السلام عليكم..يا أهل Detroit أفيدوني وساعدوني جزاكم الله خير

السلام عليكم ورحمة الله وبركاته
أتمنى أن تكونوا بأتم الصحة والعافية اخوتي الكرام..

انا اخوكم وليد الرشيدي تم قبولي ولله الحمد في جامعتين لمرحلة الماجستير تخصص لغويات في جامعة وين ستيت وتخصص تيسول في جامعة اركانساس تيك

انا صراحة ارغب بشدة في دراسة تخصص اللغويات في وين ستيت لكني سمعت كلام مو طيب عن المدينة

يقولوا انها مو امنة ويقولوا كمان انه بعد ما تغيب الشمس ما ننصحك تطلع او تتمشى..

هذا الكلام انقال لي من ناس يدرسون في الجامعة..عشان أكون دقيق، سمعت هالكلام من حوالي شخصين فقط..

وهذا اللي خلاني اكتب هالموضوع عشان اتاكد..


فأرجوا منكم اخوتي الكرام اعطائي معلومات عن المدينة، وهل صحيح اللي سمعت عنها..انا قلت يا رجل ما لك الا الله ثم الناس الساكنين في المدينة.. عشان تتاكد وتاخذ المعلومات بادق طريقة ممكنة..

غير الامان، احب استفسر عن الجامعة وعن السكن بالقرب منها وبشكل عام ابي تقولون لي لا هنتم هل المدينة غالية او رخيصة، ولو انها غالية فاين اجد اقرب سكن متوسط أو قليل السعر في هالمدينة؟

انا سمعت ان ديترويت عاصمة العرب هناك..وحاب اسال هل من الممكن اني اسكن قريب من الجامعة بس بعيد عن العرب؟

اعذروني على كثرة الاسئلة لكني والله ودي استبين واتاكد من الكلام اللي جاني لأني بجي انا وزوجتي وحاب تكون الامور كلها مرتبة واوكي.

اتمنى ان تتسع صدوركم لما قلت وارجوا من الله التوفيق لي ولكم في الدنيا والاخرة.



اخوكم / وليد الرشيدي.





ملاحظة: أرجوا من الإخوة المراقبين إبقاء هذا الموضوع في ملتقى "طلاب أمريكا" عشان أستفيد من كثرة الطلاب الداخلين على هذا الملتقى، لعل وعسى احد يجاوبني لانه كان في المدينة، مثلا.

..