السكن بـ بالمرستون نورث

وعليكم السلام ورحمة الله وبركاته
مدينة بالمرستون نورث صغيرة جداً وفيها جامعة ماسي .. السكن مو لازم يكون قريب من الجامعه لان أصلاً المدينة صغيرة..
طريقة السكن هنا غالبا انك تستأجر بيت مكون من غرفتين الى 3 غرف مع المطبخ والحمام وأحيانا يكون فيه حديقة وقراج للسيارة .. طبعا اغلب البيوت غير مؤثثة فلازم تشترون الاثاث..
فيه عمارة فيها شقق مفروشة و مؤثثه كان ساكن فيها صاحبي و طلع بس ما ادري كم أجارها .. بستفسر منه لو حاب ..
الطريقة اللي دايما يسوونها الشباب اللي معهم عوائلهم انهم يستأجرون فندق 3 الى 5 ايام من موقع بوكينق ويوم يوصلون هنا يبدون يدورون البيت بنفسهم لين يلقون السكن المناسب ..
متوسط أسعار البيوت من 250 الى 350 دولار في الاسبوع ..

بالنسبة للمواصلات العامة جامعة ماسي يعطونك بطاقة طالب و بإستخدام هذي البطاقة تقدر تركب الباص مجاناً واذا تبون سيارة تأخذون سيارة مستخدمه بحدود 1500 الى 2500 دولار تقريبا..

بالنسبة للطيران لازم من وقفة اوكلاند ...
الطيران الداخلي يسمح بشنطه واحدة لكل شخص بالغ بشرط انها ما تتعدى 23 كيلو.. والطفل الرضيع ما يحق له شنطه اما الطفل الكبير اللي محجوز له مقعد يحق له شنطه بس مدري كم الوزن المسموح...

الفيزا افضل شي انكم تطلعونها من دبي لكن في حالة ان المحرم ما طلع له فيزا والطالبة عندها فيزة دراسية ممكن يدخل المحرم معها الى نيوزلندا بفيزا سياحيه تعطى له من المطار بشرط انه يكون عنده تذكرة خروج من نيوزلندا قبل ما يكمل 3 اشهر .. ويوم تجون هنا تقدمون على فيزا زيارة للمحرم ويعطونه نفس مدة فيزتك الدراسية ..

اتمنى تكون المعلومات مفيدة وأعتذر عن تأخر الرد
واي استفسار انا في الخدمة