كل واحد/وحده يدخل ويكتب لنا عن معهده بالتفصيل :)

جالوي اتلانتك مقفل لانه غير موجود بالقائمة

والله يا اخت كلي وفاء انا لي شهرين

ادور معهد محد دالني لدرجة جبت ارقام ثلاثة اشخاص اسالهم عن المعاهد

شخص قال انه درس في معهد جالوي اتلانتك وانه جيد لكن مقفل

شخص قال معهد سي اي سي على ما اظن وهو مقفل
والثالث قال انه يدرس في معهد ucd ,هو مقفل

محد افادني بشي

ننتظر من الاخوان افاده لعل وعسى

بس بالاخير الظاهر رايح نكتب معروض وشفاعة من احد الطلبة

اصحبت المعلومة عن معهد في ايرلندا سر خطير من اسرار البنتاغون

عدد المعاهد الجيدة لايتجاوز اصابع اليد لكن ؟ وش نقول عقول

لاتريد النفع ؟

خير الناس انفعهم للناس

ننتظر صدقة من احدهم لعلى وعسى

كتب بحرقه

سامحونا

والتوفيق للجميع

الصراااااحه احس ملتقى ايرلندا مافيه اي تفااااااعل بين الأعضاء ....

مدري شنوووو السبب ..؟

عكس ملتقى طلاب امريكا .... والله ندمااانه على اني ما اخترت بالتدقيق امريكا ,,, والحين افكر احول بالملتقى <<<<< فيس حط رجله هههههههههههه

كل واحد يبي يروح معهد مو متكدس وطلابه السعوديين مو بكثرة

فتلاقين الكل ساكت ويذمون فالمعاهد ومحد يمدح


هذا اللي اشوفه صاير

بالنسبه لي اشوف المعاهد مثل بعض مدام انها نفس النظام في التدريس


في البداية اي مدرسة راح تكون مفيدة لسبب مهم هو انك تتكلم مع متحدث لغه انجليزيه وتحاول تستمع له وتحاول تتحاور فـ هذا يفيدك في خارج المدرسة في الاسواق والكفيهات يعني يطورك في التواصل مع االاخرين المتحدثين

الخطوه اللي بعدها التطوير اللي نحتاجه عشان نعدي اختبار الايلتس وعشان في الجامعه نقدر نكتب مشروع كامل بالانجليزيه ,اعطي اراء كامله وتعليقات بالانجليزيه الاكاديمية هذا مارح يجي من تدريس جنرال فقط
عشان كذا مبتعثات كثًر الدفعة الخامسة على سبيل المثال دخلو حاليا بري ماستر

مثلا انا درست بـ مدرسة اتلانتك في البداية ثم درست بجولوي كلتشر لكنهم صراحة مو متميزين جدا ولا هم الافضل على مستوى جميع المعاهد . ولهم فايدة لفترة معينة بس

عشان كذا انتم اتجلسون على كلام ان هذا الافضل او لا اللي فيه مثل ماقلت ان المدارس تقريبا نفس المستويات

شي مهم اخير استخيروا وبعدها توكلو على الله

ربي يوفقكم وييسر لكم اموركم ان شاء الله

من جد القسم نايم واحس مافي اي تفاعل زي ماقالت اختي مهجه ...

لازم كلنا نتساعد ونتناقش عشان مانتلخبط ومن البدايه مضبطين امورنا ....

انا كنت مقرره على دبلن معهد وجامعه ... لكن الحين قررت ادرس المعهد في كورك او جالاوي والجامعه ان شاء الله في دبلن ....
والحين قاعده ادور على معاهد في كورك وجالاوي بس اللي في كووورك مقفله
يارييييت من الاخوة اللي في ايرلندا يساعدونا عشان نعرف المعاهد الجيده ومانتورط

الله المستعاان..
من جد مافي تفااعل هنا في بعض المواااضيع طبعا مو كلها , فيه هناا ناس ماشالله متعاونين ويحبون الخير الله يجزاهم خير ويوفقهم وينجحهم ..

المهم !!!!

في موضوع أخر هنا بالمنتدى فيه تصويت على أفضل معهد في ايرلندا , وااااكثر تصويت كان من نصيب معهد English in Dublin


أفهم من هالتصويت انو أفضل معهد ؟؟ أتوكل ع الله وأختاره يعني !!

أي أحد عنده معلومه عنه لا يبخل علينا ..

اخواني
زبدة معاهد دبلن
ces
ucd
وخصوصا بالايلتس
هي متكدسة لكن حاول خذ قبول وقدمه للملحقية وما رح يرفضونه
انا ادرس بالسي اي اس ونص الكلاس سعوديين
لكن هذا الشي يرجع لعقليتك انت كطالب ومتغرب علشان الدراسة واللغة
يعني اللي يسألك بالعربي رد عليه بالانقليزي وبكذا ترغمه يتحدث معك انقلش
المهم انا وزملائي بالكلاس سعوديين تقريبا 5 اشخاص حتى بالبريك مدة ساعه ما نتحدث الا انقلش
انا لي تجربة بمعهد اخر وارغمت كل سعودي على التتحدث بالانقليزي معي
عقلك براسك تعرف خلاصك
وبالتوفيق

السلام عليكم ورحمة الله وبركاته

حياكم الله إخواني وأخواتي
الحالة اللي تعيشون فيها الآن هي إحدى مراحل الإبتعاث الغير معلنة ، بمعنى آخر أن الهم الذي تعيشون فيه الآن هو هم صحي لكم لكي تفتحوا أعينكم وأذهانكم على أشياء جديدة وتحاولوا أخذ تصور عنها قدر المستطاع وتأكدوا أن كل المبتعثين هنا مروا بنفس التجربة ونفس المراحل .

أنا معكم بأن بعض المواضيع لا أحد يتفاعل معها
وأنا أقول شيء واحد : لو كل واحد منا الآن فتح الصفحة الرئيسية للمنتدى وأخذ نظرة سريعة على عناوين المواضيع سيجد أن 80% منها تتكلم عن المعاهد ، وهذا بسبب أن كل واحد يريد أن يكتب بنفسه ويريد رد خاص لموضوعه ، ولكن لو يكون فيه تركيز على موضوع واحد أو اثنين ويخرج الجميع بالفائدة .

بالنسبة للمعاهد :
دبلن ( ياحسرة ) فيها فقط حدود 30 معهد ، منها 6 مغلقة من الملحقية ( والمغلقة هذي هي الأفضل والأميز عن غيرها )
ولكن إن استطاع أحدكم أن يحصل على قبول فيها ومن ثم يراسل الملحقية فماراح يردوهم في الغالب ،
وإن ماتمت هذي الطريقة فما مانع أن الشخص إذا أخذ فترة في معهد وعرف معهد ثاني أميز أنه ينتقل له وهكذا...
حقيقة ( الـ UCD أمس فيه واحد يسب معهدها اللغة - الـ DCU فيه طلاب خرجوا منه ويذمونه ) !!!!!! وش الرأي ؟؟؟
اللغة هي : ممارسة .. ممارسة .. ممارسة .. ممارسة .. ممارسة .. ممارسة .. وليست معهد لغة


وفي الأخير أتمنى التوفيق والسداد للجميع بأن يجدوا مايبحثوا عنه وأسأل الله لهم الفلاح والنجاح

الله يوفقك ياسفيرنا بصراحة ردودك غاااااااية في الروعة والتفصيل

وأتمنى من أخواني المبتعثين الأستفادة من نصائح سفيرنا و القيصر و سمر الأردن في دبلن حيث انهم أكثر اطلاع وخبره وتجربه من غيرهم

والأخت أماني حالمة في جالوي