اقدر اغير الفيزا السياحيه لـ دراسيه في كيب تاون ؟ وصلت الحمدلله ٩ جون

ننتظر الإجابه من ذوي الخبــرهـ . . .

كم يوم يستهلك اصدار الفيزا ؟

السياحيه ٥ ايام عمل .. السبت - الاربعاء .
الدراسيه مدري .. بس لهم عدة طلبات مثل تقرير من الجنائيه ان ماعليك سوابق و بصمات الخ

خلصت اجراءات الفيزا الدراسيه اليوم في كيب تاون و لله الحمد

بشر عسى امورها عدت على خير ..! وما طولت ,,.؟ وممكن ولا عليك امر تعطيني الطلبات بالضبط لإني ناوي اغيرها الى طالب ..

شطحه / وش المعهد اللي انت تدرس فيه ؟

الطلبات يا طويل العمر :
١ - صورة من الجواز . ٢ - كشف حساب بالانجليزي لاخر ٣ شهور ( ان كان كشف الحساب مو باسمك يرفق خطاب من صاحب الكشف يتعهد فيه بانه يتكفل بمصاريفك و بارجاعك للملكه او ايا كان بلدك مره ثانيه بعد انتهاء مدة الفيزا و الدراسه ) . ٣ - تذكره عوده و الحجز فيها بتاريخ انتهاء الفيزا المطلوبه . ٤ - تأمين صحي بالمده المطلوبه ( الشهر تقريبا بـ ٣٧٠ راند او اقل شويه ) . ٥ - كشف طبي من اي دكتور عام ( الكشف من ١٥٠ - ٣٥٠ راند كلهم زي بعض اهم شي الورقه ) . ٦ - ورقه من الشرطه في بلدك تثبت عدم تورطك في اي جنحه جنائيه ( يعني ماعليك محكوميه وشارد ) . ٧ - ورقه من المعهد الي تدرس فيه تفيد بانك دفعت رسوم المده كامله ( عادة المعهد يعطيك الورقه حتى لو مادفعت الفتره كامله ) . ٨ - ورقه من المعهد انك ساكن عندهم طول الفتره ( حتى لو كنت ساكن برا المعهد حاول تاخذها من المعهد اسهل ، و اشرحلهم ان الورقه عشان تجديد التاشيره ) . ٩ - رسوم التجديد ٤٦٥ راند ( تقريبا راح ياخذ منك الطابور قرابة الساعه واشوفه وقت مقبول ) .

نصيحه روح قبل ماتخلص التاشيرة السياحيه بوقت كافي وخذ كل الاوراق المطلوبه منك .. طبعا كلها بالانجليزي ، وحاول تعدي على مكتبهم وتتاكد من الطلبات بنفسك ، هذا الرد مايغني .
اتمنى لك كل التوفيق ( انا في معهد LAL )

الف شكر على الرد

* وودي اسألك لو تكرمت هل اقدر اخذ التأمين الصحي من السعوديه كمثلا احد يرسله لي واقدر استخدمه لفيزا الطالب بكيب تاون .؟

* ايضا كشف الحساب .. حسابي اللي استخدمه بكيب تاون هو حساب سعودي(الراجحي) .. اتوقع ورقة كشف الحساب لابد احد ياخذها من بنك الراجحي ويرسلها لي او فيه طريقه اخرى ؟!

* و ورقة من الشرطه .. عادي من شرطة كيب تاون اطلعها او لازم من شرطة بلدي (السعوديه) .؟؟ كيف نظامها بالضبط ؟

ومعليش كثرت عليك الاسأله بس احتاج الاجوبه للضروره ... ولك جزيل الشكر ..

التامين الصحي من السعوديه ممكن بس يكون الخطاب بالانجليزي و التامين دولي ، ويتم توضيح هذا في الخطاب ، افضل ان تاخذ التامين من جنوب افريقيا ( الشهر ب ٣٦٠ راند تقريبا )

بالنسبه لكشف حسابك ما اعرف لو تقدر تاخذ ٣ شهور في النت ؟ المهم كشف حساب بالانجليزي ٣ شهور

ورقه من الشرطه ، مدري لو شرطة كيب تاون تعطيك بس ما اعتقد تنفع لانهم مايعرفوك !! على اي اساس بيعطوك ورقه ؟ جرب حظك ، بس انصحك بورقه من السعوديه ، و نظامها تروح للمباحث الجنائيه ، بس دامك هنا مدري اذا احد يقدر يسالك عنها هناك ممكن برقم الهويه و الاسم ، الله اعلم

و انا تحت امرك ، انت تامر امر

تسلم ما قصرت يا غالي ... انا بشوف كيف الوضع وان شاء الله يصير كل خير ..