مساعدة نصايحكم بخصوص رفع قضيه في محكمه امريكيه على مشرفه في الملحقيه

جزاكم الله خيراً جميعاً على النصح و المشوره
خلاص انا شلت الفكره من راسي ,,, الله ينتقم منهم
لكن والله معاني انسانيه عظيمه في نفسي تدمرت بسبب الملحقيه
قبل لا اجي لإمريكا كنت اقراء عن النجاح كنت اتابع محاظرات تطوير الذات ,,,, مسكين

جيت على امريكا و بديت انذل من المشرفه ذل ما بعده ارسلها ترد علي بالعربي بكلام ماهو واضح ارجع اطلب منها توضيح لردها ترجع ترسلي بالانجليزي ايضاً كلام ماهو واضح
اتصل بالهاتف عشرين الف مره اقعد لها اسبوع من الصبح الى العصر و انا ادق على الهاتف وماترد واذا ردت تسوي نفسها ماتفهم وتدخل معي في نقاش مطول ماله نهايه.

وصلت الى مرحله ابتعدت فها كل البعد عن تخصصي الي حتى ايام ما كنت ادرس اللغه عمري ما انقطع عنه بدأت اسال نفسي انا فين اروح عن جد فين اروح اشتكي لمين الواحد يموت من القهر في مكانه.
ارسل شكوى للعيسى يتصل بي رئيس القسم و يضحك علي بكم كلمه و ياخذني بالصوت و بسرعه يقفل معاملة الشكوى ولاعاد اقدر اوصل له بعدها.
يعني الواحد ايش يقول على الملحقيه بس يارب عسى ما احد يحتاجهم في شي او ينتبهون له.

و المشكله و المصيبه ان السبب تافه جداً و هم يعرفون ان مالي يد فيه وغيري كثير كان عندهم نفس المشكله بالضبط وما عارضوهم ابدأ
بالعكس مشوهم بدون ادنى ملاحظه وكان بيدهم كثير من الحلول البديله او على الأقل مساواتي بمن سبقني.
لكن آثرت المشرفه انها ترفض طلبي و ترجعني السعوديه وتضيع علي فصل دراسي كامل وما قدرت التزاماتي و التزامات اسرتي و علاج ولدي.

بشخطت قلم وجدت نفسي بمطار الرياض انقل ولدي مصاب بفشل قلبي بعد ما كنت اعالجه بأفضل مستشفيات العالم بأمريكا رحت اجري فيه زي المجنون اركب له اكسجين من هنا واحجز له موعد بالتخصصي من هناك.
راجعت عملي وقلت لهم هذا الي صار معي قالو لاحول ولاقوة الابالله ياخي البشر هذي ما تفهم رجعو عدلو لي الورق الي تبغاه الملحقيه طبعاً الكلام هذا اخذ ثلاث شهور على بال ما عدلت الورق من اجتماع الى اجتماع.
جاني احد المسؤلين قال يا اخي وكل امرك الى الله و انا ما افضل انك تشتكي لأن الموضوع اذا جاء من فوق بهذا الشكل ترى ممكن يتعقد اكثر حتى لو ان الحق معك 100%.

طبعاً الفصل الدراسي الثاني ما بقي عليه غير اسبوع ويبداء رحت ارسلت الورق بعد التعديل رجعت المشرفه رفضت الطلب من جديد كالعاده انصدمت شوي جلست على الأرض
وقلت خلاص هذا شي كاتبه الله عز وجل و لازم أأمن فيه ولعل الأمر فيه خيره وانا ماهو لازم اسعى بالشر لنفسي خلاص الله ما يكتب للواحد الا الي فيه خير له.

انا الآن خلاص في المرحله هذي انتهيت جدال مع الملحقيه و بديت اكثر من الاستغفار وكان ضغطي يرتفع لمستويات عاليه و اصبت بسكر من الدرجه الثانيه واصلاً خلاص شلت فكرت الدراسه من راسي
بدأت اخطط كيف ارجع امريكا عشان فقط اصرف عفشي وسيارتي وارجع بعض اغراضي رحت تسلفت فلوس من احد اصدقائي وسويت ضمان مالي وصدرت ال آي توني ورحت على امريكا
التذاكر طبعاً على حسابي الخاص بعت سيارتي و عفشي وصرفت كل الي املك هناك بسعر اشبه بالمجاني بعد ما خسرت حدود 4 الآف دولار بالشقه بدون سكن اربع شهور بالسعوديه اطارد بالمعامله
بعد ماخسر ولدي الخطه العلاجيه و العمليات المقرره له بعد ما تركت زوجتي تبكي وولدي المريض وراي بالسعوديه,,, كان شعور قاسي لكن خلاص آمنت بقضاء الله وقدره.

بعد اربع ايام من وصولي وبعد ما صرفت ممتلكاتي رجعت اتصلت بالمشرفه قلت لها يا بنت الناس طلبتي مني اعدل الورقه و عدلتها الآن انتي ليش ما تقبلين طلبي
قالت انت سويت شي ماهو مطلوب !!! قلت لها اهاااا طيب انا أسف ممكن يا سعادة المشرفه توضحين لي المطلوب معذرتاً والله انا كنت مشغول مع ولدي المريض و أسأت فهمك اتمنى ان يسمح وقتك الثمين.
قالت المطلوب انك تجيب لنا الورقه هذي من الجامعه الي عندك قبول منها ,,, طبعاً رحت لمشرفي في الجامعه وجبت الطلب في نفس اليوم ورفعته من الجامعه على البوابه ورجعت البيت الظهر.

والله جالس بالشقه على البلاطه تقريباً الساعه 2 الظهر بعد ماصرفت كل عفشي ونظفت الشقه وشغال على النت حق جاري كنت جالس الغي خدمة الكهرباء على امل ثاني يوم اسلم الشقه و ارجع السعوديه
الا شوي ويجيني بريد على جوالي (طلب مقبول) بسرعه فتحت بريدي من الآبتوب الافعلاً صدر لي ضمان مالي نهائي للجامعه الي صار لي 4 شهور اقاتل على شانها
طبعاً كل الي كانت تبغاه المشرفه و تصر عليه تنازلت عنه و اكتفت بورقه من القسم الي راح ادرس فيه ليش ما ادري الى الآن "لكنها الآن عملت معي زي ما عملت مع من عندهم نفس حالتي"

جلست افكر مع نفسي اقول هذي بأي فلم بالعالم تصير,,,
جالس لوحدي وعلى البلاطه و تارك اهلي وراي و ملغي عمليات ولدي ومصرف عفشي ببلاش وخساير مايعلم فيها الا الله وفجأه جاء الطلب مقبول
خلاص ماعاد في قلبي مكان للفرح اخذت الضمان المالي وصليت ركعتين شكر لله و ارسلته للجامعه تقريباً الساعه 3 الظهر و صدرو لي آي توني جديد انا وكل العائله اليوم الثاني.
وكلت امري الى الله و فوضت امري اليه وانا اعرف ان الله عزوجل سهلها لي اما من دعائي او دعاء زوجتي الي انا تركتها خلفي مع ولدي.

كانت بيروقراطيبه منقطعت النظير من الملحقيه شفت فيها اشد انواع الذل و الإهانات
وعرفت ان الفساد موجود و مستشري بالملحقيه
وتأكد ان من أمن العقاب أساء الأدب.

عندما انتهى الأمر على ماهو عليه ما حبيت اعيش دور الضحيه و استسلم ,,, "قد يكون افادني بعض ما كنت اقراء عن تطوير الذات فبدأت بتحويل المحنه الي منحه"
اخذت الموضوع بأنه تحدي بيني و بين اناس لا يريدون لوطننا التقدم و الرقي و انما يسعون الى اشغال اعالي القوم بسفاسف الأمور
فيضيعون عليهم الوقت و الفرص و يضفرون بشرف تعمير الوقت الطويل على كراسيهم
اناس يسعون الى اجهاظ قرار الملك التاريخي للإبتعاث بشكل غير مباشر بعد ان كان الابتعاث في الثمانينات محصور على طبقه معينه لم تقود البلد الى مستقبل مشرق.
انا لا اقول هذا الكلام بناء فقط على ماحصل معي و انما بناء على ماسمعت عن الحالات الكثير المشابهه .


أخيراً لا اريد ان اختم بمقولة مانديلا " نسامح ولكن لاننسى" وانما اختم بقوله تعالى {وكلهم آتيه يوم القيامة فردا}.


دمتم بود.