تجمع للعسكريين الذين لديهم دورة لغة خارجية لمدة سنة

TMJ123 وأبا فراس
ننجز امورنا بأنفسنا او نعتمد على الوكالة
أرى انكم تسبون الوكالة وأن ما عتدها إلا الدجه
هل السبب 986 ريال أو يوجد سبب أخر
أرجو توضيحه لنا
ولكما مني جزيل الشكر والامتنان

هلا اخوي ماجد

نصيحة لوجه الله تعالى خلص امورك بنفسك
وانحش من هالمكتب واذا تقدر تنسى ان فيه مكتب اسمه الوكالة الاسترالية يكون افضل

انا وابو فراس خلال يومين انتهينا
من ضمان مالي وكشوفات حسابات وكل شي
وبكره انا بقدم اوراقي لمكتب الفيفا
المسالة سهلة ما يبغى لها شي

الوكالة ما راح تسويها لوجه الله - كل شي بحقه وترى الوزارة ما راح تعوضك
بعدين تراهم ما هم متخصصين في فيزا كندا وبيحولونك على مكتب ثاني
علشان يطلع لك الفيزا - ومتاكد بيتاخر عليك
وبتجلس مطامر بين الوكالة والمكتب الثاني
وفي الاخير بتعطي الوكالة مبلغ علشان يأجل لك القبول

بعدين من قالك ان التدريب الامني طلب منهم انهم يطلعون الفيز والضمان
هم يوهمونك انهم مطلوب منهم هالشي علشان يستفيدون منك عمولات وغيره

ايضا مبلغ 986 التدريب الامني طلب من المكتب يعيد المبالغ للي دفعوا
يعني من اول لاعب عليهم هههههه ـ راح فيها ابو فراس

بالتوفيق للجميع

انا ايد كلام الاخ تركي
مايحك جلدك مثل ظفرك

السلام عليكم
وكل عام وانتم بخير
كيفك ياتركي وابوفراس وماجد الله يوفقكم في كندا في ديرة البرد
ماشا الله ياشباب كل مواضيعكم عن كندا الله يوفقكم
وبسألكم عن المبتعثين في نيوزلندا وش وضعهم وش صار عليهم
ان ما شا الله كندا خذت السوق كله
الي عنده معلومات عن نيوزلندا يفيدنا
اخوكم محمد

السلام عليكم ورحمة الله وبركاته
الزملاء مباركة عليكم العشر الاواخر وايضا مباركة عليكم الزيادة بالرواتب
والله يحفظ وطنا الغالي وولاة امرنا الغالين ودوم الله يسدد خطاويهم على دروب الخير

صراحة في خاطري شئ وبقوله وهام لكل مبتعث زميل لذا ::
اولا
برد على كل استفسارات الزملاء الاخيرة
ثانيا
التنويه عن حق مكتسب لكل زميل
ثالثا
الطيران واوامر الاركاب ضروري اطلعكم على بعض الشئ
اخيرا
فاصل واستراحة وهامة للغاية لكل زميل

فأنتظروني والله يوفقكم ويعطيكم من خير ذى البعثة وييسر اموركم يارب


وعذرا اليومين الماضيين ما قدرت اتواصل معكم لان موقع مبتعث تقريبا فيه مشكلة بالسيرفر مو راضي يفتح

هلا بك اخوي وسم
وقبل البداية بالرد على اسئلتك يالغالي لازم انت والزملاء تعرفون كيف الدوام اليومي ..
كانت الملحقية لا تدقق على ساعات الاسبوع الدراسي حيث تتفاوت الساعات من معهد لمعهد
فمثلا معهد تابع للجامعة درست فيه عدد ساعاته بالاسبوع 21 ساعة ..
انما تغيرت الاحوال من نصف شهر جون حيث الزمت الملحقية جميع المعاهد بكندا تجاري او تبع جامعة
بعدد ساعات 30 ساعة بالاسبوع ..
ومن تجربة شخصية ومن باب الفضول انا مريت على معاهد تجارية قبل ايام عدة وكلهم مرعبهم القرار
ويقولوا ما فيه الا 30 ساعة لكن لديهم خيارات وبرامج عدة يقدر الطالب يلتحق فيها بس مهم تكمل 30 ساعة

همسة ::
كل زميل لا يقول معقولة بقعد ساعات تصل الى ست ساعات يوميا من الاثنين للجمعة اكيد مملة ومتعبة
فالدراسة هنا على فترتين ولك الحرية بالأختيار بينها بالصباح تبدأ من 8:30ص أو 8:45ص أو 9ص
فأنا مثلا درست بمعهد يبدأ دوامه 9 صباحا حتى 12 ظهرا
الحصة مدتها 1:50 دقيقة متواصلة ثم بريك 20 دقيقة ثم الحصة الاخرى 1:50 دقييقة
ثم بريك مدته 1ساعة كاملة هي وقت الغداء طبعا حنا السعوديين نفطر فيها ههههههه ما بعد افطرنا
الحصتين هذه هامة للغاية عبارة عن رايتنق سبيكنق لسننق قرمر وفيها غياب وحضور واختبارات اسبوعية عليها درجات

ثم بعد بريك الغداء تبدأ حصتين من الساعة الواحدة حتى 3:40 عصراً وهذه فيها غياب وحضور لكن ما فيها اختبارات او عليها درجات
وهي عبارة الحصتين عن انشطة والعاب وتتفرج على موفي مثلا وتطلع للشارع او السوق مع المدرس او مطعم
وسوالف وسعة صدر وكيف تسال عن شئ وكيف الاسعار وكيف المحادثة وانواع الفضول واللقافة هههههه ..... الخ

فحاب اطمنكم ترى الدراسة هنا مختلفة جدا عن دراسة مدينة تدريب او اكاديمية الفيصل مع احترامي لتلك الصروح
وانا اذكر كيف الحصة ساعة ونصف بالفيصل كيف كانت مملة ومدرسين اكثر ملل واسلوب تدريس
تقليدي تقليدي تقليدي ملل للغاية
لكن هنا اليوم الدراسي يمر لا تحس فيه ابدا ابدا
فأسلوب التدريس ممتع للغاية وتلقي مهارات اللغة بالتسلية والدردشة والتحاور من الطلبة الاخرين
ومعامل روعة وورش تدريس مميزة وايضا فيه انشطة خارج المعهد مثل الرحلات وغيرها مميزة للغاية

واتمنى اني اذكر واعطي خلفية عن الفرق بين معهد تجاري ومعهد تابع للجامعة وليس حكومي مثل ما يطلق عليه البعض
ومن واقع تجربة شخصية ومريت عليهم الاثنين وما فيه مقارنة ابدا ابدا ..

-1-
الاجابة بالرد التالي

-1-
الاجازات في المعاهد على كيفك ووش تبي بس
لكن هنا فيه فرق بين المعهد التجاري ومعهد تابع جامعة
مثلا ::
معاهد الداون تاون مثل ما اسميها لانها متكدسة بوسط المدينة وهي المعاهد التجارية
لك في الاسبوع يوم تختاره وتغيبه ولا يحسب عليك غياب .
معهد ثاني لك في الشهر اسبوع تختاره وتغيبه ..
معهد ثالث تقول ابي لي اسبوع ما احضر فيعطونك ورقة توقعها بالموافقة من مدرسك المعتمد بالصباح
ثم تروح توقع الورقة من مدير المعهد ثم تتمتع بإجازتك ..
معهد اخر يجمع لك اسابيعك حقت الشهور الي انت مواضب فيها
ثم يعطيك شهر والا حتى شهر ونصف واحد الزملاء الله يوفقه ويرده سالم
خذاها الان برمضان وخارج الحدود .. لا احد يدري هههههه مشتاق لك يالغالي والديرة ما تسوى من غيرك ..

مرات تحتاج ختات يوم جمعة تاخذها مع عطلة نهاية الاسبوع او يوم اثنين وتمشي الامور ..
واذا الزميل او الطالب منضبط لا تأخير او غياب الا مستأذن تراهم يدلعونه وكل شئ ولا زعله ..
فيه معاهد تاخذ للعطلة الكرسمس مثلا ثلاث ايام وفيه معاهد تاخذ اسبوعين الى ثلاثة ... تختلف

المعاهد التجارية ما تعترف بشئ اسمه اجازة صيف وشغالة كل ايام السنة بل بالصيف يعتبر لهم موسم
لكن معاهد الجامعات تختلف وخذ عندك ::

وعاد شف الدلع
فيه زميل اعرفه الله يوفقه هههه مو انا
يدرس بمعهد جامعة وطبعا تعطل بفترة الصيف ونظام سمسترات وعطلتهم من اول يوم بجولاي وهو شهر سبعة
حتى بعد منتصف شهر سبتمبر شهر تسعة اجازة .... روقان يعني من منتصف شهر رجب وشعبان ورمضان
وخمشة ايام من شوال .. عطلة شهرين ونص واكثر
طبعا هذه حق يتمتع فيه الطالب وهو يتبع نظام معهده وصح مو من صالح الطالب انه يتمغط واجد
لكن روعة اذا بيحط برامج بديله او يلتحق بمعاهد او برامج خاصة وطبعا الملحقية توافق له بالتحويل فترة الصيف
ومسموح له شهر او شهر ونصف او حتى شهرين لين يبدأ معهده
وفيه في نفس الجامعة نظام البرامج الصيفية ممكن تلتحق فيها ومسموح لك وبإختيارك اذا ما بتسافر او بتريّح

اتمنى اني جاوبتك يالغالي

-2-
بالنسبة للفيزا اذا تأخرت لا تشيل هم ابد ابد
ولو تشوف قبول معهدك فيه مكتوب موقعهم الالكتروني وتدخل عليه وتشوف اي مدينة لانه فروع
ثم ايميل من سطرين ونص تقولهم انا طالب جديد وتعطيهم رقم قبولك واسمك
وتقولهم فيزتي تأخرت وتطلب التاريخ الي بخاطرك
وحتى لو طاف التاريخ وانت ما وصلت لكن قريب من موعد سفرك مو لازم تجدده
واول ما تاصل بالسلامة تسير على مديرة معهدك (اكثر المعاهد حريم مديرات بس ضفرات)
وتقول دوبني واصل برتب اموري وتعطيها البداية براحتك بعد اسبوع بعد اسبوعين بعد شهر..
لكن بداية بعثتك ترى محسوبة من اول يوم تدخل فيه كندا ..

بالنسبة للقبول المرفق مع اوراقك لاستخراج الفيزا مو مهم حتى لو غيرته بقبول ثاني او ثالث
وعني انا ارفقت قبول معهد ثم غيرت المعهد بكبره والتاريخ اخرته ولا فيه حتى مشاكل بالامقريشن هنا
لكن احتياطا اذا اخرت التاريخ او غيرت المعهد انك تخلي
صورة من ورقة القبول الجديد مع جوازاتك ولا تقدمها الا اذا طُلبت منك

-3-
فهمت اول سؤالك وهو :: هل فيه قبول اولي وقبول نهائي
لا يالغالي فيه قبول واحد فقط وهو قبول تستحصل عليه مرة واحدة
واذا تأخرت الفيزا لاي سبب تطلب قبول اخر من المعهد والاول يصير لاغي ..
وليس مهم تزود المعهد بضمانك المالي لانه المفترض ان المكتب او الملحقية اذا هي من قدمت لكم او اي جهة قدمت لك
المفترض ومهم انها مرسلته للمعهد والذي بموجبه عطوك القبول فــ مهما اجلت قبول بتاريخ جديد لا يطلب منك ضمان مالي جديد
الا بعض المعاهد مثل الجامعة التي انا فيها اذا اجلت فالمرة الاولى مجانا والثانية ياخذون 100 دولار
وهذا طبعا يختلف من نظام معهد لنظام اخر لكن يتم التعويض لكل على كل فلس بهذا الخصوص ..
وعني معهدين سابقين اجلت فيهم الاول مرتين والثاني ثلاث مرات ولم يطلب مني اي مبلغ ..

موفق يالقدير

وفقك الله انسان اخر وجزاك الله عنا كل خير

تأيد أو لا تأيد ( قدها وزت )
انا اليوم في التدريب الامني وافادني المسئول عن الدورة انهم لم يتم الإيعاز للوكالة بإنهاء الإجراءات .
ذهبت لتعليم العالي لإنهاء الاجراءات بنفسي رفضو اعطائي الضمان المالي وافادو بأنن تستلمه من الوكالة
الوكالة يومهم سنة إلى الان ما أرسلت لوزارة العليم صور جوزاتنا وقبولات المعاهد

لا ادري نحن في يد من للأحداث بقية ... يتبع
الله يسهل الامور ويوفق الجميع

حياالله اخوي ابو فراس وجزاك الله خير
وهذا هو المكسب دعوة بظهر الغيب لاخيك المسلم ..

مكتب الفيفا وقتنا طلب 150 ريال بس الظاهر بعد الازمة المالية زود الرسوم والا يمكن داري عن الزيادة الاخيرة هههههه

يالغالي مثل ما قلت لاخونا بردي السابق المكتب هذا لا يسوي زحمة وقلق
وبيستغلكم ويقول دراهمهم واجد وبتعوضهم الملحقية ..

يالغالي والقبول هو واحد بس وربي نصاب
والقبول هو القبول ويمكن اكثر واحد خذا قبولا وضمانات مالية من الملحقية على المعاهد بكندا هو انا ..
والقبول ما فيه قبول نهائي موجه للسفارة الكندية ابدا ابدا
القبول ما يوجه لاحد وفيه معلومات الطالب والمبلغ وبرنامج اللغة الملتحق فيه وتوقيع مدير المعهد والسلام

الطريقة كالتالي ::
اي معهد يطلب ضمانك المالي اذا عندك سكولر شب وهي بعثة دراسية
بعدها يسوي لك قبول وانت واقف وفقط يعبي بياناتك ويطبع الورقة وحتى التوقيع محفوظ بالجهاز لديهم وفقط يدزها ايميل ..
وانا اقدر لو زميل بديرتي وعطاني ضمانه المالي على الايميل اطلع له قبوله بساعة وارده له ومجانا ..

فالقبول هو واحد واذا فيه تجديد للقبول يلتغي الاول ويصير الثاني هو المعتمد ..
وبعدين اذا لكم الخيار وبتعطيون نصيحتي مكتب الفيفا معتمد لدى السفارة الكندية بالرياض
وشغلته ذى الشغلة مو تأمين وقبول وكلام فاضي وعشرين حاجة !!
شغلة مكتب الفيفا فقط يكمل اوراقك ويطلع لك الفيزا وسريع سريع واذا فيه تأخير فهو خارج عن ارادته
من السفارة الكندية نفسها ..

الله يوفقك ويسهل اموركم يارب

هلا اخوي محمد واتمنى لك التوفيق

والله الموضوع لكل الدول بس اغلب اللي شاركوا
من اهل كندا
والحمد لله الله سخر لنا اخونا انسان اخر افادنا باللي نبغاه وزيادة
اسال الله انه يسخر له ملائكة تنير له دروبه

على كل حال اذا عندك اي استفسارات محددة اطرحها وانا جاهزين
اهم شي طلع الضمان المالي من التعليم العالي
وبعدها تتيسر امورك

بالتوفيق