تجمع للعسكريين الذين لديهم دورة لغة خارجية لمدة سنة

السلام عليكم و رحمة الله و بركاته
عندي استفسار محيرني:
هل فيه احتمال لرفض اصدار الفيزا بالنسبه لدورة اللغه
و اذا كان يوجد ماذا يترتب على ذلك
هل يعيد اجراءات التقديم من جديد والا يشيل عفشه ويرجع لدوامه
بالنسبه لي قدمت اوراق الطلب لمكتب الفيفا و تأكدوا منها و ارسلوها مع العلم اني ما سلمت تعريف بجهة العمل
والابلكيشن الخاص بمعلومات العسكريين ما عبيته بامانه
محتاج واحد يطمني خصوص الموضوع
و شكرا

وعليكم السلام ورحمة الله وبركاته
هلا اخوي ماجد

اذا كان على النواقص اللي قلتها اتوقع امرها هين
كل ما عليك الا انك تجهز تعريف من عملك باللغه الانجليزيه
وتعبي نموذج العسكريين وبعدها تروح للفيفا ويرسلها لك يضموها مع اوراقك

او انه بيجيك ايميل من السفارة الكنديه انه ناقصك كذا وكذا
ويطلبون منك ترسلها لهم بالايميل او عن طريق الفيفا

نصيحتي لك كلم الفيفا وهم ينصحونك بالطريقه المثلى

اما الرفض ما يرفضون الا بسب معين ما سمعت انهم يرفضون بسبب نقص في الاوراق

تفاءل بالخير
بتجيك الفيزا ان شاء الله وبتسافر وبتدرس والامور بالمرة سهله

اتمنى لك التوفيق

وعليكم السلام ورحمة الله وبركاته
هلا اخوي خالد
- دراسه اللغة تعتمد على الشخص نفسه وعلى جديته في التعلم ومدى احتكاكه وممارسته للغه فممكن شخص
يبدا يخارج عمره بعد شهر وغيره ممكن بعد كم شهر على حسب الشخص
من الصعب احد يقولك المدة وعلى قولة اللي سبقونا اللغه على قد ما تعطيها تعطيك
- ونفس الكلام للاطفال بس اذا انت مهتم بموضوع تدريسهم جبهم معك من البدايه ولا تشيل هم اللغه بتدبر عمرك
والكنديين بالمرة متعاونين . يعني اي شي تحتاجه راح تاخذه لو بالاشارة . اللغه من واقع تجربتي ليس عائق في
سبيل احضار العائله معك.
- موضوع المده والله ما ادري عنها - كلنا قبولاتنا 48 اسبوع بس متى ننتهي ما ادري - ياليت احد يفيدنا
انا عن نفسي ما شلت هم هالموضوع ابدرس واذا بغيت اجازه ابطلب اجازة ومتى ما قالوا ارجع للسعوديه رجعت
- السكن مع عائله او هوم ستي هذا موضوع المواضيع
هذا الموضوع انت تحدده - فيه سلبيات وايجابيات لكل ناحيه وانت ووش تختار لنفسك
وكتبنا في هالموضوع عده تجارب ياليت والله تقراها وبتستفيد منها
- موضوع السكن ووين الظاهر انت في فانكوفر فما اقدر افتيك واتمنى احد يجي يساعدك في هالوضوع

بالتوفيق يا اخوي

لك جزيل الشكر على الرد السريع ويعطيك الف عافيه
لكن ما جاوبتم على سؤالي
ما هو الاجراء النظامي اذا رفضت الفيزا و شكرا

لا شكر على واجب يا اخوي

جاوبتك وقلتلك نفاءل بالخير
ما راح يرفضون - بيعطونك الفيزا وبتسافر وبتدرس والامور سهله ان شاء الله
فيه جواب احسن من كذا
ههههه

اذا رفضوا السفارة يعطونك الفيزا لسبب ما وان شاء الله ما راح يصير هالشي
بس اذ صار راح يرجعون لك جوازاتك ومعها ورقة من السفارة فيها اسباب او سبب الرفض
وش تسوي ؟؟
تنسى الاوراق اللي ارسلتها في المرة الاولى وتقدم اوراقك من جديد
مع شيكات جديده وتحاول تتفادى الاسباب اللي علشانها رفضوا الفيزا
او تجيب اثباتات تنفي الاسباب اللي من اجلها رفضوا يعطونك الفيزا

لنفترض جدلا انهم رفضوا يعطونك الفيزا للمرة الثانيه وما يبغونك تطب كندا
فيكون ما قدامك الا تغير الدوله وهذي يبغالها اجراءات مع التدريب الامني بالوزارة ومرجعك

بس ان شاء الله ما راح يصير هالشي - بكره انقز للفيفا وكمل اوراقك
وما ادري ليش حاس فيزتك بتطلع بدري وكل هالكلام اللي قلته ما راح تحتاجه
انا متفائل خير - خلك مثلي هههه

بالتوفيق

الغريب اخوي الله يعطيك العافيه اني بعد ما سلمت اوراقي جاني اتصال من السفاره يسألوني عن الخدمه و جهة العمل
و بعدها بايوعين ارسلوا على الايميل ابليكيشن مرتبط بمعلومات عن الوظيفه العسكريه. بالمختصر ما سألوا عن تعريف
من جهة العمل. عبيته من غير حرص و ارسلته. والان كملت المده شهر واللي دابلن سبدي ان اللي مقدمين بعدي راحوا وانا قاعد.
وشكرا

اخي ماجد حياك الله
بالنسبة لاوراقك كان يفترض انك مريت مكتب الفيفا قبل الارسال او رجعت لهذا الموقع في صفحات متقدمة بس عاد حصل خير فيه ناس سار معهم مثلك وجتهم الفيزة لذلك لا تقلق اتوقع انها لن تتأخر ولن ترفظ لذلك تفأل خير مثل ماقال الاخ تركي
وبعدين انا سار عندي خطاء كبير وجيت لمكتب الفيفا وقلت انا عدلت الخطا وابغي ارسل ايميل الحاقي عيوا ومشى الخطى على السفارة وجتني الفيزة

بالتوفيق شد حيلك

حياك الله
اخ خالد مدة الدراسة سنة من تاريخ وصولك إلى كند والزملاء الي قبلنا قابلناهم هنا وهم على وشك يمشون وكملوا سنة بالظبط
ولايجازات حسب ترتيبك مع معهدك واعتقد فيه مرونه كافية خاصة للشخص الملتزم بالحضور ويحسون انه مجتهد وصادق يقدرون ظروفه
السكن مع الهوم ستي انت وحظك يمكن تجي مع ناس عندهم خبرة ومنهم فايدة ويمكن تجي مع ناس ماهم فاضين بس الاصل هو اجتهادك
بالنسبه للسكن الداون تاون تستاهل انك تسكن فيها من غير قصور في رتشموند بس حسب وضع عيالك ومدارسم اذا بدرسهم في رتشموند فلا بد ان تسكن قريب من المدرسة وتحط التعب عليك
بس مادام مانت ابجايبهم معك وبتخليهم بعدين فتعال اول وبعدين بتشوف وتقرر
بالتوفيق وشد حيلك

والله احترت
الاخ تركي يقول رح لمكتب الفيفا
والاخ ابو فراس يقول لا تروح
حلها

لا تحتار ولا شي
ابو فراس يقول كان مريت الفيفا قبل الارسال
واضح ان ابو فراس يتوقع انك ما مريتهم ولا شيكو اوراقك - ما انتبه لكلامك في البدايه
خذ الامور يا خوي على ظاهرها ولا تسوي مقارنه بين الردود وفي الاخير تقول حلها

لا انا ولا ابو فراس موظفين في السفارة الكنديه ولا ندري وش اللي بيصير معك
هذي اجتهادات ونصايح نوجها لوجه الله خذ منها اللي تشوفه مناسب لك وتوكل على الله وحده

اتمنى لك التوفيق اخي الكريم