استفسار هل هذا المبلغ يكفي ام لا؟؟

99% من الشقق بتلاقي فيها ثلاجة وفرن ومكيفات جاهزة ومحسوبه من ضمن الإيجار
كنب بتلاقي جديد ومستعمل وكل واحد بسعره ويتراوح من 300 دولار إلى أكثر من 1000 دولار وفيه خدمة التأجير
هل هالمبلغ يشمل الشهر الأول ؟
إذا الشهر الثاني نعم تكفيك

اول شهر باخذ احتياطاتي بس بنسبه استفسار عن السياره

( تمت المشاركة باستخدام تطبيق مبتعث )

يعطيكم العافية اخواني وجزاكم الله خير عالمعلومات

انا كمان ابي استفسر استفسار مشابه ،،،
بالنسبة لشخص واحد

كم المبلغ الكافي لبداية الوصول لأمريكا ؟؟
لو افترضنا مدينة الدراسه شيكاغو وبمعهد كابلان الطبي
لسكن مستقل واقصد شقه استديو غرفه وصاله ومطبخ
وكم متوسط الإيجارات لشقه نظيفة وبمنطقه أمنه
وفي حالة السكن مع عائله كيف الوضع وهل تنصحوني بهالشي او لا

سوري عالاطاله بس عشان يكون استفساري واضح ومحدد


( تمت المشاركة باستخدام تطبيق مبتعث )

اذا تبي الصدق ..
ياخوك والله ضعت معك .. قريت موضوعك وردودك .. مره تقول باتزوج ومره تقول متزوج !
ومره تقول عندك عيال .. ومادري وشلون جاي وضعك !
لكن بحسب "اللي استنبطته من كلامك" ..
إنك انت متزوج وناوي على الثانيه ! وتبي غرفه لكل وحده وغرفه ثالثه للاطفال ..!
وشكلك ناوي تطلع بالثانيه لفتره ثم تجيب الاولى وعيالها عندك ؟!

اذا اللي فهمته غير صحيح ..
ياليت تعلمني بوضعك ..
هل انت متزوج حالياً ؟ او راح تتزوج ؟!
واذا انت متزوج .. كم عدد الأطفال اللي عندك ؟

نبي نعرف كم نفس بتسكن علشان نعلمك بافضل طريقه للسكن لك !

أيضاً .. هل عندك مدخول شهري غير المكافأه اللي تصرف لك من الملحقيه ؟
وماهي الامور الاساسية اللي تبيها بالسكن ؟

كل هالمعلومات مهمه لنا علشان نقدر نعطيك معدل تقريبي للمبلغ اللي راح تحتاجه ! كأقل تقدير ..

ياحبيبي ابو فهد هههه الله يسعدك

انا معيد بإحدى الجامعات السعوديه ومدري راح ينزلي راتب اثناء البعثه او لا لأني باخذ قرض على اساس زواجي قريب ان شاء الله ثاني شئ ابغى احسب حساب لما يرزقني الله بأطفال والملحقيه راح تعطيني ان شاء الله 1800 ريال وزوجتي كمان 1800 صارت 3600 دولار هل تكفيني كدخل شهري ..وعلموني بكل شئ حتى لو ماسألتك .انا عارف ثقلت عليكم بس تحملوني

( تمت المشاركة باستخدام تطبيق مبتعث )

كذا وضحت الفكرة بس باقي المدينة يرحم والديك أذكرها قسم بالله أعطيك كل شيء بالتفصيل الممل هههههههههههههههههههههههههههههههههههههه

ايه يارجال اللحين الامور وضحت ..

طيب ياسيدي .. أول شي بما أنك مابعد تزوجت .. أخر الزواج في الوقت الحالي .. "نصيحتي لك"..
إذا ماكنت تقدر تأخر الزواج .. فالله يعين زوجتك تتمرمط معك شويتين .. بيكون شهر العسل لا ينسى

انا نصحتك بتأخير الزواج لسبب واحد .. وهو أنك لما تكون لحالك بتكون خفيف بالروحه والجيه وماتكون عندك الا مسؤولية نفسك !
وبكذا راح تكرم بنت الناس وماتمرمطها معك .. لانك اذا جيت امريكا ماراح تكون عارف شي .. فيبيلك وقت ليما تتعود على البيئه الجديده ..
والافضل انك تاخذها بعد ماتستقر بامريكا وتكون عارف اللي لك واللي عليك .. حتى تكونون مرتاحين .. خصوصا انها عروس .. فحرام والله تحطها في مثل هالمواقف !

اما مسألة انك تحسب حساب الاطفال .. فانت لاتستعجل .. يعني اللي يسمعك يقول انك متزوج اربع وكلهم بيحملون في نفس السنه !؟
الله يرزقك بالذريه الصالحه .. لكن هالامر مايحتاج تفكر فيه الان .. لان حتى لو الله رزقك بطفل .. برضوه الطفل مايحتاج الى غرفه خاصه حتى يصبح عمره سنتين على الاقل !
قبل هذا العمر بتلاقيه في سريره جنب سريرك .. !

وبكل الحالتين .. ماراح تحتاج الا شقه غرفه وحده .. واللي راح تتراوح اسعارها من 500 دولار وحتى توصل الى 1400 دولار .. وهذا يعتمد على حسب المدينه اللي بتسكن فيها !
فالمدن متوسطة المعيشه تكون اسعار الشقق فيها من 500 الى مايقارب 800 دولار للشقه مكونه من غرفه ومطبخ وصاله وحمام "اجلكم الله"..
اما المدن الغالية المعيشه .. فراح تكون اغلى من ذلك !

وطبعا الشقق عموماً تكون معها خدمات .. وغالباً الشقه تجيك فيها فرن و ثلاجه .. واما الغساله والنشافه فهي على حسب الطلب ففيه بعضهم يستخدمون غسالات مشتركه .. وبعضهم يوفرونها لك بإيجار شهري !

ايضاً بعض الشقق توفر خدمات اخرى متضمنه من إيجار الشقه مثل "الكهرب + الغاز + الماء + الانترنت + الكيبل "... وهذي ايضا تعتمد على حسب السكن اللي تسكن فيه !
والبعض الاخر لايوفرها .. فتكون فواتيرها مستقله .. وتدفعها !

ونظام الشقق نوعان .. فيه مفروش .. وفيه غير مفروشه .. واسعارها وخداماتها مثل ماذكرت تعتمد على نظام السكن نفسه ! لكن بتلقى الاثنين ..

إذا كنت بتاخذ شقه غير مفروشه .. وتبي تفرشها ..
فغالباُ 3000 دولار راح تكفيك وتزيد لفرش الشقه كامله !
وراح يكون الأثاث مكون من " سرير نفرين بحجم King بالاضافة الى الماتريس والمفرش + مكتبة وطاوله للمذاكره + كنب + طاوله للصاله + اغراض مطبخ صحون وملاعق وخلافها + اضائه + تلفزيون " ..!
ولو زاد المبلغ معناته أنك أخذت شي زايد عن اللي تحتاجه ..

اما عن السياره فاسعار السيارات تختلف .. لكنها تتراوح مابين الـ 3000 الى 15 الف دولار .. وطبعا كل مازادت القيمه كل مالقيت سياره باخر موديل وانظف !
عاد الموضوع هنا يعتمد على "فراستك" وكيف تطلع بسياره مضبوطه .. وايضاً تعتمد على العروض الموجوده في المنطقه اللي بتسكن فيها !..

بقية الامور بسيطه بإذن الله ولاتحتاج لها الى تفكير وتعقيدات ! ..

هلحين أمريكا فيها 80 ألف مبتعث
على بالك كلهم أولاد تجار؟
أغلبيتهم عايشين على هالمكافأة يا رجال
بالعكس أنت وضعك أفضل بكثير، عندك راتب بالسعودية، على الأقل يمكن يبقى منه 500 إلى 1000 ريال، تراها يعني 100 إلى 200 دولار، يعني تمشيك أسبوع إلى أسبوعين عند المرور بضائقة مالية هههه

أنا مثلك محاضر مبتعث من جامعة
ما آخذ من راتبي في السعودية شيء لأنه يروح لأمم آخرى ممن خلق الله هههه

ومع ذلك عايش على المكافأة وزوجتي مو دارسة
يعني مكافأتها بس 1450 دولار

و عليكم السلام و رحمة الله و بركاته ,,
فترة الوصول عبارة عن مرحلة تأسيس و الميزانية تطير في أقل من أسبوعين :

بالنسبة لوصولك لأمريكا بيترتب عليه ( غالباً و تقريباً ) ما يلي :
#أول أسبوع :
الفندق : الليلة تقريباً من 60 إلى 80
مصاريف مطاعم و تاكسي و باصات من 40 إلى 60 باليوم .

السكن :
تعبية الإستمارة ( بعض الشركات تفرضها ) 70 دولار
تأمين عند توقبع العقد 500 دولار و بعض الشركات 800
و تدفع مقدماً إيجار أول شهر ( على حسب الولاية و المدينة )

# تأثيث السكن :
مستعمل : من 800 إلى 1200
جديد من 1500 إلى 2500 ( على حسب أولوياتك و ذوقك )

# تجهيز المطبخ : مواد غذائية و بعض الأجهزة ( ميكروييف و خلاط و توستر و أواني و إلخ ) من 400 إلى 500
أخرى : شرايح جوال 100 ، تأسيس نت 50 و التأمين عليه ، عربة طفل .. ألخ

# راتب من 2000 إلى 2500 يمشيك شهر ( لين الملحقية تبدأ بالصرف عليك )

هذي بعض الأمور المهمه و راجع المرفقات لأني حطيت لك فيها تكلفة المعيشة (( اللي في مثل ولايتنا )) (:

بالتوفيق بإذن الله تعالى (:

مشكورين ماقصرتو جزاكم الله خير

( تمت المشاركة باستخدام تطبيق مبتعث )