تجمـــع طـــلاب استراليا .. [ المرحلة الثانية ]

الأصيل ، حبيت اسأل وش بطاقة الصراف اللي ماشية معاك تمام ( الأهلي - الراجحي - سامبا ) وفي أي صرافه تستخدمها . الله يعطيك العافية .

طبعاً من أول اسبوع تحاول تفتح حساب في بنك الكومنلوث اللي تتعامل معه الملحقية . بس حبيت اسأل عن البطاقة التي قمت بإستخدامها حتى فتحت حساب في البنك الاسترالي .

اتمنى لك التوفيق .

شباب من فيكم نزلة له الفيز اللي بالدفعه الثانيه ...... بليز ردو احسكم طفشتم والله ما بقى شي

يحيى معتصم يقول فيه 12 طالب من 20 وصلت فيزهم باقي 8 فقط
ويقول احتمال يوم الاثنين او الثلاثاء الجاي
وفيزتي لم تطلع بعد

ايه شكرا على الرد فديتك .... وبالتوفيق يارب

صحيح الحين البعض في مشكلة خطيرة وهي ما نقدر نستلم التذاكر وقرار الابتعاث إلا بعد صدور التأشيرة وإرفاقها مع أصل وصورة من جواز السفر

وسعادة المكتب إلى الآن ماخلص إجراءات التأشيرة ولا جت وش الحل ياشباب .

أنا أشوف الحل كالتالي :

1- الاتصال على المكتب وتذكيره بأن لا بد من إنهاء إجراءات التأشيرة في حد أقصى يوم الأربعاء ليتم استلامها وتسليمها يوم الأحد إن شاء الله تعالى .

2- الاتصال بإدارة البرنامج وإخطارهم بهذه المشكلة .

3- لزوم تكرار الاتصال والتواصل مع المكتب يومياً خلال هذه الأيام .

وإلا وش رايكم , انتظر ردكم .

الله يسعدك ، فعلاً مثل ماذكرت لازم نكرر الاتصال ماعاد فيه وقت ،

وترى اليوم اتصلت على المكتب اكثر من مره وقلت وش السالفة بالضبط مع التأشيرة هذي ، وسألته عن تأشيرات الدفعه الثانية والثالثه ، قال الكلام الاكيد كل الدفعه الثانية لسه ماخلصت تأشيراتهم قلت أكيد قال نعم أكيد

قلت طيب ايه المشكلة بالضبط ، قال المسؤول عن التأشيرات مسافر ؟؟؟؟

قلت يا الطيب ترى مطلوب منا نسلم التأشيرة مع الجواز الأسبوع هذا يعني ضروري نستلمها منكم الاربعاء وش اللي المسؤول مسافر !!

قال إن شاء الله الأربعاء تكون جاهزة . يارب يسرها .

المهم المشكلة انه من كثر ما ازعجتهم اتصل علي برضه مركز الورود الطبي وتدري وش قال بعد :

( يقول اعطنا رقم الارسالية ) قلت كيف اعطيك رقم الارسالية وانت اللي تقوم بعملية الارسال والدليل اني دفعت لك حق الارسال مع الفحص الطبي ؟

قال كيف ؟ قلت اللي سمعته .

قال لالا خلاص المشكلة مو منكم المشكلة من المكتب نفسه هو مؤخر رقم الارسالية ولازم يعطينا المكتب رقم الارساليه على شان حنا نرفع بالاوراق ،قلت وش السالفة بالضبط قال لا تشيل هم التواصل راح يكون بيننا وبين المكتب ...<<<<< ما ادري حسيت انه يصرف ( أستغفر الله واتوب إليه ) .

المهم قلت وش علاقة المكتب برقم الارسالية حنا سوينا الفحص عندكم وليس عند المكتب

قال بس رقم الارسالية من عند المكتب وهو ما ادري وش مشكلته .

المهم قلت له وش مطلوب منا يعني إذا في شيء ناقص أو أوراق أو دراهم أو اي شيء قال لا وضعكم كله تمام واراقكم جاهزه .

قلت على كذا ننتظر قال نعم انتظر .

قلت طيب اذا المكتب اعطاك رقم الارسالية وش راح تسوي ؟

قال راح ارسلها على طول وراح نطلع التأشيرة .

قلت كم تاخذ من ارسالكم الى أن تطلع التأشيرة ؟

قال 48 ساعة .

يعني المسألة يا شباب لسه اوراق ومستلزمات طلوع التأشيرة لسه ما خلصت !!!!!! .

الله يستر ..

الله ييسر .




المهم حنا ماراح نستعجل وراح ننتظر إلى يوم الأربعاء الصبح إن شاء الله تتيسر وتطلع التأشيرة للجميع .

وإذا مافيه نتيجة لا سمح الله أشوف إنا نراجع إدارة البرنامج فوراً ، لأن إدارة البرنامج قالوا إذا فيه شخص متعثر يراجع إدارة البرنامج .

وإلا أنا غلطان .
موفقين ..

أنا خذيت معي بطاقة الأهلي مسبقة الدفع (طلبتها من البنك أنتظرتها حوال 11 يوم الين وصلت) , بعض الشباب معهم صرافاتهم العادية وشغاله هنا .أول يوم توصل فيه او ثاني تفتح حساب في كومنوورث . مايستغرق فتح الحساب اكثر من عشردقائق . والامور سهالات .

تساهيل ، تتيسر إن شاء الله .

وطلوع فجر الأربعاء قرب .