الى كل الطلاب المقيمين مع عوائل نيوزلنديه .. اطرح لنا تجربتك

مشكورين يأخوان حلو الموضوع ولله
انا بنسبه لي سكنت مع 3 عوائل خلال شهرين
أول عائله اسباب كثيره
عجوزه مدرسه في الابتدائي وعمرها حدود 45 سنه وبنتها عمرها 25 وطالب ألماني وطالبه صينيه فله كله ضحك ووناسه بس مارتحت نفسيا وسبب لديها كلبين أعزكم الله وانا من النوع مأحب هاي الحيوان حيل ونجاسه مثلاً تطبخ شوي ماسكه كلب شوي تبوسه وتكمل طبخ او تقص بصل او شي كذا اكره حتى اشرب ماي او شرشف اتلحف فيه ماقدرت اعيش سوى اسبوع لعدم راحه النفسيه
عائله الثانيه من أصل ألماني ومحترمه وماشاء الله شايب عمره 60 يمكن وشايبه عمرها 65 شايب مهندس متقاعد وشايبه ممرضه لحد الحين تشتغل ماشاء الله نشيطه حيل ولا تحب شي غير نظافه وبيت ماشاء الله كبير ومرتب حيل بس عيبهم شوي عاداتهم اهم شي عندهم النظام في الوقت في وقت العشا وجلوس ومواعد ثانيه وحتى في اكل لهم طريقه بس حمدلله احسن مايكون بيت نظيف واحسن مافيه مافي حيوان في بيت وراحه صح اما عائله ثاالثة من اصل توغنا شايبه وحده بس عمرها يمكن 45 بس طيبه ومررحه حيل حيل بيت حليو لايس فيه بس في عشا موحلو طباخها تحاول تطبخ لك حتى كبسه بس لاتجيد اوكيه بس حبوبه
ومثل ماقال لكم الأخوان أطفالهم لاتحاول انك تقرب يمهم مره من المرات جاه حفيد الشايب الألماني بينام في بيت غرفتي في سريرين ماتركة يينام عندي خلاه ينام في صاله ولا خلاه ينام معاي بس ماتكلم هاي عاداتهم وتقاليدهم ولازم الواحد يحترم عادات غيرهم مثل ماهم يحترمونك

أنا الحمد لله ساكن عند امرأة لوحدي وكبيرة في العمر...وفيها كرم غير طبيعي... قد تصرف علي اكثر مما تأخذ مني...ومن ميزاتها انها لديها روح شبابية عاليه.. لدرجة انها تحرص تروح معي لزيارة زملائي. والذهاب


للسينما والكفي شوب...ولها صديقة في تاورونقا: تسألني إذا أعرف احد في تاورونقا,, يريد هومستاي وأي واحد من الشباب يريد هوم ستاي في تاورونقا,, فقط يرد لي وأنا مستعد

يعيطكم الف الف عافيه
علي الموضوع وان شاء الله
سفري نهايه الشهر
ولله يكتب الي فيه الخيير

يعطيك العافيه ع الموضوع

السلام عليكم ورحمة الله وبركاته
اسف يمكن كلامي ما يفيد احد قبل المجيء ولكن بعد المجيء انا عندي نصايح تصنع لك عائلة مريحه وخالية من المشاكل
1- انسى انك سعودي وانك ماتشتغل بالبيت يعني حاول تجذبهم بكونك انسان بشوش ومستعد لغسل صحنك وكوبك وكل شي ولامانع من مساعدة ابو العايلة بالحديقة يعني حاول تضبط وضعك مع الراس الكبير
2-انت غير مجبر ان تغسل الصحن والكوب والملعقة والشوكة ولكن اذا سويت هالشي فانت تكون كريم (انتبه بعض العوائل وخاصة من اصول اوروبية يرون هذا واجبا)وتاكد كما تعطي راح يعطونك ولا تخاف غالبية العوائل يستخدمون غسالة الصحون يعني بس ارمى الزوائد وصب ماء على الصحن وحطه بغسالة الصحون وصلى الله وبارك
3- انسى شي اسمه كرم وايثار ولاتنتظر يلزمون عليك بالعشاء ترى اذا قلت ماني مشتهي لاتنتظر واحد يقول علي الطلاق من ميشيل ان تاكل (ام العايلة عندي)
4-وهو الاهم حاول قدر ماتقدر تسكن مع عائلة الرجال يكون كبير شوي بالسن وكذلك المراءة لان الشباب كثيرة طلعاتهم وبيعطونك خامس ولاهم بقاعدين لك بعكس الكبار تلقى طلعاتهم بالويكند ويعرضون عليك تخاويهم اذا زارو بنتهم او ابنهم مع ان صلة الرحم عندهم عالية(هههههههههههههههههاي)
5-النقطة هاذي صعب توفق بينها وبين النقطة السابقة ولكن اذا اضطريت وسكنت مع ناس شباب فحاول ان يكون عندهم بنت او ولد بعمر من 6الى 12 يسولف معاك وينشب بحلقك ولايكون اكبر من هالعمر لانه بيكون عنده اصحاب وبيسحب على مرسولك
واياني واياك تلعب معاه قيم وتفوز لانه راح يبكي ويكرهك خلك زيي العب معاهم واخليهم يفوزون وانا المستفيد قرقة طول النهار وكل ماطفشت رحت وقفلت غرفتي
6- ملاذك الامن هو غرفتك ولا لك دخل باحد يتمشكلون يتهاوشون هو والحرمه مالك دخل ولا تحاول تصلح ذات البين لانهم ماعندهم سر
واذا تدخلت بينهم يعتبرونك متطفل مالك شغل اذا جاك اوجتك تشتكي اسمع الشكوى وابلعها ولا تحاول تبدي رايك
7- ان شاء الله اكون افدتكم ولي عوده او سوف افرد موضوع متكامل لاني شخص جربة العوايل وتلعوزت معاهم واظن تجربتي بتفيد ناس كثير

اول شي يعطيكم العافيه جميعا ..
انا بطرح رحلتي الا اوكلاند بس انا قبل اربع سنوات كانت فتره الصيف
المهم ,
رحلتي كانت انا وصديقي بس صديقي تعرفت عليه قبل السفر بيوم لانه ولد صاحب ابوي < اذا فهمتم قولولي >؟

اول ماوصلنا للعائله طبعا وصلنا متاخرين نص الليل وستقبلنا باص المعهد ف المطار وبعدها الا بيت العائله اول ماوصلنا استقبلونا العائله.
اول مادخلنا جلسو رحبو فينا ونا ماعرف شي ولا خويي مانعرف غير ثانكيو المهم دخلوني غرفتي ودخلو خويي غرفته .

البيت صغير لكن حلو ومرتب العائله اصلها ايرانيه .اب ف الاربعينات تقريبا
, ام في نفس العمر تقريبا الاربعينات .
عندهم ولدين واحد عمره 14 . وواحد صغير ممكن عمره 8 سنوات
العائله جدا محترمه والابتسامه دايم على وجييهم

اليوم الثاني جونا علمونا اتجاه القبله والفطور يحاولون يسولفون معنا لكن مافهمنا شي < قهقه في قلب لايفقه خخخ

زبده المووضوع انها عائله جدااااا محترررررمه بس عيبها بعيده عن المعهد بالباص ربع ساعه تقريبا بس الله يخلي الباص واحمد الله اننا رحنا عندهم لان اخوياي ايامها كانو كل شوي يغيرون عوائلهم .

الطبخ ماشاء الله مره حلو وخاصه المكرونه < جونااااااااان

بس اكثرشي ماناكل ف البيت بس تقريبا الفطور هو الوجبه الاساسيه والعشا عليهم بس ننادر نتعشا ف البيت لان مانجي الا متاخرين

كانو يعلمونا وين نحط الملابس عشان الغسيل .

ماعندهم حيوانات . ولدهم الصغير رهههههههههههيب فلاوي الله يحفضه دايم نلعب بلاي ستيشن بس ماعنده كوره ذاك اليوم رحنا نشتري شريط لقيناه 45 دولار حلفت ماا اشتريه لو ماعاد العب بلاي ستيشن غالي مره << مهو زي عندنا عشره

وكنت ادخن بالسر في غرفتي مع الطاقه بس كانو يستحون مايسالوني دايم يسالون خويي يقولون زميلك يدخن خويي يقول ايه لان كانو يشمون الريحه ومستغربين لاني ايامها كنت صغير حتى ممنوع اشتري دخان بس اخوياي يشترون لي :$

بالعربي رحلتنا مااكانت دراسه رحنا فلينها اانا خويي وجينا lol لدرجه اننا كنا نهرب من المعهد ونروح محل انترنت نحمل رابح على ايامها توه نزل .. يامتعبني < وه بص
اللي اعرفه اني وصلت المستوى الثالث لان رحلتنا كانت خمس اسابيع يعتبر انجاز lol


هذا كل مالدي ويعطيكم العافيه ع الموضوع الجبااااار صراحه

تحيــآتـي ~ْ

فين الشباب نبى تفاعل اكثر

شباب انا ساكن عند مرة ماتجلس معي
ولا تقعد بالصاله بس جالسه بغرفتها

تكفون ابي عايله في اوكلاند عندهم بزران عايدي ويكون حبوبيين ويكون سعرهم 180 $

دورت في الهوم ستاي ولا حصلت