دورة اللغه باستراليا

اللغة في أي مكان مجهود شخصي بالمقام الأول فالمعهد يعطيك مابين 30 إلى 40% من اللغة وباقي 60 إلى 70% ممارسة وتعلم ذاتي واللغة أنت اللي تمارسها مثل ماقلت لك والعائلة تفيدك بشرط إنها تكون لغتها الأم اللغة الأنجليزية ومن أصل إنجليزي أو من الدول الناطقة باللغة الأنجليزية بالتوفيق.

الله يعطيك العافيه اخوي ما قصرت كفيت ووفيت ان شالله بس لو خيرت في دوره لغه انجليزيه بين بريطانيا او استراليا ايش تختار لاني والله محتار ما ادري وين اخذ اللغه لان هالشي جايني عن طريق العمل

أنا أقولك أختار بريطانيا لأسباب:

- البلد كلها مليانة معاهد لغة من وإلى ومستويات الجودة متفاوتة واللي يهم إعتماد المجلس الثقافي البريطاني.
- وجود العائلات الأنجليزية اللي تساعدك على ممارسة اللغة.
- 6 ساعات بالطائرة.
- وجود المرافق اللازمة للمسلمين من مساجد ومطاعم وبقالات وغيرها.

لذلك لو بمكانك أختار بريطانيا ولا أتردد وكلامي لك ليس قصورا في أستراليا بالعكس البلد فيها مميزات كثيرة منها الطبيعة ونوعية الحياة أفضل من بريطانيا وكذلك يوجد معاهد لغة لكن نظرت لوضعك ووجدتك تبحث عن تحسين مستواك الوظيفي ولك هدف أن تتعلم في بيئة تساعدك على ذلك ولا يوجد أكثر من بريطانيا في هالمجال دعواتك وبالتوفيق.

تبي نصيحة واحد مجرب الدولتين !!

اخوي اذا انت طالع لغه بس
فان انصحك ببريطانيا

استراليا معاهد اللغة فيها متكدسة بالصينيين والعرب
وهذا يقلل من فرص تطبيقك للي تتعلمه

انا درست في بريطانيا وبصراحه طورت كثير لغتي
وانا اختلف مع اللي يقول مجهود شخصي

لان اهم شيء يكون الجو العام يساعدك في التعلم
فلما تصير متعرف على اوربيين وتطلع معاهم
راح تطور لغتك اكثر واكثر

بعكس لما تكون في معهد كله صينيين وعرب
وخارج المعهد عرب في عرب
الفائده بتكون محدوده

هي لغه بس لمدة سنه كامله وانا بروح هناك طبعا عندي لغه سابقه درست حوالي سنه كامله قبل سنتين ولغتي لا باس بها وانا لو رحت لبريطانيا او استراليا ابي اتعرف على اهل نفس البلد لاستفيد فهل باستطاعتي ان اصاحب اهل المنطقه والا مالي الا اللي بالمعهد والعائله اللي باسكن فيها

رأيك جميل وفيه نظر أخي الكريم وأتفق مع معظم ماذكرته والجزئية اللي أختلف معاك فيها هي التعلم الذاتي فاأنت ركزت على البيئة بس من دون أي شئ ونسيت أن الشخص نفسه هو أهم عامل والمكان لا يفرق كثيرا هو صحيح عامل مساعد وصحيح أن بريطانيا أفضل من ناحية دارسي اللغة وبالذات من أوروبا أو غيرها وكثرة معاهد اللغة لكن يبقى هناك أشخاص متوفرة لديهم جميع الظروف لكن لغتهم ماتطورت وفيه ناس ماطلعت برا السعودية ولو تشوف كيف يتعلمون اللغة تتعجب فيه بعضهم من متابعة الأفلام أو بعضهم من الشاتنق مع الأمريكان أو الجيمز ويرطن رطن بالأنجليزي يمكن أحسن مني ومن غيري.

لذلك العامل الأهم هو الدافعية أو الدوافع فإذا الشخص لديه دافعية للتعلم راح يتعلم ويتغلب على جميع الظروف حتى لو ماكانت من صالحه وأعطيك مثالين: أنا كنت في معهد لغة 90% من طلابه سعوديين فيه شخص جلس يسب بالوضع وأنه مو قادر يتعلم عشان بس فيه سعوديين وربط تعلمه بغيره وهذا خداع للذات مع أن جميع الأشياء اللي تساعده يتعلم اللغة متوفرة له فمثلا مكتبة المعهد بلحالها فيه مجلات من كل ماتتخيله ماجاء يوم وقال أجلس ساعة وأقرا لي شئ بالأنجليزي وأترجمه وفيه كاسيتات وسيديات سمعية لكل المستويات من المبتدئ وحتى المتقدم تصدق أن السعوديين اللي أشوفهم يجلسون ويسمعون شريط أو فيديو تعليمي بالمكتبة أو يقرون على سبيل المثال كتاب في كتابة الأيسيز نادر جدا مع إنها مجانية لكل طالب ومفتوحة من الصباح إلى 7 الليل وساعات البريك مابين الكلاسات للطلاب كثيرة.

وفيه شخص من المعهد للبيت أو مع رحلات المعهد وكل ماتمر عليه كلمة جديدة يدونها وكل مارجع البيت يراجع اللي درسه وكل يوم لغته تتطور رغم أن اللي حوله سعوديين وتخرج من المعهد ودخل الجامعة ولغته توب التوب.

لذلك التعلم هو شئ شخصي بالأول والأخير ومافيه أحد راح يجي ويحشي مخك باللغة وين ماكنت حتى لو في ديرة مافيها أجانب بس أهل الديرة الأصليين إلا إذا كنت مستعد نفسيا وعندك هدف ودافع قبل ماتدخل في أي بيئة وهالشئ بعده يمكن يساعدك ويمكن لا لكن أنت اللي تحدد إذا كنت بتسخر أو بتتغلب على الظروف هذي لصالحك.

إستمتعت بالنقاش معك وتمنياتي لك بالتوفيق أخي الكريم.