رسالة الى ماجد الحربي

السلام عليكم ورحمة الله ..

ميمو 55 أعجبني فيك صفه وهي(الشجاعه الأدبية) نقدر نسميها ..في انك تحاول تتحصل على شي تعتقد انه من حقك المطالبه به وانك تحاول بطريقه ايجابيه زي فكرة الرساله هذي ,, يعني الحاصل انه ممكن اي احد ثاني ما عجبه الشرط هذا يقعد يسب في الوزاره ويلعن وفي النهايه ما استفاد شي الا حرقة اعصاب من كثر السب ويمكن فعلا مر عليك هذا الموقف .. فاستمر على هذي النفسية الحلوة والى الامام, هذا واحد!

اما بالنسبه لموضوعك فانا معاك من ناحية ولست معاك من ناحية اخرى (ما ابغى اقول ضدك)
ليش؟؟ لانه ما فيه اي تفسير منطقي على الاقل لنا كمستهدفين من البرنامج بان الوزاره تفتح المجال لراغبي الطب دون التخصصات الاخرى مما يعني انه الطالب اللي يرغب بغير الطب قد يشعر بالنقص او عدم اهمية التخصص اللي يرغبه بالرغم من ان الهندسه مثلا من اكثر التخصصات نقصا في الكوادر وايضا بعض مجالات الحاسب والاداره وهذا يجعل بعض الطالب في دوامه من الحيره والاحباط في اختيار التخصص ..

غير كذا البعض الاخر مدفوعا بالرغبه في الابتعاث وانه يتحصل على اللغه ويدرس في جامعه عالميه (مع احترامي لكل الجامعات السعوديه وخاصة كلية المعلمين بجدة) قد يتغاضى عن رغباته ويتنازل عن ولائه لموهبته وابداعه او مجرد حبه لمجال معين ويتجه الى الطب لمجرد انه يطلع البعثه. وما راح اطول في العواقب المحتمله بس راح اذكر بعضها:
1ـ كثرة التقديم على المجال هذا(الطب) يخلق جو عالي من التنافس وبالتالي الشخص اللي مؤهلاته عاليه بس ما عنده رغبه قد يأخذ مكان الشخص صاحب الرغبه العاليه والمؤهلات المتوسطه ولكن يستبعد ليس بسبب انه مؤهلاته ليست مطابقه للشروط بل بسسب التنافسيه العاليه اللي حرمته من رغبته. ,, قانون العرض والطلب ,, وهذا يسبب جزئيا بعدم فاعلية البرنامج.
2ـ الطلاب اللي طلعوا بدون حب للتخصص منهم من قد يكمل الدراسه ويعود بالشهاده ولكن كيفه في الحياة العمليه هل هو محب ومتفاني في عمله او انه لا والله يمشي زبون على قولتهم وينتظر بس نهايه الدوام عشان يفرك .. والبعض الاخر من الطلاب ينصدم بالواقع حق التخصص ويواجه مشكله في الاكمال وبالتالي يفشل ويرجع .. يعني صار عندنا هدر في البرنامج اللي قاعدين نصرف عليه مليارات.
3ـ الوزاره بشكل غير مباشر توصل رساله للطلاب انه التخصصات الاخرى غير مهمه والعكس صحيح التنميه الصحيحه تكون متوازنه ومتوازيه يعني في جميع المجالات .. والطالب المبدع في لغات البرمجه مثلا من يوم هو في الثنوي يحس انه ماله داعي وبدل ما يطلع ويحصل تعليم ممتاز ويطور موهبته ويرجع ويفيد ويستفيد.. لا يجلس هنا ويدرس اي شي ويطلع اي شي وتعرف عندنا اكتشاف المواهب مايحتاج الا من رحم الله .

يكفي والا لا !! ما علينا ...

ومع ذلك انا متأكد من ان الوزاره عندها دافع قوي في التحديد هذا قد لانعلمه .. ما المحتمل ان يكون الدافع؟؟!!؟؟

الله اعلم ..
خليني اقول اش الحل من وجهة نظري المتواضعه ..
الحل بسيط جدا وفعال ويرضي كل الاطراف:
ليش مايكون فيه تنوع ونوعيه (quality and diversity) يعني بدل ما توجه طاقات المتقدمين الى مجال واحد لا وجهها الى مجالات مختلفه وفي هذي الحاله ممكن ترفع المعايير وبالتالي راح يكون فيه نوعيه ممتازه من المتقدمين لكل مجال وايضا تضمن بنسبه كبيره انه ما احد اتوجه الى مجال اخر بسبب انه ما حصل مجاله .. يعني الوزاره استفادت والطلاب استفادوا و اكيد البلد بتستفيد بشكل افضل .. الكل مبسووووط

وفي النهايه ساهمس في أذنك يا عزيزي ميمو55 :

انا معك في حقك في الركض وراء حلمك والرغبه بتحقيقه بافضل الوسائل واستخدام جميع الطرق المشروعه..
ولكن لاتنسى ان الابتعاث ليس كل شي وفقدانه ليس نهاية المطاف , بل تعلم كيف تجعل من الليمون شرابا حلوا ومن العلقم دواء شافيا ومن العقبة سلما ومن الظلمة مشعلا ومن الرغبة دافعا .. دافعا لعمل المستحيل

الابتعاث لا يضمن النجاح وعدمه لا يضمن الفشل .. واكيد انك شاهدت او سمعت من الناجحين سواء المخترعين او الادباء او موهوبين واصحاب المناصب من لم يتلق تعليمه في الخارج ..


ووالله ثم والله لو لك نصيب في البعثه ما استطاع احد ان يمنعك .. ولو مالك نصيب ما قدر احد ان يطلعك ,,

ابذل ما في وسعك واتمنى من الله لك التوفيق والسداد ..

آسف على الاطاله ,, وتقبل مروري ,,

مشكور اخوي على ردك بس حبيت اوضح شي مو انا الي كتبت الرسالة واحد من الاعضاء يقول بيسلم الرسالة للدكتور ماجد الحربي بس انتو اكتبو اساميكم ونسبكم القدرات والتحصيلي والثانوية نبغى فوق المية اسم ادخل عالموضوع الاصلي وحتعرف كل شي
http://www.mbt3th.us/vb/forum17/thread111111.html

بالتوفيق

انا اقول ان طلاب البكالوريوس اخذوا حقهم المفروض التركيز يكون على طلاب الدراسات العليا اولا. ثاني شي اغلب مشاكل الطلاب المبتعثين تكون من الطلاب الصغار بالسن والي هم بالغالب طلبة مرحلة البكالوريوس وهالكلام عن ناس كثير يدرسون بجميع الدول امريكا وكندا وبريطانيا واستراليا وغيرها هذا غير ان كثير يرجع حتى بدون مايكمل دراسته وهالشي انا شهدته شخصيا. وانا مو مع منعهم بقدر ما انا مع تأييد وضع مقاعد محددة وتكون لجميع التخصصات بس يكون فيه مقابلة شخصية ومن خلالها يتحدد اذا الشخص يستاهل البعثه ووجه دراسه او لا لان بصراحة صار كل من هب ودب وكلمنا بغى الفكة من عياله وهم صغار ومراهقين ارسلهم برا ويروحون يدجون ويشفشلونا وبالاخير يرجعون بدون لا فايدة ولا حتى شهادة ! اضافة الى ذلك ان عدد الطلاب المبتعثين لمرحلة البكالوريوس يعتبر عددهم الأكبر بين المراحل الأخرى.

وشكرا

المشلكه انك طرحت الموضوع على انه موضوعك وما ذكرت انه منقووووووول

على العموم وزي ما قال saudi hustler المشكله من المشاكل اللي تجي من مبتعثي البكالوريوس لكن
السؤال ليش الطب بس وليش مو الهندسه هل يعني اذا طلع الطالب على انه بيدرس طب تضمن انه ما راح يلعب ويسوي مشاكل !!!؟؟؟!! ,, ماهو منطق ,,
اذا رفعت المعايير شوي حقت القبول ببتفادى مشااكل كثير ويبان اللي يبغى يدرس واللي يبغى يدشر.


وتقبلوا مروري مره اخرى ,,,,,,,,,,,,,,,

بالظبط اخوي بس انا ذكرت فوق انهم يحددو مقاعد وتكون لكافة التخصصات يعني مو الطبية بس بس الاهم يكون فيه مقابلة وعن طريقها يتحدد الجاد من اللعاب