خاص باستفسارات المعيدين والمعيدات فقط.

هلا اختي .. عشان ترتاحين اتبعي الآتي :-

1- اختيار التخصص ( اعتقد انك مقبوله اصلا على تخصص معين )

2- تحديد الدولة الي تبين تدرسين فيها .

3- البحث عن التخصص .( علميني وش تخصصك وممكن اساعدك في البحث )

4- اختيار الجامعة ، في حال وجود أكثر من جامعة يتم حينها اجراء مقارنه وتحديد افضل جامعة .

5- التأكد من انطباق شروط الجامعة عليك .

6- اذا مامعك لغه لازم تبحثين عن جامعة توفر ( القبول المشروط ) .

7- اذا خلاص اخترتي الجامعة الي تبين تبدين وقتها بمراسلة الجامعة ( إما عن طريق ارسال صور الاوراق عن طريق السكينر وارسالها بالايميل وذي الطريقه افضل واسرع شي .. او ارسال الاوراق عن طريق البريد .. )
انتبهي لنقطة ولا تنسينها الي هي اذا دفعتي شي لازم تحتفظين بالايصال مثلا ارسلتي اوراقك عن طريق شركة فيدكس ( 290 ريال ) لازم تحتفظين بالايصال عشان الجامعة بتعوضك قيمة الفاتوره .. واي جامعة تراسلينها خوذي ايضا الايصالات واحتفظي فيها لاجل تقديمها مره واحده للجامعة .. حتى على مستوى ترجمة الشهادات .. يعني اي شي تدفعينه الجامعة بتعوضك عنه ان شاء الله بس اهم شي يكون الايصال معك ..

طبعا لاتنسين ان لكل جامعة تطلب رسوم التقديم ( بعض الجامعات 100 دولار والبعض الآخر 50 دولار ) يعني على حسب ..

بعد ماتقدمين اوراقك تدخلين على الموقع الالكتروني وتعبين الابلكيشن ( فيه بعض الجامعات تقدرين تدفعين الرسوم حقت التقديم من خلال الموقع حقهم ويقبلون الفيزا والماستر كارد .. واذا مافيه تقدرين تودعين في حساب الجامعه )
وعشان تعرفين رقم حسابهم تقدرين ترسلين لهم رساله وتطلبين منهم رقم حسابهم ..

أي جامعة راح تطلب منك الاوراق التالية :-

1- ص الجواز

2- ص الشهادات

3- ص السجل الأكاديمي

4- التوصيات ( من اعضاء هيئة التدريس الي قاموا بتدريسك عدد 3 توصيات )

5- الضمان المالي ( من قسم الموارد البشرية بعمادة شؤون اعضاء هيئة التدريس )

6- السيرة الذاتيه ( عاد الله الله بالسيره زينيها مره ولا تخلين شي واعصري مخك عصر

7- خطاب التوجهات والأهداف ( نبذه مبسطه عن نفسك + ليش اخترتي تخصصك هذا + ليش اخترتي امريكا + ليش اخترتي الجامعه ذي << كذا انا سويت خطابي .


عاد ان نسيت شي العذر والسموحه ..

وفقك الله ..

كليتي من كليات جنوب الرياض وتوها انضمت لجامعة الملك سعود بدايه السنه هذي وكانت مع جامعة الاميره نوره
وخايفه ماتتعطل معاملتي لان مدة ابتعاثي ابيها مع مده ابتعاث زوجي حيث انه بدا الان الدراسه بأيرلندا
وجهة عمله تمنع يكون مرافق معاي بعد انقضاء فترة ابتعاثه
الله المستعــــــــــــــان
وشكرا لك اخوي معاند الجرح

الله يكون بعونك .. والله لو الود ودي اني لاصدر قرار ابتعاثك امس مو اليوم ..

لكن الشكوى لله .. العين بصيره واليد قصيره ..

لكن تفائلي خير وماعند الله الا الزين ..

أسأل الله العلي القدير أن ييسر أمرك وأن يسهل عليك أمر معاملتك بالجامعة وأن يحقق لك ماتريدين من خير .. اللهم آمين .

هلا اخوي معاند
مشكور وما قصرت
انا تخصصي علاج طبيعي Physical Therapy

وان شاء الله امريكا

كل الاوراق اللي قلت عنها موجوده ما عدا الضمان المالي
والسيرة الذاتية وخطاب الهدف من الدراسه مجهزته من سنه

طيب ارسل الاوراق لمين لل ??Addmistration

ملاحظه:

انا لسه ما باشرت
بس مستعجله على البعثه ابغى اول ما ادوام ان شاء الله اعطيهم القبول
وان ان شاء الله متفائله راح يبتعثونا بسرعه لان احنا اول دفعه في هذا التخصص

الدوام قريب وما اعتقد بيجيك قبول قبل ماتبدأ الدراسة لأن اوراقك ماكملت حتى الان .. الشي الثاني الدراسة في امريكا حاليا شبه متوقفه ( الاجازه ) ولكن اغلب الجامعات تستقبل طلبات الالتحاق حاليا ..

بالنسبه للتخصص جميل والله .. الله يوفقك يارب .. ريهابليشن كنت بتخصص فيه ..

اممممم .. تلاقين على هذا اللينك عدد 190 جامعة توفر تخصصك Graduate Schools Search – Find Your Graduate School with Peterson's

واللينك هذا اذا اعجبتك جامعة معينه وتبين تشوفينها تفضلي .. YOUniversityTV: College Video Tours

بالتوفيق ..

مشكور وما قصرت اخوي معاند

جزاك الله خير

استنى الين اباشر واخذ الضمان المالي ولا...ابدأ اراسل الجامعات

تستطيعين الان الحصول على الضمان المالي .. فيه ورقه عندهم تعبينها ( الموارد البشرية - عمادة شؤون اعضاء هيئة التدريس )

تكتبين اسمك كامل بالانجليزي .. تخصصك .. كليتك .. الجامعة الي بتروحين لها .. وانها معترف فيها ...

طبعا لازم تدخلين على موقع وزارة التعليم العالي وتشوفين الجامعات الموصى بها وتتأكدين ان الجامعة الي اخترتيها

فعلا معترف فيها .. واذا جيتي تروحين لهم لازم تطبعين اسم تخصصك والكلية ( من موقع الجامعة الي بتدرسين فيها ) وكذلك تطبعين صفحه وزارة التعليم العالي ان فعلا الجامعه ذي معترف فيها ..

تطبعين الورقتين وتاخذينها لهم .. انا اذكر قالولي حطها اليوم ومر باكر وخذها بس رفضت ونشبت لهم حتى خلصتها ..
اذا مامعك لغه انجليزيه وضحي لهم عشان يغطي الضمان المالي مصاريف معهد اللغه ( مع ان ورقة الجامعه تكفي ولكن افضل تذكرينهم )

والافضل انك ماتقولين لهم انك ماباشرتي .. وفرضاً ماقدرتي تطلعين الضمان المالي عادي استغلي وقتك في البحث عن الجامعة والتخصص المناسبين لك .. انا اذكر جلست شهرين مقابل النت وما افارقه ..

بالتوفيق ياارب ..

واذا جيتي تروحين لهم لازم تطبعين اسم تخصصك والكلية ( من موقع الجامعة الي بتدرسين فيها )
ما فهمت كيف يعني؟؟؟؟؟؟؟؟؟؟؟

اسفه اخوي طفشتك

كنت أتمنى اكون معيدة وابتعث ولكن مالي نصيب

واللي يرزقني خيراً منها