تجربتي مع المقابلة الشخصية

الله يوفقكم في المقابلة أنا من رأيي إن الإنسان لايتصنع في المقابلة و يحاول يكون بوضعه الطبيعي

جزاك الله خير اخوي
والله افدتني كثيير

صدقت التوفيق من الله سبحانه وتعالى

لكن بخصوص سابك اعتقد انك مؤهل مليون بالمية وردودك ممتازة لكن صدقني

هي الواسطة في اللحظات الاخيرة هي من قذف بك خارج البعثة

تحياتي لك

ياخي انا مقبول في سابك مع اني ما اعرف احد ولا عندي واسطة ولا شي وكل اللي اعرفهم في سابك(طلاب طبعا) نفس حالتي ما يعرفون احد في سابك . هم كانوا محددين 20 مقعد لابناء الموظفين هذا كل اللي في الموضوع وقاموا الناس سوو زحمة انك ما تنقبل في سابك الا اذا كانت عندك واسطة وطبعا الكلام هذا غلط..
الموضوع كله توفيق من الله ( اللهم لك الحمد)..

طيب عطني الاسماء

يا جماعة صلو على النبي

بلا اسماء بلا فضائح

خلاص الا سار سار
كلو قسمة ونصيب

وانا معكم


انا اعرف واحد شغال بسابك ومرتبته قويه


وحتى يوم جيت سجلت قالي لا تحاول ترى كلها واسطات


يعني لا تنقز وتوقع مافيه امل


عاد الرجال ماقصر كان بيتوسط لي


بس الوالد عيا ليه مدري <<< وش يحس فيه مدري



يعني ساااابك واسطااااات

ايه والله صادق اللي صار صار والحمد لله على كل حال
طيب على العموم خلني اعطي شوية نصائح للي عنده مقابلة شخصية يمكن يستفيد منها
اول شي طبعا اللبس لازم يكون رسمي ثوب وشماغ وبالنسبة للبنات والله مدري ايش يلبسوا.
الشي الثاني اذا دخلت الغرفة خل عيونك على اللي يسوون المقابلة وانت تمشي وخل مشيك طبيعي يعني لا تقعد تمشي ببطء ولا بسرعة خلك طبيعي.
الشي الثالث اذا وصلت عند اللي راح يسووا لك المقابلة سلم( السلام عليكم) ومو لازم تمد يدك لان يدك يمكن تكون معرقة ( صح نسيت لاقول لكم لا تشربوا شاي والا قهوة قبل المقابلة لان الكافيين يخليك متوتر) ولا تجلس الا اذا قالوا لك تفضل اجلس.
في المقابلة لما تتكلم خل صوتك طبيعي لا تتكلم بسرعة ولا تحاول تكبر صوتك ، خل جلستك مستوية ، لا تقعد تعض شفايفك ولا تطلع لسانك او تحك جبهتك ولا ذقنك والا عينك، ولا تحرك يدك كثير وانت تتكلم ( نصيحة اذا كنت ايمن حط يدك اليمين على فخذك اليمين و وحط عليها يدك اليسار علشان تمنع يدك من الحركة بشكل غير ارادي اما اذا كنت ايسر فسو العكمثل ما قلت فوق اذا كنت تتكلم خل صوتك طبيعي اما اذا حسيت ان واحد من اللي ييسون المقابلة بدا يمل فغير اسلوبك( مثال: لما رحت لمقابلتي في سابك كنت احاول اني اكون متواضع وما كنت امدح نفسي وا اجيب طاري درجاتي فواحد من اللي يسون المقابلة قال لي تكلم عن نفسك لمدة دقيقتين وانا اتكلم التفت عليه فشفت انه قاعد يقرا ورقه معه يعني مو معي فقمت عدلت جلستي ورفعت صوتي شوي وغيرة من نبرة الصوت وقلت " اجتهدت في دراستي وجبت درجات عالية في المدرسة والقياس واطمح... وبديت يعني امدح في نفسي بس مو كثيير" لما سويت كذا على طول التفت لي وصار يتابعني.
حاول ان اجاباتك تكون مختصرة ولا تتفلسف لان كل ما زودت في كلامك كل ما سالك اكثر حاول انك تجيب لنفسك مخارج (مثال: في مقابلة سابك واحد من المقابليين سالني سؤال قال ايش رايك في اللي يغيرون في سياراتهم يعني ينزلون السايرات وجنوط ولمبات ورسمات على السيارة فانا قلت ما عندي تعليق قال لي ليش؟ قلت لاني اصلا ما عندي سيارة) هو سال السؤال هذا علشان يعقدني لو اني قلت عادي واعتبرها حرية شخصية بيسالني ليش حرية شخصية وما ادري ايش واذا قلت اعتبره غلط بيقول انت متشدد والخ يعني باختصار حاول قد ما تقدر تطلع نفسك من السؤال
يمكن يسألونك كم سؤال بالانجليزي فلا ترتبك وتوقع في اي لحظة انه بيسالك بالانجليزي لانه اذا كان يكلمك بالعربي وفجاة غير انجليزي يمكن ما تلقط السؤال صح
الله يوفقكم ولا تسونا من الدعاء
واذا تذكرت شي باجيبه لكم
بالتوفيق
واعتذر للاخ (سرهيد الاصلي ) لان كلامه يمكن يكون صح بس اتمنى انه يكون غلط علشان ما يصير فيه ظلم

جزاك الله الجنة .. والله يوفقك ويحقق لك مبتغاك

مشاركة جدا مفيدة وربي ييسر لك