قال إيش قال تنظيم !!

November 6th, 2008, 12:20 PM

أهلاً أحبتي ..

مين أين سأبدأ وماذا أقول وااا أسفاااااااه على كل ثانية ودقيقة وساعة ذهبت ادراج الرياح

دار بيني وبين المكتب المظلم البائس هذا الحوار :

انا طالب مبتعث ورقم الطلب حقي ........ هل انا عندكم أو لا ؟

ايه عندنا خذ وقع هالورقه

وش اوقع عليه ؟

هذا تفويض منك للمكتب يجيبلك قبول

لا ياحبيبي صبرك عليا انا ابي جامعة محددها منذ مبطي ودخت السبع دوخات وانا ابحث بين هالجامعات

والله للأسف ماتقدر تحدد لأن الوزارة كلفتنا نوزع الطلاب على الجامعات

طيب .. ليه ؟؟ .. وش السبب يا باشا ؟

عشان التكدس

طيب يابو تكدس وين قدمتولي فيه ؟؟

والله مابعرف يوم الملتقى تآخذ قبولك واذا ماعجبك روح للدكتور ماجد واشرح اسبابك

طيب ليه تطولها وهي قصيره وانا الجامعة الي ابيها مافيها تكدس على قولتك بالعكس انا مختصر عليكم وجايب اسم الجامعه ورقم الكورس ومريحكم ؟

عشان قبولك جاهز وخالص واحنا ارسلنا اوراقك لأستراليا من اول ماجتنا الاسماء

طيب توك تقول انك ماتدري وين قبولي فيه ومعطيني هالتفويض اوقع لك عشان تجيب لي قبول وش هالتناقض !! ؟؟؟

في هاللحظه انفجر غاضباً هههههههههههه

ياخي انت ليه تجادلني قولنالك خلاص قبولك بتاخذه في الملتقى

اجادلك عشان هذا مستقبلي مو مستقبلك ولا مستقبل الوزارة

وقتها سكت وقلتله بجيك بعد اسبوع اشوف وش صار على موضوعي

راح اسبوع ..






قلت ياولد عطه اسبوع ثاني ..

وراح اسبوعين ..






رجعت المكتب ..

طق طق .. السلام عليكم ..

وعليكم السلام ..

انا جيتك قبل اسبوعين وتكلمت معك وو...

ايه تذكرتك عطني رقم الطلب ..

عطيته رقم الطلب وشيك وابتسم وقال ..

ملفك مو عندنا

هههههههههه والله هذا الي صاااار بعد كل هالزحمة يقول ملفي سحبته الوزارة وعطته مكتب ثاني

قلت طيب ياولد وإن شاءالله انها خيره عسى المكاتب الثانية متفهمين اكثر من ذولا ...
المهم دقيت على المكتب الأول وقالي مو عندنا ..
دقيت على المكتب الثاني قالي ماقدر ابحثلك لازم ترسل ائيميل ونرد عليك ..
قلت طيييب تكنولوجيا وانتوا مقطعينها عطنا الائيميل .. وارسلت لهم الإئيميل ويوم .. يومين .. ثلاثه .. محد رد علي .. قلت ياولد اطمر لهم مع الطامرين .. ورحت لهم وقابلني الموظف البشوش
قلتله ابي اشوف ملفي عندكم او لا ؟ ... شششششششششششششششط شقلي ورقه وقالي ارسل اسمك ورقمك على هذا الائيميل هههههههههههههههه
قلتله تستهبل علي انت .. ياخوي بالجهاز عندك ليه كل هالزحمه قال مايبين عندي !!!!
المهم اني طلعت من عنده وانا غاسل يدي منهم ..

قلت ياولد ليه ماتروح لخوينا الأولاني ارفع ضغطه شوي وأتأكد منه يمكن انه صرفني ؟

المهم رجعت للمكتب الأول وقلتله ان المكاتب الثانيه تقول اني عندكم وش السااالفه وين راح ملفي

قال لحظه اشيك .........

..................................

.......................................

ايه خلاص احنا ارسلنا اسمك من اول المفروض ان قبولك يكون واصل هاليومين !!!!!

يعني وش .. ملفي عندكم !!

والله هاي اللخبطة من الوزارة مو من عندنا

في هذه اللحظه انفجرت ضاحكاً باكياً .. وغسلت يدي من الوزارة والمكتب والبعثة ومني ومن عيال حارتنا و و ....

• نشر عبر تويتر
• نشر عبر فيسبوك
• نشر عبر جوجل