والله لي اسبوع ماغير آكل توست وجبن وشاي عشاء وفطور وغداء
احس معدتي تبي تطق
لكن الله يعين
اذاجيت جبلي معاك كيس باب الهند الله لايهينك

والله للأسف الآن موجود في كندا
ارسلي لي نفركبسة لتورنتو

هلابك مرة ثانية.. نورتي موضوعي بطلتك
هههههههه.. منتهية ام خياااااااال.. بديت احس انك ولد مقلع نصف وقته طلعات للبر

اجل بكثر من اكل القشطة بالسكر.. هذي مع الفطور هي الطبق الرئيسي.. بنحرم منها.. اخ يالقهر.. بعدين وش ذا الجبن الي كنه اسلاك.. لا يصير مثل الجبن الي في السوبرماركت الي كنه جدايل جدتي.. اشتريته مرة.. ورميته مع الدريشه قبل اوصل البيت خايف من اهلي يقولون وش جبت لنا!!

شفت موضوعك البارح.. واعجبني موقع زبيحه.. لكن ماادري وش فيهم وش مافيهم.. وشفت احد الاعضاء يمدح في مكان فيه لحوم يقول انها حلال.. خلاص انا اخذت الفتوى.. اهم شيء طعمها زين.. والاثم عليه

هههههههههههههه بتوزعين علينا زي الي بالحرم.. الله يقطع شيطانك.. مت ضحك منك

شكرا لمرورك.. نورتي الصفحه

الله عليييييييييييييييييك.. يعني مايحتاج اجيب كيسي معي ؟
انتي روعة..ماخليتي شيء.. كل شيء حصلتيه.. لكن تعالي.. لا يكون جنب بيتك الي في جدة ؟ واحنا فرحنا

وقدر الكاتم.. حطيته بالشنطه من الحين.. وحطيت فيه ليمون اسود ودارسين وزبيب وماجي هذولا اكيد ماراح الاقيهم هناك

شكرا لمرورك..ومعلوماتك

ابشر بجيب لك باب الهند.. بس ماقلت لي بسمتي والا عنبر ؟

تدري اخوي رمش شمر.. انك ضيقت صدري.. اجل باكل تست وجبن!!!! مااعرف اكل الا اذا فليت السفرة وتربعت.. وهجوم على كل الاصناف
الله يعين معدتك.. لكن ابشر اذا جيت بجيب معي هرفي بالطيارة.. واذبحه لكم بالمطار.. وانت بقلطك على المفطح.. اخليك بدل ماتاكل ست تاكل شحم ولحم وقرصان ورزيزه.. بس خلني اوصل

شف المعلومات الي كتبتها الاخت نونا.. يمكن تفيدك

تحياتي لمرورك الطيب،،،