النادي السعودي في ملبورن 2013 || استقبال وارشاد الطلاب المستجدين

اخي العزيز ابوغادة والله فكرة هالنوادي انا ما اشوف جابة نتيجه بس بهرجه لاغير ممكن تكون فيه مساعدات لكن اعتقادي انها جدا ضئيله ولا ماحصلت اكثر المبتعثين يستفسرون واللي تايه ولاحد درا عنه
وزارة التعليم العالي والملحقيات بدل مايصرفون على هالنوادي اللي ماشفنا منافعها يعطون كل طالب مستجد بدل استقرار ويريحون روسهم وروسنا ويخلون هالطلاب اللي معطينه رئيس نادي وغيره ينتبه على دراسته
وانا ابصملك بالميه انه بتنحل ازمة المبتعثين المستجدين ولكن لاحياة لمن تنادي يعطون بالنوادي ولانعلم اين تذهب المبالغ فقط نرى تصوير واكل هل نحن جينا عشان نصور او نملى بطونا ؟؟؟
ياليت تقترحون هالفكره على المسؤولين يعطونا بدل استقرار ويفكونا من مسالة البشر اللي ممكن يجي بعضهم يتمنن عليك بالجواب
ارجو انه كلامي مايكون فيه تجريح لاحد وانا لا اقصد من كلامي اني معارض رئساء النوادي ولكن ما الاهميه قرائت كلام وقوانيين كثير عن شروط النوادي وواجباته ولكن لم افهم ولا كلمه من قوانينهم وواجباتهم باعتقاد فقط واجه لا اكثر فقط نريد صرررررف بدل استقررررر وكفى بنقول الله يعطيك العافيه يادكتور خالد ويالملحقيه والسلام خير ختام...

اهلا استاذ خالد .. وجهة نظر احترمها ولا ارى فيها تجريح لكن فيها تصغير من حجم المجهود المبذول من قبل الطلاب المشرفين على الاندية .. ولعل الموضوع لا يتسع لنقاش مكاسب الاندية وان تحدثت سوف يكون حديثي فقط عن النادي السعودي في ملبورن بكوني احد اعضاء الهيئة الادارية للاعوام ١٠ ١١ ١٢
لذلك ارى ترك النقاش ف الامر هنا وفتح زاوية اخرى له

تحية طيبة لشخصك الكريم

هلا وغلا باخوان ابو غادة والله يابوغادة الفكره اللي ابي اوصلها وانا اخوك ياليت التعليم العالي او الملحقيه يحذو حذو ارامكو السعوديه تعز طلبها حتى في ابتعاثهم
لما طلاب ارامكو يبتعثوا لاول مره الى ديره مايعرفون فيها شي ينزلهم اول حاجه بدل استقرار قبل سفرهم مع لاب توب جديد وادواته ومكافاة شهر وبعد وصلهم للمطار يستقبلهم مكتب ارامكو بالمطار وكلن يودونه الى مقر سكنه
طبعا هذا من غير حجز غرفهم بالجامعه جاهزه مرتبتها لهم ارامكو قبلها بشهر من بداية دراستهم ومن غير ارامكو تخصص لكل مجموعه مشرف ياخذ طلابه ويعرفهم على المنطقه ويطلعون لهم ارقام جوال ويدونهم السوق يتقضون نواقصهم وترتب لهم امورهم الجامعيه من تسجيل وغيرهم همهم كله يلبون احتياجات الطالب او الطالبه ويخلون كل همهم هو الدراسه فقط مايفكرون باي تكاليف ثانيه لكن لو لاحظت وزارة التعليم العالي والمحلقيات والدوائر الحكوميه
يرسلون طلابهم او طالبتهم او موظفينهم المبتعثون زي مايقولك خذوه فغلوه يجيبك بديره ويعطيك تذاكر ويقولك رح تسلف من امك ولا ابوك ولا جدك طيب يا اخي العزيز ابوغاده حط بعين الاعتبار
لو واحد فقير وممتاز وجته بعثه وليس لديه اي دخل ثاني غير انه الدوله تصرف عليه فكر معي وشلون بيعيش ببلد الابتعاث هذا اذا حسبناها قبل ماينزل المكافاه من وين بيعيش يتذلل للناس عشان يصرفون عليه والدوله
كاتبه بالضمان المالي نحنوا نتكفل بجميع شي ولا بس حبر على ورق وبعد مايلطعون ابوك شهر ولا اسبوع ويعطونك فوارق ولا هذا بعد مايذلونك بفتح الملف وغيره
انا محدثك مرافق مبتعث مواظف والله ثم والله انوه حجزنا على كانبرا وقعدنا ليلتن بس عشان نعطي اورقنا يدا بيدا لنظمن سلامة اورقنا يعني حتي الثقه راحت بيننا وبين ملحقيتنا وزارتنا الموقره
وفوق هذا كله بعد خساير فنادق ومصاريف تكاسي وبعد دفع وزن زايد لاغراضنا بعد مانتقلنا للمدينه المبتعثين لها صار لدينا مشكله بالنظام عندهم وتاخرت معاملتنا اين المخافه من الله هاللحين المبتعث ولا المبتعثه
جاي كل همه الدراسه مايبي يفكر بامور السكن وغيره يبي يجي الديره عشان يذاكر وينجح ماهو عشان يشقى بس والله اعلم الظاهر وزارة التعليم العالي تبي كل مبتعث ولا مبتعثه يشقى ويتعب ماني عارف ايش النقطه؟؟
عشان كذا من ابسط حقوقنا ان الدوله الله يحفظها لنا من كل مكروه انوه يفكرون يصرفون لنا بدل استقرار بدل المرمطه وننخى الرئيس الفلان والعلاني مانبي ننخى وننذل ونترجي ونقول تكفى نبي ننجز بنفسنا بس عطونا هالبدل
ونقول جزاكم الله الف خير ياوزارتنا الموقره وياملحقياتنا ......
اتمنى انك ماتتضايق من كلامي اوخي ابو غاده فيشهد الله اني ابي المنفعه للجميع وبدل الاستقرار حق من حقوقنا قد فقد بين ادراج الوزاره .....

السلام عليكم

بوجهة نظري ان رايك وخصوصا مقارنة ارامكوا مجانبه للصواب من جميع النواحي .. مابي اشارك وجهة نظري ل اسباب خاصة

اذا كنت تهاجم الملحقية الثقافية في استراليا بهذا الشكل ف انت بحق مجحف لها ... صحيح فيه سلبيات لكن يشهد الله انها متعاونة معنا ل اقصى درجة وماقصروا ف تطوير عملها

وبالنسبة للمعيشة انا شخصيا جدا جدا مرتاح ولله الحمد واشوف الابتعاث الى استراليا مايعتريه اي مشاكل مادية .. لعل عندك مشاكل صرف تحتاج لحلها اولا

ابتعدنا كثير عن الموضوع

استاذنك ب ايقاف النقاش هنا والانتقال لموضوع خاص اخر

كثر الله خيركم وبيض الله وجيهكم...
والله لن تجد شخص يضحي بوقته أو بعض وقته لمنفعة إخوانه المغتربين إلا وفيه خير كما قال رسول الله صلى الله عليه وسلم : خير الناس أنفعهم للناس.
وأنتم أهل الخير ويعلم الله أني لا أعرفكم ولكني أضم صوتي لصوتكم ولدي إقتراح لا أعلم إذا كان موجود من قبل أولا وهو:
وضع إستمارة في الموقع للإخوان القادمين إلى ملبورن لمساعدتهم في الإستقبال في المطار وإستخراج شريحة إتصالات وتعبئة نموذج السفارة السعودية وتوصيلهم للفندق أو للسكن إذا كان لديهم سكن محجوز من قبل .
وشكراً لكم.

السلام عليكم

أخوي أبو غادة

مشكورين الاخوان على الجهد المبذول كما كتبت

ولكن أنا كطالب مستجد وجاي بعد شهر ونصف وعلى البركة كتجربة اولى

راسلت النادي ومالقيت اي تجااوب

ابي استفسر عن اشياء اضافة الى ذالك عن الاستقبال بالمطار

ياليت هناك تفعيل زي اندية امريكا حيث هناك ابليكيشن تعبيه

اذا انا حاب المساعدة من النادي

كيف اقدر احصل عليها ؟؟


ومتى اراسلهم قبل الوصول ؟؟ وطريقة المراسلة ؟


ياليت توضح كل شيء بحكم انك طرحة الموضوع ولك تواصل معاهم

يرفع الموضوع للأهمية.

اخوي هل اتصلت على الارقام الموضحه ب الاعلى ؟

اذا كنت فعلت ولم تجد جواب ارجوا مرعاة فرق التوقيت +٧ وبعد ذلك قم ب ارسال رسالة نصية SMS ببيانات وذلك لعدم ظهور الرقم عند الاتصال من خارج المملكة

اخوي فهد
ياليت تتواصل معي في الخاص ب البيانات التالية
١- اسمك الثلاثي
٢- موعد الوصول ( الخطوط الناقلة)
٣- رقم جوالك السعودي + بريدك الالكتروني
س اقوم بتمريرها بشكل مباشر ل ادارة النادي لعمل اللازم

والحديث للجميع يا احبة ف حال لم تجد رد او تجاوب وذلك لظروف خارجة عن الارادة ك فارق التوقيت او خلل ف الاتصال ف ارجوا التواصل معي ف الخاص لتمرير الطلب بشكل اسرع