رفض الإجازة الإستثنائية (( معاناة معلم)) أريد حلاً

اخووي لاتسكت عن حقكك وانا مااعرف على اي ساس بناء كلامه هذا او اختراع من راسه

حنا موظفين تحكمنا انظمة وقوانين ديوان الخدمه المدنيه الي انت وانا وجميع الموظفين

بما فيهم المدراء والفراشيـن يتبعون لها


لاتسسسسكت عن حقكك وواصل الى ان تصل الى الوزير براسه ورهم ان راسك قووي وماراح تتنازل بالصوره اللي هم يبووون

والله يعينك يوووفقك كلنا عانيينا مثل هالمعاناة مع مسؤلين اكبر همه بياله شاهي وقراءة الجرائد

الله يعين !!
موضوع الحسد هذا منتهين منه لكن عدم فهمهم للنظام هو اللي يقهرك
لا ويقولون المصلحة العامة

كيف استطيع الحصول على نص النظام اللي يدعم موقفي
وهل هناك مرسوم ملكي في هالموضوع

أفيدوني جزاكم الله خير

اخي العزيز الاجازة هذي حق من حقوقك تأخذها غصب عن عليهم ... المادة رقم عشرون من لائحة الإجازات تنص عليها ..

خذ الاستمارة حق الاجازة ووقعها من التالي :
1 مديرك ثم 2 مدير شؤون الموظفين 3 ثم مدير شؤون المعلمين 4 ثم ( قسم المرئيات تقريبا بس نسيت اسمه ) 5 ثم مدير التربية والتعليم
اذا وقع لك رقم 2 و3 الباقي سهل
......
انا مثلك لم اتمكن من اخذ الاجازة الا بشق الانفس مع انها حق من حقوقي .. بسبب جهل الموظفين .................. ملاحظة لا تتعب نفسك وتروح الرياض لان الوزارة بتقولك هذي من صلاحيات نفس ادارتك ..
لا تيأس الموظف الي يقولك لا ترى ما عنده سالفه ؟ قول له وقع وبس

اول مبروك البعثة وخلي قلبك كبير يا أسد سأعطيك قصتي وشوف انت وش يصير معك

زوجتي مبتعثة وقرار البعثة صدر ولم بتنفذ اعتقد فيما لا يقل عن شهرين او 3 او يلغى بعد ذلك شوفت الحشرة كيف
الله اكرمني و توظفت في الحكومة وصل القرار الابتعاث او انا ماكملت 5 اشهر بالعمل ( اتوقع انك لك اكثر من 2 سنة معلم )
و ازيدك من الشعر بيت زميل في العمل حصلت كمان زوجته على بعثة وكلنا ما انهينا السنة الاولى في العمل

طرت مباشرة على موقع وزارة الخدمة المدينة وجلست اتفحص نظام الاجازات بحكم اني الان موظف مدني
قرأت النظام حرف حرف بند بند جملة جملة فاصلة فاصلة

توجهت للمدير
سلام يا حلو ابغى اجازة استثنائية مدتها 6 سنوات
رد المدير
الله الله الله 6 سنوات مرة وحدة انت تنطح وما انهيت سنة
قلت نعم 6 سنوات ومن حقي اخذها نظام الخدمة المدنية نص على ذلك
قال
لا انت ما تستحق اجازة عشان انت متعين جديد ( بكل وقاحة وكنت متوقع انه يقول ذلك لاان اغلب المداراء مافي راسهم ادارة ولا يعرف انه في نظام )
قلت له
انت قرأت نظام الاجازات الفقرة كذا تقسيم كذا البند كذا الذي ينص على
يحق للموظف طلب اجازة استثنائية تصل أقصاها إلى عشر سنوات ( مع ان البعثة 5 سنوات انا مزود سنة من راسي تحسبا الزوجة ممكن تنتهي الدكتوراة و انا ماتنهيت من مرحلة الدكتوراة للاحتياط فقط )
المدير شافني شديد و داخل عرض ولو كثر معاي (سوف اسحب عليه واتبع السلم الوظيفي في الشكوى و خصوصا انه كان في قرار صادر من مجلس الوزراء بخصوص الموظفين المرافقين يسرعة انجاز اجازاتهم وسفرهم )

سكت على باله اني بأمشي مطنشني
قلت في الاوراق تبع الاجازات سكت وقال راجع الفرع الرئيسي ( مع انها موجودة في مكتبه )
قلت حلو في نفسي انت فتحت الباب على مصراعيه وشوووووووووووف اللعب
اخطف رجلي على فرع الوزارة مدير شؤون الموظفين واعطيته الموضوع كامل كان الرجل معاي محترم لكن برضه مافي راسه ادارة يقول انت مالك سنة
قلت له انا برفع الاوراق اعطيني خلني اعبيها
اخذت الاوراق وهي كالتالي
-استمارة طلب الاجازة العادية والاستثنائية ( بعض الادارات تفصلها في نموذج واحد )
- صورة من قرار الابتعاث موجود فيه اسم المبتعثة و اسم المرافق ( أنا )
- صورة من كرت العائلة
- صورة خطاب من جامعة المبتعثة إلى ادارة العمل ( هذا الخطاب انا طلبته من الجامعة احتياطا يعني خطاب من الحكومة إلى الحكومة )
- صورة بطاقتي الشخصية
- صورة من قبول الجامعة في الدولة المبتعثة لها
- معروض بإسمي موجه إلى مدير فرع الوزارة
- معروض بإسمي موجه للمدير المباشر في عملي
- صورة من تذاكر الاركاب (تذاكر السفر )
رفعت الاوراق وانتهيت سلمتها لمدير شؤون الموظفين وطنشت المدير المباشر واعطيته صور وقلت خلاص انا و فرت عليكم المشاوير ( اكلت مع المدير )

حطيت رجل على رجل ( احب اوضح انه في المعاريض المرفوعة اضفت التالي : بناءا على لائحة نظام الاجازت الصادر من الخدمة المدنية رقم كذا بند كذا وهلم جرا ذلك اطلب من سعادتكم الموافقة على الاجازة )

و للمعلومية اظيف يقولون الموظف الجديد ما يستحق اجازة اعتيادية الا بعد سنة اكتشفت انه كلام المدراء كذب في كذب
النظام يقول بعد شهر تمام يستحق 3 ايام ولا تنسى الاجازة الاضطرارية
المهم اضفت مع الاستثنائية خطاب اجازة اعتيادية 21 يوم اضافة الى 5 اضطرارية (النظام لا يسمح بالاستثنائية الا بعد نفاذ الاعتيادية والاضطرارية ثم تستحق اجازتك الطويلة )
المهم جلست انتظر
بدأت اول يوم في الاجازة واسحب على العمل وجهزت الفيزا والعفش وكل شي
رجعت العمل باقي يومين على السفر
قابلني المدير قال انت غايب يومين قلت ليه هذه اجازتي 21 وفوقها 2 اضطراري
قال حساب خطأ اجازتك 18 يوم و2 يوم اضطراري
هنا انحشرت بدأت اصبح دجاجة بعد ما كنت اسدا ( وقتها افكر قلت يا ولد طز في اكبر شنب 3 ايام خصم ماعلينا انا مسافر نتقابل بعد 6 سنوات ان شاء الله ورجعت اسد مرة اخرى )
اتصلت على الرياض حتى اعرف تم الموافقة وله لا ولا اخفي عليك كنت خائفا ومتوتر و مع هذا كله كنت مصمم حتى لو تم الرفض قلت اسوي وكالة للمحامي في ديوان المظالم

بكرة السفر خلاص ولا يوجد رد

بكل جراة وحماس وفجعة قررت السفر وقلت طز طز طز في الوظيفة

توجهت إلى المدير وقلت له شوف يا أبو فلان انا مسافر وجاي اسلم عليك و بعطيك امانة ( طلع شهم فجأة جزاه الله خبر )
هذا خطاب مني موضح فيه ان موعد سفري بكرة وانا لازم اسافر وذكرت فيه ان الاجازة تأخرت وانا ماتحمل نتيجة التاخير وهذه صورة من تذاكر المبتعثة والمرافق
أرفعها لوكيل الوزارة ولمدير شؤون الموظفين في منطقة
قال ابشر وتروح وتجي بالسلامة ( حبايب )

سافرت بريطانيا فتحت ملف مرافق واعطيتهم قبول مدرسة اللغة واعطوني ضمان مالي
درست لغة انجليزية والحمدلله على كل حال الان على مشارف الدراسة الجامعية للمرحلة الماجستير

و مع ذلك صدرت الاجازة الاستثنائية بعد سنة و انا في بريطانيا ونزلت السعودية واخذتها عشان انظم للبعثة
و زميل سافر كندا لكن حول الاجازة الاستثنائية إلى أيتعاث من العمل مع ان النظام ما يسمح إلا بعد 2 سنة من التوظيف ( قوة الواسطة تمسح النظام )

عموما انت الان تجيب كل المستندات معاك وصور الفيزا والتذاكر و قرار الابتعاث وكرت العائلة وكل شئ و تتوجه لمدير التعليم في المنطقة و تقوله انا مسااااااااااااااااافر والناس هؤلاء يتلاعبوا بالنظام وفي قرار من مجلس الوزراء صدر بذلك وغير ان نظام الاجازات في الخدمة المدنية يسمح ب10 سنوات بدون راتب
لو ما حصلت رجاء اطلع على وكالة الوزارة لشؤون المعلمين و نفس الموال
مافي رجاء اطلع على مكتب الوزير وبدون تأخير لان سفرك مرة قريب
اهم شئ انك تسلم الاوراق وتأخذ رقم المعاملة
ولا تحلم حتى انك تأخذ الاجازة في يدك على طول إلا بقدرة قادر رب العالمين ( الشغلة فيها طويلة )

لما تجي بتسافر ارفع خطاب اخر تعلمهم انك خلاص ماعندك وقت للانتظار انا بمشي ومعه نسخة من التذاكرة ولاتنسى انك تأخذ رقم المعاملة من ادارة التعليم لو المدرسة مقفلة الادارة التعليمية مفتوحة
المهم
لو مافي احد اخذ اوراقك ارفع خطاب للديوان الملكي تتظلم من ماحصل لك وانهم ماخذو الاوراق (لازم توكل واحد ينوب عن بوكالة في التعليم والخدمة المدنية وديوان المظالم والديوان الملكي و زارة العدل ووزارة الداخلية و وزارة الخارجية )

و نسق مع وكيلك بالتلفون او السكايب عن اخر التطورات وخلك طبيعي وقلهم حسابكم لما ارجع
وساااااااااااااااااااااااااااااااااااااااااااااااا ااااااااافر ولاتفكر في اكبر شنب في التاريخ
الحمدلله البلد فيها نظام لكن قلة من يطالب بحقه

و انا انصحك انك تسافر لا تجلس

الله عليك والله انك كفو
أنا حدي معهم السبت جأت الاجازة والا باسحب وأسافر أنا خدمتي 13 سنة وأموري نظاميه
الله يكتب لنا الخير وين ما كان
مشكور لتفاعلك ولا تنساني والجميع من دعائك

من حقك الإجازة غصباً عنهم الحسودين

الله يوفقك يارب ...

وانا حالتي شبيه لحالتك تقريبا ..

انا مرافق لزوجتي وانا موظف بالخطوط ولي تقريبا سنه و3 شهور بالضبط
رفعت اجازة استثنائيه ورفضوها..

وما وقفت عند هذا الحد رفعت برقيه للديوان بخصوص ان زوجتي مبتعثه وما عندها مرافق الا انا ومرجعي مو راضي يعطيني اجازه استثنائيه

وبعدها بأسبوع وصل رد الديوان الى الخطوط ... وعلم به مدير العام للمحطة ورفض الاجازة وهددني بشكل غير مباشر وارسل لي بعض المدرا يقنعوني اني اقفل الموضوع وألغي البعثه وانا مو عارف وش اسوي

انا شكيت بشي كيف مدير المحطة يرفض القرار من يرفض القرار هو الديوان ألي مستند فيه ..اتوقع انه الخطاب جا فيه رد من صالحي عشان كذا المدير العام خايف اني ارسل للديوان مره ثانيه ويرووح فيها

وانا محتار اني اجلس وترووح البعثه ع زوجتي ولا استقيل واتوكل ع الله....

ومعليش ياصاحب الموضوع ع دخلتي

والله يوفقك ياررب دنيا واخره