استفسار استفسار لمبتعثي ومبتعثات جولوي........

ياحبييييييييييييييييبتي الله يوفقك ويعينك ويسخر كل الخير بطريقك ...
انا جايتلك في جالواي ان شاء الله
للرفع

آمين وإياك ياعسل...
والله يحيك ترا المدينه حلوه وهاديه ومعليها كلام وعسى ربي يرفع يقدرك بالدنيا والآخره.

اختي ابشري بالخير، الامور مبشرة بكل خير وعسى الله ييسر امرك ويرزقك الذرية الصالحة،

التعامل الطبي بعموم ايرلندا ممتاز، من ناحية الرعاية و الاهتمام،

بالنسبة لوضعك فالمفروض انك قمتي او تقومي بالتالي:

- بما ان عندك بطاقة تأمين من شركة vhi مثل كل المبتعثين، فما عليك الا مراجعة طبيبتك العامة GP اللي فاتحة ملف عندها
وان ماكنتي فاتحة ملف لحد الان، فانصحك وبكل امانة بمستوصف فيه فقط طبيبتين (اناث) ممتازات بالتعامل وبالعلم والمركز الصحي
موجود في طرف قالوي الشرقي، بالضبط بجانب مركز السوبر ماركت الشهير ldil الموجود في حي RENMORE
و تلفونهم كالتالي/ 091781111

كل اللي عليكم انتي وعائلتك هو ذهاب ولي امركم وفتح ملف هناك لا يستغرق 5 دقائق لانها ورقة واحدة مصطحبا معه صور لجوازات السفر

بعدها عليك القيام بالاتصال بالمركز و حجز موعد لدى الطبيبة، المركز فقط فيه طبيبتين على مستوى عالي من الكفاءة وانا انصحك بالطبيبة / ميري اوبراين MERRY O'BRAIN

بعد ما تروحي للطبيبة هي راح تعمل لك ملف كامل ومتابعات اما في المركز او في احد المستشفيات، لكن اطلبي منها تحويلك الى مستشفى خاص
وانصحك بمستشفى اسمه / GALWAY CLINIC وهو قريب من هالمركز الصحي و على طريق دبلن السريع

لكن انتبهي انك تعملي على فحوصات طبية مثل دم وغيره باي مركز صحي، لابد ان يتم عمل الفحوصات الطبية لدى المستشفيات
لان التأمين الطبي راح يعوضكم ماليا بالنسبة للفحص المخبري الذي تم بالمستشفى وليس بالمركز الصحي،

فان طلبوا منك المركز الصحي عمل تحاليل ، فاطلبي منهم ان يتم هالامر في مستشفى وليس هنا وذلك لان التامين لا يشمل المراكز الصحية
من ناحية التحاليل المخبرية،

طبعا هنا في ايرلندا لا يسمح لك بالذهاب مباشرة الى اي مستشفى الا في حالة الطوارئ وهذا فقط في المستشفى الجامعي الموجود في وسط قالوي،
اذن انتي تقومي بالترتيب مع طبيبتك العامة ان يتم هالامر او هالتحويل الى مستشفى خاص وذكرت لك احدهم في السطور الماضية،

بعد اسبوع تقريبا او اسبوعين بحد اقصى تاتيك ورقة الموعد الى عنوانكم البريدي و فيها كل تفاصيل الموعد،

وان حبيتي اي زيادة في المعلومات حول هالامر بالذات "الحمل ومتابعته" فارجو الاتصال بالاستاذة جميلة المسؤولة عن التأمين في شركة vhi
على الرقم التالي/ 1850252253

اوقات دوامها من الساعه 9 صباحا الى 5 بعد الظهر

-----------

بالنسبة لقرارك فاشوفه مناسب لاني حسب ما سمعت ان الطفل المولود في ايرلندا من اي جنسية يحصل على مزايا جيدة من ضمنها الجنسية
و ايضا راتب شهري للطفل اعتقد انه فوق 400 يورو شهريا، وراح اتاكد لك من هالنقطة غدا باذن الله،

صحيح الامر فيه شوي تعب بحكم انك بروحك، لكن راح تكون هاللحظات عبارة عن ذكريات جميلة بالذات ان هالطفل الله يجيبه بالسلامة
سيحصل على مزايا مميزة ، ولو نشوف بصراحة نساء الغرب كيف ان عملية الولادة بالنسبة لهم سهله ، يمكن هي تولد وبنفس اليوم تطلع
و الامر بالنسبة لهم عادي، فانتي راح تخوضي هالتجربة واسال الله ان ييسرها لك و راح تكون مفخرة لك بالمستقبل

ان الشخص يقوم بنفسه و يعيش الجو المحيط فيه، لاشك مع الرغم من وجود تعب او ارهاق الا انها بتكون شي جديد بحياته

عموما لا تقلقي ابدا و تاكدي ان التعامل الطبي هنا في اصغر مركز صحي افضل بالف مرة من اكبر مستشفى عندنا
معليش الحقيقة احيانا تزعل لكن الحق حق

واتمنى لك كل خير

الكلمات تعجز عن شكرك ياأخوي ومافي كلمة قد تفيك حقك الا كلمة نبينا عليه الصلاة والسلام وهي أبلغ الثناء"جزاك الله خيرا"
فجزاك الله خيرا وبارك الله فيك معلومات كتبت باأسطر معدوده لكن الله العالم وحده قد ايش كنت جاهله بها وقد ايش أفادتني كنت أظن أخذ بطاقة التأمين وسيدا على أقرب مستشفى ماكنت أعرف بهذا كله فشكرا لك...ونفع الله بك ...
وأسأل الله لك:حسنات تتكاثر ..وذنوب تتناثر ..وهموم تتطاير ..وأن يجعل بسمتك سعادة ..وصمتك عبادة ..وخاتمتك شهادة ..ورزقك في زيادة ..

الله يجزاك خير اختي على كلامك الطيب وهذا واجب علينا لامنـّه ولا شكر ..

انتي عجـّلي في امورك، بفتح الملف وطلب تحاليل و الامور الخاصة في مستشفى خاص، المواعيد هنا تطول احيانا ،
مثلا لو بغيتي تحويل من GP الى مستشفى حكومي يمكن تنتظري الى 3 اشهر بعض الاحيان ،

لكن المستشفى الخاص تقريبا بعد اسبوعين والموعد يجيك،

انتبهي للنقطة هذي، نقطة اخرى وهي الاوراق الخاصة بالتامين اللي تم ارسالها لكم راح تلاقي جدول باسماء المستشفيات
الخاصة والعامة، وراح تلاقي ايضا كلام مهم عن برنامج المتابعة للحمل، ولو مالك خلق تقرين اتصلي على الفور بالاخت جميلة
وراح تشرح لك كل شي بحكم انها مسؤولة التامين.

سابقي الوقت لاني مثل ما قلت لك مواعيد المستشفيات تطول، وعسى الله ييسر امرك و امر الجميع.

إن شاء الله ياأخوي وانا لسى في هالعجقه بس الله يسهل...وبالنسبه للزحمه والانتظار عادي متعودين احنا لسه طازه خارجين من السعوديه اللي فيها السرا والزحمه حتى على محل الفول والتميس..
ومشكور مره ثانيه لاهتمامك وحرصك وأسأل الله أن يثيبك عن كل حرف خطته يدك في موضوعي....
حقيقه لقد أفدتني كثيرا.......
جزاك الله خيرا.

إذا هو مولودك الأول... فبدون تفكير.. الأفضل أن يكون بين أهلك في السعودية..!
وإذا كان سينضم لــ "أخوانه السعوديين".. فأنتي تملكين الإجابه.. لإن لديك الخبره في هذا الجانب..
أما نحن.. فلم يسبق لنا ذلك... حتى الآن.. ولا أعلم عن القحطاني..!

لا...راح يكون مولودي الثاني بإذن الله....نعم لدي الخبره بما إني مررت بالهوضع من قبل ولكن سؤالي عن مستشفيات جولوي وعن الولاده فيها لمن جرب ذلك وكذلك عن الإجراءات اللي لازم أسويها وشغالات مثل هيك والا التعب فيني فيني كنت هنا والا ببلدي لاني انا زوجي مايرضى أكون عند أهلي فترة النفاس فأكون ببيتي ولحالي وهذا كان وضعي بمولودتي الأولى بس أسأل الله انه يعيني ويلهمني الصبر لانه بجد راح يكون تعب وقد ماقلت تعب ماراح تتصور أنت كرجل حجم الآلآم والمعاناه اللي تمر فيها المرأه بهالوضع ومابيحس فيني الا أنثى سبق لها ذلك..
ومشكور لك يامبسوط على مشاركتك في موضوعي..وإن شاء الله دوم تكون مبسووووووط يارب.