حوار بعد ما رجعت من أمريكا ما أدري وش اللي جاني

March 2nd, 2011, 04:03 PM

السلام عليكم جميعا
ابي المشورة يا اخوان وأخوات في وضعي وودي اسمع ارائكم ونصائحكم وقصتي هي:
سافرت لمدة شهر الى أمريكا لغرضين الأول زيارة صديق عزيز مبتعث والغرض الاخر السياحة ، تنقلت بين عدة ولايات شي بالسيارة وشي بالطيارة وانتهت اجازتي ورجعت للسعودية قبل 3 شهور ولحد الان ما استطعت اتكيف في السعودية نهائياً لا من الناحية النفسية ولا غيرها فأصبح لدي رغبة شديدة جدا جدا للعودة لأمريكا لأي سبب وبأي وسيلة واصبحت اشعر ان جلوسي في السعودية مؤقت .كنت سعيد جدا ومرتاح جدا واحسن ايام حياتي كانت في هذه الرحلة.
انا غير موظف بل أعمل في التجارة ودخلي المالي مستور والحمدلله وتجارتي لا تتأثر بغيابي ، عمري اربعين سنة متزوج ولدي أطفال ، علماً انني اسافر سنوياً مرتين وما فيه دولة تستحق الزيارة الا وزرتها وما جاني نفس الشعور اللي جاني بعد هذه السفرة لأمريكا.
سألت بعض زملائي خاصة اللي سبق لهم الدراسة في امريكا يعني اللي طولوا هناك كيف شعورهم بعد العودة من أمريكا وهل لديهم نفس شعوري الاكتئابي الحالي، بعضهم يقول شعور عادي لانك جاي من دولة عظمى منظمة ولك حقوقك كاملة وراجع الى دولة نامية دون الخوض في تفاصيل عيوب هذه الدولة النامية وكلها اسبوع وتتكيف بالسعودية ولكن لحد الان ما استطعت اتكيف في السعودية بالرغم اني أحب السعودية.
طبعا سبق لي وسافرت لأمريكا قبل 20 سنة تقريبا للسياحة ولكن رجعت للسعودية بدون مشاكل ، يعني بدون رغبة شديدة للعودة لأمريكا مع انه مفروض العكس بحكم اني كنت مسافر لأمريكا انذاك بفترة المراهقة ولم يكن لدي زوجة ولا اطفال.
زوجتي جامعية عاطلة ما فيه مكان ما قدمت عليه فلا يوجد وظائف ولم يكتب لها القبول في برنامج خادم الحرمين الشريفين للإبتعاث لذلك قلبت راس زوجتي وقلت لها لازم تكملين الماجستير والدكتوراة في أمريكا على حسابي الخاص وايضا الاطفال رايح يستفيدون بدراستهم في أمريكا للغة يعني لازم نسافر وبعد ما تحصلين على الدكتوارة رايح تجدين وظيفة في السعودية وبدون واسطة ان شاء الله فوافقت زوجتي بل أنبسطت وبعنا الفيلا استعداد للسفر وبذلك حققت انا سبب السفر لأمريكا وايضا سازيل هاجس طالما اتعبني وهو ان التجارة غير مضمونة فماذا سيحدث لأولادي في حال تأثرت تجارتي ولم تعد هذه التجارة تدر المال او حدث لي شي فكيف سيصرفون على انفسهم لذلك لا بد ان تكون زوجتي موظفة لكي تؤمن نفسها والأولاد ، المهم انه بعد ان بعت الفيلا بدأت المشاكل والتأثيرات الخارجية من الاسرة:


- الوالدة الله يحفظها يوم درت عن بيع الفيلا ارسلت لي جالون مويه زمزم مقري فيه تقول ان فيني سحر والا عين ومتضايقة جدا تقول انها رايح تشتاق لنا .
- أهل زوجتي تضايقوا من الفكرة وبدأو في تشكيك زوجتي بأنها لن تحصل على الدكتوراه وحتى لو حصلت عليها فقد لا يوجد وظيفة لها لان كل شي بالواسطة وبالتالي تكون خسرت الفيلا والفلوس اللي عندنا ومع ذلك كنت أقوى منهم بتأثيري عليها بأن لا تسمع كلامهم والحمدالله ما زالت زوجتي مقتنعه بكلامي.
- والدي قال انت انهبلت ، فيه احد عنده فيلا ويبيعها عشان يدرس زوجته وعياله في أمريكا على حسابه، واذا امريكا عاجبتك رحلها سنوياً تمشية انت وعيالك وانتهينا، يقول اشتر لك عمارة هنا بالسعودية وأجرها احسن لك وحاول يثنيني عن السفر وبعد ما تأكد اني رايح رايح وكلامه لم يؤثر علي قال بنتك عمرها 11 سنة ورايح تواجه مشاكل هناك وصعب لها التأقلم في أمريكا خاصة انها تدرس مع أولاد ورايح يجيها مضايقات ( طبعاً ما اخفيكم يوم قال كذا شعرت بالقلق على بنتي) .

المهم يا أخوان وأخوات :
بدأت اشعر بالقلق من الموضوع بشكل عام واخشى لاحقاً ان يكون كلامهم صحيح بعد عدة سنوات وان اندم اني ضيعت الفلوس وابدأ حياتي من الصفر خاصة اني لدي زوجة وأطفال ومصاريف بل بدأت اشعر ربما يكون كل تفكيري وتخطيطي خاطئ
يا ليت اللي عنده نصيحة أو رأي يفيدني إن كنت على صواب أو خطأ وآسف على الإطالة

• نشر عبر تويتر
• نشر عبر فيسبوك
• نشر عبر جوجل