تجمع للعسكريين الذين لديهم دورة لغة خارجية لمدة سنة

اول مرة انت تسال وحنا نجاوب

هههه
حلوة
بس ابو فراس مطلوب عندهم اكثر مني
جاب فيهم العيد بسالفة 986
ههههه

اخوي تركي الله يوفقكم وصراحة مدلعينكم وشئ روعة بترك الاختيار لكم ..
وبداية دراستكم قريبة جدا وفيه كثير من فيزكم بتتأخر عن ذى الموعد ..
الله يوفقكم

هلا اخوي
ولعلمك ما فيه معهد بالعالم الجميع متفقين على مدحه
وكل معهد فيه سلبيات حتى لو انه اقوى معهد وتتوقف على الطالب ..

بالنسبة لامكانية تغيير المعهد بكل يسر وسهولة
وفيه نقطة من صالح المبتعث انه يحق للطالب تغيير معهد اللغة ثلاث مرات خلال دراسته للغة
ومن هذا تجد الملحقية فقط تزود المعاهد بضمان مالي لثلاثة شهور فقط ..

اخوي اذا عندك قبول الان خل تمشي اوراقك لاستخراج الفيزا عليه والامر عادي
وعندك طريقتين للتغيير
الاولى
نفس المكتب الي جاب لك القبول الاول يجيب لك قبول ثاني واكيد عادي ما دامك بتدفع فلوس
لكن هل تعوضك الملحقية او لا .. الله واعلم

والطريقة الثانية وهذه نصيحة خذها من اخوك
كل معهد يدرس فيه اي طالب مبتعث سواءً عسكري او تعليم عالي
فقط الملحقية تعطي المعهد ضمان مالي لمدة ثلاث شهور وتجدده بناءً على طلب المبتعث

فأنا نصيحتي لك توصل المعهد وتدرس عندهم وتشوف على عينك اقوى معهد من خلال مخالطتك
بالمبتعثين السعوديين واكيد بتعرف افضل الافضل بالنسبة للمعاهد وعليه فقط
عن طريق بوابة المبتعثين بموقع الملحقية تدخل على ملفك وتروح اتسوي طلب ضمان مالي على معهدك الجديد

وبقولك تجربتي في هذا الامر :: ((انا حريص بالتحدث عن تجربتي الشخصية
ليعرف الزملاء ما هي الادوات التي من الممكن اتخذاها اذا واجهتهم نفس المعوقات ))
انا طبعا جبت ضمان مالي على خمس معاهد ووافقوا لي لكن الي عجبني ودرست فيهم حسب قوة المعهد
والقرب لمنزلي وايضا لمناسبة برامجه تتوافق مع ضروفي فدرست بأثنين فقط

فالمعهد الاول غيرته وانا في السعودية وغير المعهد الموجود قبوله مع اوراق استخراج الفيزا
والمعهد الثاني مرسله الملحقية له ضمان مالي ثلاث شهور فقط لكن انا درست فيه فقط شهرين
وانتقلت لمعهد الجامعة ويتعبر من اقوى المعاهد على مستوى المقاطعة كلها بشهادة الجميع
والجامعة نفسها مصنفة بترتيب 150 على مستوى العالم فا وش تتوقع من معهد يأهل الطلبة للدراسة الاكاديمية فيها
ومع ذلك فيه من يسب المعهد لصعوبته واختبارات تحديد المستوى قلق واذكر معلم لغة انجليزية بالسعودية مبتعث
وحاطينه معي في نفس المستوى وتلقى الي يسب المعهد لم يتجاوز فيه وغيره لمعهد اخر
ومعي ست طلبة سعوديين بالفصل ولم ينجح غير اثنين فقط واربعة اعادوا اللفل فقرروا ترك المعهد ..

لكن
عشان احول ومن ذى المعهد التجاري لمعهد الجامعة رحت واخذت قراري من اول اسبوعين فقط
وبدت معاناتي مع الملحقية
ورفضوا بحجة ان قرارانا الوزاري على معهد ولا يجب تغييره !
فحجيتهم بأنني اصلا ادرس حاليا بمعهد ليس موجود بالقرار الوزاري
قالوا الملحقية نحن لا نملك الصلاحية لتغيير معهدك
فقلت لمشرفتي الدراسية انتي اطلعي مني بعذر وارسلي طلبي فقط للوزارة والي هو مرجعي
اذا انتي تعتبري الملحقية فقط حلقة وصل
وبالفعل رفعت طلبي للرياض وتواصلت مع الاخوان والحمدلله جت الموافقة
وبعدها بالصيف حولت لمعهدين ثم رجعت بحمدلله الان لمعهد الجامعة من جديد ..

هذه قصتي عشان تحط في بالك كل الاختيارات
لكن ترى سهل جدا الانتقال من فرع بمدينة لنفس فرع اخر بمدينة اخرى وبتواصلك مع نفس ادارة المعهد
ولا يتطلب منك دفع رسوم جديدة لدى المعهد لكن بمكتب الاسترالية ربما تطلب ما ادري وموفق اخوي

حيالله اخوي ابو جود وكني اعرفك !! هههههه احساسي يقول كذا
طيب يالغالي مبروكة البعثة وماشاءالله امريكا مرة وحدة
والله يوفقكم وامريكا خيار لن تندم عليه ابدا لكن اذكر اني درست بأمريكا بمعهد لغة تابع لجامعة
سئ للغاية واسوء معهد تجاري بكندا افضل منه
لذا مهم تختاروا المعاهد بعناية والله يوفقكم ..

بالنسبة لدعاءك اللهم آمين ويجزاك خير اخونا ابو جود
وماشاءالله عليك ومن اسلوبك باين عليك تشتغل اداري ومثقف جداااا

نصائح بشكل عام ومن وجهة نظري المتواضعة والمحدودة والتي على قدي
تفضل اخوي وعلى شكل نقاط وعسى الله ينفع بها وهي عن تجربتي الشخصية ::
-1-
اذا المبتعث جاي هنا عشان يحصر جلساته وطلعاته مع عايلته الافضل يقعد بالرياض ويدرس بالفيصل
فمهم ان طالب اللغة الاختلاط مع المجتمع الذي يتحدث اللغة ولو تحفظ 10 الاف كلمة وانت ما تستخدمها
معناته على لغتك السلام
-2-
لا للخجل لا للخجل لا للخجل
فــ اللغة عدوها الخجل
واخطي وخلهم يضحكون مع انهم نادر يضحكون من لغتك المكسرة
واصلا هم متعودين على شعوب امريكا الجنوبية من يتحدثون الاسبانية وكذلك الشرق الاسيويين
والسعوديين عند التحدث للغة الانكليزية افضل بكثير من اليابانيين والكوريين ومخارج الحروف اسهل علينا منهم

حكمة
الي راح يخجل ما راح يتعلم

-3-
اذا عندك اطفال تأكد انهم خلال الخمسة شهور الاولى سيتجاوزونك بمراحل
فــ حوّل سلبية (لمن يرى في ذلك سلبية من حيث اخذهم وتأثيرهم على تطور لغتك)
فحولها من تأثيرهم على تطوّر لغتك الى ايجابية
لهذا مهم تستفيد من وجودهم معك وتتحدث معهم بشكل يومي وعلى مدار الساعة بالانكليزي
الا في حالة واحدة اذا بتهاوش خلك بالعربي لان ما ينفع الا العربي ومفرداته الخصبه ههههههههههه

-4-
عني انا واعوذ بالله من كلمة انا
عائلتي لهم يوم الجمعة كامل ويومي الويكند سبت واحد
اما
من يوم الاثنين حتى يوم الخميس بدري عليه احد يقول نبي شئ من سوق ..
فلما اجي من المعهد مرات اخذ ريلاكس ساعتين بعدها اصلي المغرب واخذ شنطتي
ولا ارجع الا الساعة 11 مساء
طيب وين اروح
اروح لكافيه مثل ستار بكس او تم هورتنز ((طبعا مقاهي تم هورتنز هذه شركة منافسة لستار بكس
وفقط بكندا ومشهور جدا جدا وبمطار فنكوفر بس ستة فروع من قوته وشعبيته واسعار رخصية جدا
وسواءً وجباته الخفيفة او مشروباته الباردة والساخنة لذيذة وصراحة ما فيه يوم الا اطلب منهم ))
وميزته ان فيه فروع له تفتح 24 ساعة وهذا جيد في ان الزميل يطول وياخذ راحته لكن ما فيه انترنت
في المقابل ستاربكس يقفل الساعة 10 مساء ومرات فروع تقفل 10:30 ونادر تلقى محل يقفل 11 مساء
وميزته انترنت مفتوح

فــ احل واجباتي واذا احد ملقوف مثلي اسولف معه وبعيد عن دوشة الصغيرين الله يصلحهم
ودوشة امهم هههههههههههه احيانا

-5-
يا شباب لغة من غير كلمات معناته انت تطلب المستحيل
فمهم يكون معك نوته خاصة لكتابة الكلمات الي تقابلك
ومو كلمات بالكتيبات المطبوعة سلفا في مكتبات بالسعودية او مواقع الانترنت
حلووة بس الاحلى انك تعرف ايش المفردات الي تحتاجها بحياتك اليومية

فانت سوي لنفسك دكشنري خاص فيك
مثلا
لو تروح الى جسم الانسان تلقى خمسين مفردة
فأنا نصيحتي انه مو مهم تحفظها كلها وفقط احفظ الاطراف الرئيسية
تحدثا وسبلنق ووضعها بجمل

لو تروح للملابس تلقى خمسين مفردة مثلا
لكن الي يهمك في المرحلة الاولى والي هي مرحلتنا عموما
تقريبا عشر كلمات ولو تحفظها عن ظهر قلب نطقا وكتابة يعتبر شئ روعة

-6-
لا للتشتيت
تلقى الزميل اول ما يجي وده يعرف اللغة بسرعة وتلقاه معه عشرين كتاب
ودكشنري ناطق وكتيب للمفردات وغيرها
فالبعثة الحمدلله لمدة سنة وهي كفيلة بإذن الله تتجاوز البدايات للغة بشكل مريح جدا ومرضي عنه

عني بالنسبة للدكشنري تقريبا اول شهر استخدمته لكن بعدها صرت ما استخدمه الا اذا جيت احل الهوم وورك
وخل ترجمة الكلمات الي ما تعرفها بالمعهد عن طريق المدرس ويشرحها لك بالانكليزي
ويحطها في جمل وتكون ضربت خمس عصافير بحجر ولترسيخ المعلومة او المفردة

-7-
فيه في كل مدينة اكثر من مكان للكميونتي وهو عبارة عن تجمع
لاهل المدينة سوالف ومتطوعين ففرصة ان تشترك معاهم
وانا ما جربتها الا خلال الصيف لانهم الساعة الخامسة يقفلون وصعبة ايام الدراسة تروح لهم

-8-
فيه حاجة حلوة وهذه انا جربتها وصراحة جدا ممتازة وهي
انك تشوف وش هوايتك وتبحث عن طريق الانترنت بمدينتك وين تجمع
لهذه الهواية
مثلا انا فتيت تنس طاولة فصرت اروح العب وبراكتس لغة
وحلو لما تاخذ اللغة عن طريق هواية
فأذا ما عرفت تسولف على الاقل تلعب هههههههههه

-9-
وش بعد ..
والله الانشطة كثيرة والخيارات المتاحة رائعة ومتعددة
لكن من يعطيها من وقته ..

-10-
نقطة مهمة للغاية
فيه احد بيجيك وعشان تكسب اللغة فيقولك يا فلان انحش عن العرب والسعوديين !!
وهذا خطأ كبير ومستحيل

فمن جهة من الخطأ استراحة وبلوت وبلستيشن ويوميا !!
فهذا خطأ فادح وكنك يا ابو زيد ما غزيت ..

لكن
مهو يا حبا يا برك !!

سدد وقارب
ومن واقع تجربة انت تعيش غربة وضروري تحتاج تسولف بلغتك وتعبر عن مشاعرك
مع من هو يفهمك ويسمع منك
فنصيحتي وهذا ما انا اسويه فا من يوم الاثنين الى الخميس لا نعرف بعض حتى بالاتصالات
نادرة جدا جدا
لكن اذا صلينا الجمعة ورجعنا وريحنا لان في الصباح دراسة
فبعد صلاة المغرب وصار متعارف عليه نحن اربعة شباب
نتعشى بمطعم انا واحد الزملاء واثنين يحضرون درجة الدكتوراة من اخوانا السعوديين
يا نروح لمقهى او اذا الوذر حلو نطلع للغابة نشب الضوء ومعنا عدة كاملة للشوي والقهوة
واذا طلعنا للغابة مرات ناخذ عوايلنا معنا ونحجز لهم مكان مستقل
ومرات يجتمعون في منزل حديهن ..

ويوم السبت خاص بالعائلة والتسوق وكذلك الاحد
فتجي يوم الاثنين كلك نشوة وروقان ومستعد لبداية اسبوع دراسي
وتأكد لو يلتزم الزميل فقط بأربعة ايام الي هي من الاثنين حتى الخميس
بإذن الله تكفيه وتغنيه وتثريه من حيث اللغة

موفق اخوي ودعواتك

السلام علبكم و رحمة الله و بركاته

اشكر الاخوان على مجهوداتهم على هذا الموضوع الرائع

لدي استفسار هل يتم اعطاءنا من قبل مراجعنا هذه الايام قبل السفر راتبين اساسيه نقل عفش اعتقد مثل ما حصل في دفعة العام الماضي او لا او انها تاتي بعد عدة اشهر ؟ لان 986 ريال هزت الميزانيه شوي هههههههههههههههههههههههه سالت الوكاله وش سبب هذا المبلغ قال لاسمح الله صار لك حادث تجي الاسعاف تشيلك قلت عادي عيال الحلال الموجودين حول الحادث مو مقصرين بيسعفوني بلاش

من لديه معلومه لا يبخل بها علينا و للجميع الشكر و التقدير

وعليكم السلام ورحمة الله وبركاته اخوي متعب ..
وكل ادي اشاعات
وانا من الدفعة الماضية ولم نستلم
سوى
راتب السعودية محسوم
ومكافأة ملحقية ..

تركي الظاهر مسألة القبول ما بقى الا اغنيها لك ههههههه
يالغالي رديت برد سابق واقولك القبول هو واحد
واصلا المعاهد ما عندها الكلام الي يقولونه لكم ذى المكتب
ولو انه صادق كان القبول هذا المبدئي على قولته المفترض ما تقبله السفارة الكندية لاستخراج الفيزا !!

فالقبول هو واحد واذا عندك قبولك وتبي تدزه لي ايميل وانا اروح لنفس المعهد هنا
اذا له فروع معهدك واسالهم وترى الامر سهل جدا واذا ما له فروع
وانت بفنكوفر خليت احد الشباب الي امون عليهم يروح ويجيب لك العلم
ولو تدزه الان بكرة الجمعة وهو عندك الرد ..
موفق

بارك الله فيك أخي ( إنسان آخر ) ونصائحك على ( العين والراس ) ... ولي الشرف بمعرفتك ,,, جعل الله ما تؤثر به من وقتك ونفسك لمصلحة زملائك في ميزان حسناتك .

هلا اخوي انسان اخر
لا ما راح اشغلك بقبولي انا معهدي في ( اتوا الجليد والزحمة ) هههه
انا متاكد من قبولي واصلا المكتب لما كلمته وقال لي انه جاه القبول ما صدقته
وارسلت ايميل للمعهد وطلبت منه خطاب القبول وارسله لي مباشرة

انا ما عندي مشكلة بس الزملاء خايفين من مسالة القبول والمكتب يحلف لهم ويقسم بان القبول اللي معنا ما يكفي ولازم يرسل بالبريد العادي

اعتقد ردك كافي وبنسكر هالسالفة

تصدق فيه زملاء الى الان ما بدا باجراءات الفيزا الى الان ماشي مع تعليمات هالمكتب
وانا والله يضيق صدري اذا شفتهم كذا بس وش اسوي ما يصدقون ويتوقعون ان كلام المكتب هو الصح ـ وهم ما ينلامون يتوقعون انه ادرى منهم بهالامور .
يعني لا تستغرب اذا احد سال عن القبول مرة ثانية . واذا بتغني غني ههههه

انا وابو فراس و tmj123 وبعض الزملاء قدمنا على مكتب الفيفا وبكره السبت او الاحد ان شاء الله بناخذ اوراقنا بتاع الكشف الطبي وعلى مستشفى الحبيب .
والله يسهل لنا الامور . وجزاك الله خير اخوي انسان اخر - وقفتك معنا مشرفه .