إجراءات ابتعاث معيدي ومحاضري جامعة الملك سعود (ذكور وإناث) والإجابة عن استفساراتهم

شكراً الموارد البشرية على حسن ردكـ
الله يعين . .

العفو
والله المعين ولا تشيل هم ترى غير كثير شالوا الهم وبالاخير أكتشفو أن الامور بتصير زي الحلاوة بس تبي صبر ووقت

موفق

موارد حالفه لااعطيك حلاوة التعيين بس تحمل اسئلتي شوي ...

اعطوني ورقه تعهد اوقع عليها باني بحضر لهم ورقه قبول وتاشيره للشؤون اعضاء هيئه التدريس في غضون 6- 9 شهور واذا ماجبتها يعتبر الغاء لقرار التعيين ... القبول وموجود عندي اما التأشيره مالي نيه اسويها لاني ماراح اسافر ....

سؤالي الحين يقدرون يلغون قراري جد ؟؟

أولاً نبي الحلاوة بحكم إنهم بيعطونك على وظيفية معيدة كومة قروش وزود عليها بدل تعيين لذلك الشهر الجاي حسابك يبي يمتلي لذلك الحلاوة تحوّل على حسابي رقم 0000000000000 وعاجلاً

على طاري تعهد الحين يوم إنك توقعين على التعهد تضنيين إنهم يلعبون معك
أو يمكن إنهم يستهبلون عليك مثلاُ
الله يصلحك بس تحركي وجيبي القبول لا يزعل العميد عليك

وربي يوفقكم جميعا

يعطيك العافية أخوي الموارد البشرية على الجهود اللي تقدمها ..

أنا مقدم على وظيفة معيد ورفعت أوراقي من مجلس القسم الى مجلس الكلية الى عمادة شؤون الموظفين ..

وهناك طلبوا مني أجيب قبول معهد لغة تابع لجامعة معترف بها من وزارة التعليم العالي..

المهم ..

أنا طلبت من أحد مكاتب القبول يجيب لي قبول لمعهد لغة بأسرع ما يمكن ..

قال طيب،، وجاب لي قبول من معهد ،، لكن المعهد هذا ما أعجبني والدراسة حطها تبدا في يناير 2011 أنا أبغى أبدا في مارس 2011،،

السؤال هو :

لو قدمت قبول المعهد هذا .. عشان تمشي أوراقي ويتم التعيين ..

هل تغيير المعهد ووقت بداية الدراسة سهل بعدين والا يكون فيه تعقيدات ؟؟؟

حياك الله,
ما انصحك أنك تقدم أرواق قبول لشهر يناير وأنت في نيتك التغيير. الأفضل أنك تجيب قبول أنت راضي عنه والقسم اللذي تعمل به يكون راضي عنه.
لكن إن كانك رجال مستعجل وتبي تخلص أوراق التعيين بقبول تاريخه في يناير تأكد أنه من معهد تابع لجامعة معترف بها في تخصصك الدقيق وقدم طلب الإبتعاث وإذا جاك القبول الثاني في شهر مارس بعده تقدم تأجيل تاريخ بداية الدراسة لرئيس القسم وتأخذ أجراءاتها النظامية.
لكن إنت عندك أمرين:
1- وقت قصير بين يناير ومارس.
2- معاملات وإجراءات نظامية لطلب الابتعاث ثم طلب التأجيل قد تسبب لك تأخير وقلق ماله داعي.
لكن الأفضل مثل ما قلت لك جب لك قبول أنت والكلية الي تعمل بها موافقين عليه وخلك في السليم
والله أعلم

ههههههههههههههههههههههههه ..... قولتك ,,, اجل احسبهم يهزرون معي ,,, طيب القبول موجود بس ناقص التاشيره ... يعني قولتك اجيبها واسكتهم ؟؟؟


طيب ياخي تاشيره وانا ماراح اسافر والله شغلتها شغله ترى .... اعطني رايك تراي اثق فيك ... كونك من الجو نفسه ؟؟؟

مادري كنك مالك خاطر بالدراسة برا!!
لا يكون نيتك تعطينهم القبول والفيزا ولا تروحين تدرسين, برأيك بتلعبين عليهم؟؟
أقول ترفقي بعمرك لا يهوّنوّن ولا يخلونك تباشرين العمل
أن جبتي القبول والفيزا لازم ترفعين طلب ابتعاث حتى تباشرين العمل وتمشي معاملة الإبتعاث ويصدر لك قرار إبتعاث.

الله يصلحك بس هذولا رجال بشنبات مهوب لعبه

انا رفعت مباشرتي وقضيت ............... وهم اعطوني مهله بس عشان اجيبها لهم ... وتبي الجد مستحيل اقدر اسافر لان الوالد مريض ومابسحبه على وجهه معي ... طيب في مثل هالحاله وش اسوي شور علي الله يوفقك وين مارحت ...

عادي أنهم يرفعون لك المباشرة وعادي يصرفون لك راتب لكن ملزمة أنك ترفعين طلب الإبتعاث لكن دام عندك ظرف صحي فالكلام هنا تغيّر
لكن الحل بسيط وأنك ترفعين لعميد الكلية اللي تعملين بها خطاب بتأجيل البدء في أجراءات الإبتعاث لظروف صحية يواجها ولي أمرك.
طبعاً قبل ما ترفعين الخطاب لازم تكلمين العميد أو رئيس القسم وتجسّين نبضه (تشوفين ردة فعله على طلبك) :P
إن قالوا لك موافقين أو يسهل الله ويصير خير, كذا أرفعي الخطاب ولازم ترفقين أوراق رسمية من مستشفى تثبت حاله ولي أمرك الصحية.
وكذا أتوقع يوافقون ويعطونك فترة حتى تتحسن حالة ولي أمرك.

والله يعينك ويخلي لك الوالد ويعافيه يارب