تجمع طالبات وطلاب التمريض

أهلين وسهلين ..

اليوم دخلت القسم دا قلت تبعنا ولا احنا في اي ارض ..

لان اسمنا علوم طبية مو علوم صحية ..

اني واي انفتح تجمع وان شاء الله يكون فاتحة خير علينا ..

بالنسبة ليا انا ما حددت الدولة لسع .. كنت في البرنامج على اميركا

بس انقبلت ليا اسبوع كمعيده ومحتارة فين أروح مدري ليه ...الدكتورة تبغا كندا ..واستراليا ..

المفروض اقدم طلب على الدولة هذا الاسبوع عشان اقدم عالضمان المالي وأبدء أدور عالجامعات لان مايرسلونا على قبول معهد لازم قبول مشروط ..

بس مره محتارة .. لان اخويه راح يعتذر عن الدراسة مؤقتا ويجي معايا وقالوا السفارة الامريكيه دايم ترفض اللي يعتذر عن الدراسة ..

عشان كدا فكرت بكندا .. حاجه اضمن ولو بدأت الدكتوراة راح احول على اميركا ههههه

بالنسبة للتخصص فبصراحه تخصص اسمو الكلينكال براكتيشونر وهو يعتمد ع الرعاية الاولية ..

لقيتهم في اميركا وكندا مره مهتمين فيه ولا تخلوا جامعه من هذا التخصص.. رغم ان مهمل للاسف في السعوديه .. بسبب الجهل المسيطر على الرؤس الكبيره في وزارة الصحة ... بس ان شاء الله يتغير على زمن الربيعه ...

ان شاء الله ازبط موضوع وانزل عن .. وياليت كل وحده عندها تخصص معين تنزل معلومات

بس ايش رايكم ننزل بالانجلش مافيني يعني اترجم بالعربي ... كلنا الحمدلله نعرف انجلش ..

وياليت قبل كل شي ندرس المشاكل الي يعاني منها التمريض ونظام الصحة في السعوديه .. ونشوف التخصصات اللي راح تساعدنا على حل هذ المشكلات ونتقسم على تخصصات معينه الوطن بحاجه اليها .
. ونسأل الله ان يعيننا ويجعل علمنا وخروجنا وغربتنا لوجه الكريم وابتغاء مرضاته ..

آسفة ع الاطالة .. ولاكن هذا مايجول بخاطري ...

تحياتي ..