مساعدة محتار وابي مساعدتكم

أفيدوني الله يجزاكم خير

خيارك صعب ..صح الشهادة حلوة لكن الكثير معه ماستر ويرجع مايحصل وظيفة الا بعد عناء واذا حصل راتب مايتجاوز 11 الف ..
احسن طريقة لك انك تدرس بمكانك بالجامعة

أملي في الله كبير , وأرزاق وانا خيك وان شاء الله تتسهل
اي شخص عنده خلفية يفيدني ويعطيكم العافية

اذا تقدر تختبر الايلتس او التوفل في البلد افضل وانا اخوك
لان هذا الشي راح يساعدك في الدخول عل الجامعه عل طول وهذا يجعل فرص انضملمك للبعثه اسرع واوفر لك في المال والمصاريف
من انك تجي وتدرس معهد

الله يعطيك العافية ياغالي وبإذن الله تتسهل
حاليا جالس اجهز لاختبار التوفل وشكرا لك

والله وانا اخوك مسألة الوظيفه والدراسه صعبه جدا .. وصدقني لو انا في مكانك كان مسكت وظيفتي !
انت في ارامكو .. واوبوريشن .. يعني مسألة القريدات تعتمد على جهدك وحسب السوبرفايزر اللي عليك ! هم اللي يقررون بالقريدات !
ولو افترضنا انك بتشتغل بارامكو بشهادة جامعيه .. ترا نفس النظام .. جهدك لحاله او شهادتك لحالها ماراح تنفع .. القريدات لازم تجي توصيه من المدراء اللي فوقك !
هذي نقطه ..
النقطه الثانيه اللي انت ماحسبت حسابها واللي تقول انك بتقعد طول عمرك على نفس الوظيفه .. فأنت غلطان ياغالي ..
بالعكس انت لازلت في البدايات .. ومع الوقت باذن الله راح تجيك القريدات .. وباذن الله راح توصل لكود 11 ..
بس المسأله ماهي خمس سنوات ! يعني في خمس سنوات ماراح تاخذ كل شي ! بالعكس انظر لها مستقبلا ..
انت حكرت نظرتك فقط لخمس سنوات !
ليش ماتنظر لها بعد عشرين سنه ؟ او ثلاثين سنه ؟ والله يمد لك بعمر طويل يارب العالمين ..
يكفيك من أرامكو أنك لو كملت معهم 25 سنه .. ماتطلع منها الا وانت معك مبلغ لايقل عن مليون ريال !
من حقوقك !
غير البدلات السنويه ..

ولو رحت ودرست ورجعت .. راح تضيع ارامكو ماراح ترجعك عندها لانك كسرت العقد .. وفوق هذا ماراح تلاقي وظيفه بهالساهل وان لقيت ماراح تقدر تقارن وظيفتك القديمه بها !
لان مميزات الوظائف بارامكو ماراح تجدها في كل القطاعات !


لاتحكر نظرتك على كم سنه ... ! وتنظر لنفسك بنظره تشاؤومية .. صدقني اللي انت فيه الكثير يحسدونك عليه .. وانا اقولك ان الان المبتعثين غالبهم لو سنحت لهم فرصه في وظايف مثل ارامكو ..
راح يتركون البعثه ويرجعون .. لان الاوضاع ماصارت تطمئن ابدا .. واللي ماسك وظيفته كانه ماسك جمره بيده ..

والاهم من هذا كله .. رضا ابوك!
صدقني وانا اخوك .. ماراح تلقى التوفيق ولا البركه في اي مكان تروح له اذا ابوك ماهو راضي فيه !
اسألني انا ! اللي ابوي الله يطول عمره قعد خمس سنوات يحن على راسي يبيني اطلع ادرس برى .. بحكم انه من متقاعدين ارامكو ومن الناس اللي ماتقدر تتناقش معه اذا هو يبي شي خلاص يايصير يا يزعل عليك ! .. واخوياه كلهم عيالهم برى يدرسون .. وانا كنت رافض الفكره .. ولاكان يبيني اقعد بالسعوديه ابدا .. ولا كان اساسا راضي بدراستي بالسعوديه .. وكنت ادرس من جامعه لجامعه ومن معهد للمعهد !
والله وانا اخوك ماجي مكان الا وادرس فيه الا وتطلع لي مصيبه من تحت الارض واطلع من الجامعه او المعهد ! على اني جيد بالدراسه والحمد لله .. بس مااش ماكان الوضع يطمئن ..
يارجال حتى الدكاتره اللي يدرسوني .. والله يافيه بعضهم من اول يوم يشوف وجهي فيه يقول انت وش اسمك واذا قلت له محمد فهد .. قال اطلع برى ؟! طيب ليش مادري بدون سبب ! ؟
وعقبها تركتها وتوظفت في اكثر من قطاع برواتب تمشي الحال .. بس كنت اسعى في اموري ابي شي امسكه .. ولازال الوالد ماهو راضي بالمسأله وكان يقولي ادخل ارامكو لو تبي وظيفه .. وانا ماقبلتني ارامكو بالاساس ..
وكل هذا علشانه ماهو راضي !
وفي النهايه قعدت مع الوالده الله يحفظها وكنت متضايق وكانت تعرف ان الوالد الله يحفظه دايم يهاوشني لانه ماهو راضي ويعتبرني عصيته ! وانا ماعمري عصيت له امر غير هالامر بس !
فقالت لي ياولدي لاتضايق عمرك .. تبي التوفيق من الله .. لا تعصي ابوك ولا تزعله .. حتى لو قالك قط نفسك بالنار .. قله ابشر وافعل ! ..
وصار كلام الوالده يزن براسي واسترجعت كل الاحداث اللي حصلت لي وقلت في نفسي هل هذا اللي صارلي كله بسبب زعله علي ؟ ... قلت استغفر الله العظيم من كل ذنب عظيم ..
ودعيت ربي في ذاك اليوم ... وقلت اني راح اسعى في موضوع دراستي برى لاجل ارضيه .. وفعلا .. ماحلفتني بالله ان القبول ماكمل اسبوع الا وهو عندي .. وكل اجرائاتي خلصت بسرعه .. حتى استغربت من سرعة تخليص الامور ولا تعقدت ولا شي !
ولا درا الا انا جايه وقلت له خلاص انا بادرس برى ورحلتي بعد اسبوع !
ماتدري وش كثر استانس هو .. ورضا علي .. وسافرت والحمد لله اموري ماشيه ولا علي خلاف .. كله بفضل من رب العالمين ثم بفضل رضا الوالدين !

فنصيحه وانا اخوك .. لاتعصي ابوك على امور دنيا ماتسوى .. مالله راح يكتب لك فيها توفيق طول ما ابوك ماهو راضي فيها !

وقول "يارب إني رضيت بحكمك .. وأطعت والدي رغبة في رضاك يارب العالمين .. !"
ولا تهمك امور الدنيا والفلوس .. بس توكل على الله ولا عليك .. وصدقني والله لو اخلصت النيه مع الله وتركت هذي الفكره رضا لابوك .. والله انك لتشوف الرزق ينساق لك سوق من حيث لاتحتسب !
فلا تجعل امور الدنيا تغفلك عن رضا رب العالمين .. فمهما صار .. ومهما فعلنا .. لابد لنا ان نرضي ربنا برضا والدينا .. حتى وإن كانت احكامهم خاطئه !


انا اعتذر على اطالتي بالكلام .. لكن حبيت تكون قصتي عضه وموعضه .. وتتعلم من تجربتي .. ولا تقع بنفس الخطأ !

اخوك محمد بن فهد ..