تجمع للعسكريين الذين لديهم دورة لغة خارجية لمدة سنة

هلا اخوي ابو فراس
انا عندي 3 بنات بدرسهم ....كم يبغى لهم وكم شهر الدراسه ؟ عشان احسبها صح قبل اجي وهل 1000 شامله كل شئ ام المواصلات غير وكذلك هم ما يعرفون انجليزي كيف بيكون الوضع معهم هل فيه عرب عشان يندمجوا معهم في البدايه
وكمان المدام بدرسها كيف نروح كندا ولانستفيد كلنا من هذه الفرصه وماهي المعهد اللي تصلح اذا عندك خبر عنها
كم التكاليف تقريبا بما انك وصلت هناك وعندك خبره

السلام عليكم ورحمة الله وبركاته

تركي من اوتاوا يحدثكم

الف شكر لكل من سال
الامور ولله الحمد تمام التمام
ولا تشيلون هم كل شي متيسر
وما واجهتنا اي صعوبات ولله الحمد والمنه

نقاط سريعة
مطار لندن كان انتظاري فيه ست ساعات بصراحة شوي مملة
يعني اللي بيسافر يحاول قدر المستطاع يكون الانتظار 3 ساعات او اربع معقوله
ولا يصير اقل من كذا على اساس لو تاخرت الرحلة او شي
المطار كبير وكانه سوق بس فريته 3 مرات وما خلصت الست ساعات

اذا وصلت المطار بكندا الامور سهالات وما تحتاج حتى الواحد يشرحها
انا عن نفسي ثلث ساعة وانا برا المطار
اهم شي يكون معك بالاضاف للجواز الورقة البيضاء اللي تجيك مع الفيزا وصورة من القبول

المعهد بديت دراستي فيه الاثنين الماضي
الدراسة من 8:45 دقيقة صباحا وحتى 4:30 عصرا شوي طويلة
بس ممتعة وحلوة وفيها بريكات ودروس في المحادثة عن عدة مواضيع
يعني الدراسة متعه

وش بععععععععععععععععععععععععععععد

انا في اوتاوا العاصمة وبصراحة الحمد لله الديرة مرة حلوة ومرتاح فيها كثير كثير كثير
الجو بارد درجات الحرارة بالنهار من 8 الى 10 وباليل من 2 الى 0 مربع ههههه

بس فيه امطار , انا الجو الى الان معجبني بس بعد شهر شهرين مدري هههه

ابو فراس : الف الحمد لله على السلامة ارسل لي رقم جوالك الكندي على جوالي السعودي هههههه

ابو فلوة : هلا هلا والله ومرحبا زين شاركتنا بالموضوع
انا موجود وعندي نت بس مافضيت الا اليوم
بشرنا عن اخبارك والفيزا ومتى بتسافر ؟؟؟

د حمود . لفانكوفر . الكاتم . ابو عزة . ksa3 , فهد 2
مشكورين الف شكر على السؤال
مواضيع المدارس يجيبكم عنها ابو فراس هو ادرى مني
انا ما بديت في موضوع مدارس الابناء لانهم لازالو بالرياض
واتمنى لكم التوفيق

اخيرا اشكر شكر خاص وجزيل لاخواني انسان اخر وابو عزة وكل من شاركنا من المبتعثين
الحقيقة نصايحهم كانت مرة مفيدة واستفدت منها كثير
فالف شكر لهم والله يجعلها في موازين حسناتهم

انصح الجميع بقراءة الصفحات الاولى من المواضيع فيها معلومات قيمة

اي سؤال انا حاضر السبت والاحد فاضي نرد على اي استفسار

بالتوفيق للجميع

الحمدلله على سلامتك اخوي تروك
والحمدلله اننا اطمئنيننا عليك

وكيف احوالك ؟
وكيف الراحة النفسية جعلها من حسن لاحسن ؟

حبيبي بغيت اسئلك وين السكن حقك ؟
وهل رحت للسفارة وكيف الطريقة الله يخليك ؟
وايش قالو لك السفارة وايش الحقوق حقت المبتعث ؟
وكيف الاسعار ؟
ايش الاشياء الي نحتاج نجيبها من السعودية مثل التمر والقهوه والرز وايش كمان ؟

ومشكور يا حبيب المبتعثين الحلوين ....

الحمدلله على سلامتك ياتركي
انا مسافر انشاء الله يوم الاربعاء القادم نفس رحلتك
التاشيرة اتوقع تطلع السبت او الاحد وبالكثير الاثنين
بعدين وش اللي مشغلك ؟ عسى ما خذتك معك معاملات لكندا
موفق انشالله وسلمني على ابو فهد

السلام عليكم يا زملاء
اولأ اشكركم من كل قلبي على فتح هذا الموضوع اللي استفدت منه كثير وعجبني تفاعل الزملاء مع بعض والله لا يحرمكم اجرنا..
اخوي تركي مبروك عليك البعثة وتستاهل كل خير والحمد لله على سلامتك والله يوفقك..
انا عندي استفتسار بخصوص الفيزا..
لما قدمت على الفيزا هل ضمنت المدام والعيال معك في الفورم والا كل واحد بالحاله؟ واذا كانك ضمنتهم معك هل اشرت على خانة (انهم ماهم مرافقيني في الى كندا)؟
انا وضعي انه عندي زوجتي وولدين اقل من 4 سنوات..اذا رحت لكندا ابي زوجتي تدرس لغة واظن انه يحق لها عن طريق الملحقية في كندا دارسة اللغة فقط..بس المشكلة ان الفيزا حقتها لازم تكون دارسية مو زيارة ولا مرافقه..وكذا انا بتوهق في هذا الوضع..
والعيال بعد ابيهم يدخلون داي كير او اي مؤسسة تعليمية للأطفال..
يا ليت تفيدني قدر ما تقدر...حتى الزملاء الاخرين يا ليت تفيدوني اذا عندكم خبرة في هذي النقاط..
تحياتي للجميع والله يوفقكم جميع

هلا اخوي جمال
مشكور على السؤال
الحمدلله الامور تمام
انا ساكن حاليا في فندق رخيص
وادور لي على عائلة
بعد شهرين باجيب عائلتي وباستاجر شقة

السفارة ما جيتها
مريت الملحقية في مكان ثاني غير السفارة واخذت منهم الضمان المالي
وعطيته المعهد
الحقوق ما ادري والله انا فتحت ملف بالملحقية
وبينزلون الراتب على حسابي اللي فتحته بكندا هذي كل السالفه
ما فيها غيرها ههههههههههه ما لك الا الراتب

الاسعار بالمختصر المفيد اللي تشتريه من السعوديه بريال
تشتريه من كندا بدولار وعليك الحسبه

اللي تجيبه من السعوديه لا تكثر بس اهم شي الملابس الشتويه
هنا الملابس حلوة بس غاليه نفس الحسبه اللي تشتريه بالريال بالسعوديه هنا تشتريه بالدولار
فيه في اوتاوا محلات عربيه كثير
حتى مرة امشي لقيت محل مكتوب الشرق الاوسط باللغه العربيه
عنده كل ما تحتاجه

حاول تسجل كل شي تحتاجه علشان ما تنساه ولا تحرص
كل شي متوفر بس اذا تبي ترتاح اول ما توصل خذ كل شي معك

انا عن نفسي نسيت التمر مع اني حريص عليه مره ونسيت بطاريه الاطلس شاريه
وطلعته من الكرتون ونسيت البطاريه داخل لكرتون بالرياض ههههههه
والحين قاعد اتفرج عليه
ونسيت الدكشنري الاكسفور انجليزي انجليزي
ما معي ولا قاموس ههههه

اخوي جمال سالتك قبل كذا ما رديت علي
انت ديرتك اتاوا والا وين ووش اسم معهدك

بالتوفيق

هلا اخوي ماجد

الفيزا كل واحد معه جواز سويت له ابليكيشن الا اللي مضاف بجواز امه ما يحتاج تسوي له ابليكيشن
والفيفا بيعلمك عن كل هالشغالات مرة سهلة

دراسة اللغة لزوجتك والله ما ادري بس اذا تبي
شف لك مكتب يجيب لها قبول وقدم لها فيزا دراسية
بس تراها شغلة انا عن نفسي زوجتي فيزتها مرافقة وناوي اذا جت اخليها تدرس كم شهر لو على حسابي
ما هو لازم الفترة كلها , والزوجه اذا فيزتها مرافقة ممكن تدرس الى ثلاثة شهور ما عندك مشكله
بس بعد كذا ما ادري

الاطفال والدي كير والله ما عندي اي خلفيه وياليت احد يفيدك

بالتوفيق

ابو فلوة وابو فراس

هلا والله - ابو فهد يسلم عليكم سلام كثير

بالتوفيق يابو فلوة - ما بغيت تسافر هههه

انتبه ترى فيه نموذج لبريطانيا تعبيه قبل ما توصل للمطار
اشوف السعوديين حايسين فيه
طبعا انا ترانزيت ما عبيته بس انت لازم تعرف وش السالفه

ابو فراس وين جوالك
بالتوفيق للجميع