هنا ملتــقى زوجات المبتعثين في نيوزيلندا>> تفضلوا حياكم الله

Besht Auckland

يسلمووو حبيبي ماتقصرين الله يعطيكي العافيه مشكلتي ماني جريئه اني اطلع واغير جو اخاف لازم يكون معي احد واناعشان كذا ابي اتعرف على وحده من هنا في اوكلاند

انا ساكنه بوسط الستي قريب من الجامعه اذا فيه وحده بنفس المكان ياليت ترسلي ايميلها واكون شاكره لها

تحياااتي وتقديري

ابشري. ما طلبتي شي.

يسلموووووووو الله يخليك يارب ومايحرمك من اللي تتمنينه يارب

ماتصدقين وش كثر فرحت برسالتك وربي شاهد من جد من جد مشكوووووووره

و عليكم السلام و رحمة الله و بركاته.

أولا نرحب فيك في المنتدى بشكل عام و بمشاركتك بقسم زوجات المبتعثين في نيوزيلند.
حسب ما فهمت إنك تقترحين عمل قسم خاص لزوجات المبتعثين بشكل عام و يوضع القسم ضمن الاقسام العامة في المنتدى.
إن كان هذا هواقتراحك فهو اقتراح جميل جدا. فزوجات المبتعثين في كل دولة مشاركتهم قليلة جدا
تبقى نقطة واحدة، و هي إن زوجات المبتعثين في الدولة الواحدة لهم همومهم و أسئلتهم و تجاربهم الخاصة على حسب الدولة المقيمين فيها،
و بنفس الوقت ممكن يتم بينهم تعارف يرتقي للقاءات خارج المنتدى (حسب تجربة اختين في المنتدى تعرفوا على بعض عن طريق منتدى نيوزيلند و أصبحوا صديقات خارج المنتدى)
فتضييق نطاق قسم زوجات المبتعثات في كل دولة له إيجابياته من حيث البيئة المتشابهة و مشاركة النقاش حول موضوع بيئتهم، و بنفس الوقت ممكن نقول إن أحد سلبياته هو قلة المشاركة و عدم تعميم مشاركة زوجات المبتعثين.
ممكن نسوي تصويت في كل منتدى من منتديات الدول و نستفيد من التجربة الديموقراطية اللي نعيشها حاليا و ناخذ بأغلبية أصوات زوجات المبتعثين!
يبقى الرأي لأصحاب المنتدى الكرام، و لهم منا كل الاحترام والتقدير.
تقبلي تحياتي.
بشت أوكلاند.

فكرتك جيدة جدا
و اتمنى من المشرفين و القائمين على المنتدى انهم ياخذون كل الملاحظات اللي كتبتيها بعين الاعتبار و يسوون قسم خاص بزوجات المبتعثات.
و انا من ناحيتي، أضم صوتي لصوتك.

تقبلي تحياتي.

انا جايه لكم ان شاء الله ع بداية فبراير انا وزوجي

هاملتون - بندرس بمعهد اللغه تبع جامعة وايكاتو

محتاسه كثير عشان اللي باخذه معاي

اللبس شو اخذ معاي صيفي ؟؟؟

والا اخذ شتوي وصيفي سوا

وكمان بسال عن البهارات والقهوه والهيل فكرت اجيبهم معاي

بالنسبه للمطبخ ، مادري فيه مواعين هناااك او لا ؟؟

مفكره اجيب كم قدر ودلة القهوه وفناجيل وصواني

مرا محيوسه الله يعافيكم لا تبخلون علي بحاجه

السلام عليكم و رحمة الله و بركاته

أول شي نقوله: حياك الله في نيوزيلند.
ثانيا: بالنسبة للملابس..
جو نيوزيلند متقلب جدا. = نوعي في الثياب
شدة الصيف عندهم لا تتعدى ثلاثة أشهر تقريبا. = كثري من ثياب الشتا
المطر - ماشاء الله - صيف و شتا = لا تنسين كوت للمطر، أما المظلة فيفضل تشترينها من هنا لأنها تناسب جوهم واللي أحيان يكون فيه رياح قوية، لذا السبب بعض المظلات صنعت بحيث ما تنكسر في الرياح القوية.
الثياب عندهم ماهي بذيك الجودة ولا ذاك التنوع اللي عندنا، و الاسعار مرتفعة، و بما إنكم عائلة و بتصرفون على الاكل والشرب والأمور المنزلية، فماله داعي تصرفون كثير على الثياب. يفضل تجيينها معك.

البهارات والقهوة والهيل بشكل عام موجودة في أوكلاند في محلات عربية معينة= طبعا سعرها أغلى من ديرتنا بـ 40% تقريا. أما بالنسبة لهاملتون فما أدري .
مسموح لك تجيبين ذي الاشيا معك مع التنبيه على انها تكون محكمة الإغلاق وياليت تكون مختومة من المحل (مثل علب البهارات) لأن في نوع من التشديد على إدخال المأكولات. نفس الشي مع التمر، يسمحون فيه لكن جيبيه مختوم افضل.

أما بالنسبة للمواعين والقدور، فإن شاء الله كل شي موجود. لكن ماهي بذاك التنوع و الاسعار مثل ما خبرتك، بشكل عام مرتفعة.
و أكون معك صريحة، حن جبنا معنا كل شي، من قدر الضغط لين تاوة التيفال لين إبريق الشاهي و دلة القهوة والبيالات. شحناها كلها في الشحن البحري. صحيح الموضوع غريب شوي ويمكن البعض يضحك عليه، ولكن، الحمد لله فادتنا جدا و وفرت علينا أمور كثيرة. خاصة القدور، و صواني التيفال ، لأن هنا غالية جدا.

من رايي، إنك الحين تركزين على ثيابكم، و أموركم الشخصية لانه ما عاد يسمح بأكثر من 20 كيلو وزن للشخص الواحد. وثياب الشتا تاخذ مساحة و وزن بعد.
عندك بعد أجهزتكم الكهربائية، مثل الكمبيوتر و الشاحن و الجوالات و اي شي ثاني. ذي بعد بتاخذ مساحة. كلها جيبيها معك لأنك بتلقين هنا سماعات جوال وماهي بذيك الجودة سعرها 45 دولار نيوزيلندي بينما هي في ديرتنا تجي 45 ريال والا أقل بعد.

إن جيتي شهر فبراير ووصلتي بالسلامة و شفتي كيف الوضع، حاولي تشترين بعض الأمور البسيطة اللي تمشي حالكم في الفترة الأولى، مثل غلاية الموية و بعض القدور والصحون .
وجهزي من الحين كرتون و خلي فيه الاشياء اللي تتوقعين انكم بتحتاجونها في نيوزيلند لكن الوزن ما يسمح تشيلونها معكم. ولا وصلتي و شفتي انكم فعلا محتاجينها ومافي مثلها هنا، خلي اهلكم يرسلونها لكم شحن.
شيلي معكم عطوركم في العفش (في الشحن الجوي)، لان العطور هنا غالية جدا، و شركات الشحن الخارجية ما ترضى تشيل عطور كونها سوائل، لكن في عفش الطيارة مسموح تشيلونها .

ولا تحتاسين ولا شي، حن هنا باذن الله - نجاوب على أسئلتك و نساعدك باللي نقدر عليه.

تقبلي تحيات إختك..
بشت أوكلاند.